BILANGAN 28:26 - Susula Malalaok Hehelu Palak Ma Hehelu Beuk

²⁶ Nai Feta Keketu-kokoluk-ka fai makasososan-na, fo basa fai malole-a mamasok hitu, fo nai lelek emi tunu-hotu gandum beuk fe Manetualain soona, emi muse makabubua fo makaluku-makatele, ma ta bole maue-male'di, ue-le'dis mabela fa.

BILANGAN 28:26 Referans Kwoze

KELUARAN 34:22

Tao Feta Keketu-kokoluk nai lelek emi mulai ketu-kolu gandum-ma buna-boan makasososan-na. Boeo tao Feta Lalaa Akidook-ka nai basa teuk-ka, nai lelek emi ketu-seu ai boak-kala.

KELUARAN 23:16

Tao Feta Ketu-koluk-ka nai lelek, emi mulai ketu-kolu emi tinam-ma buna-boa makasososan-na. Tao feta Lalaak Akidook-ka nai teuk-ka basan, fo nai lelek emi ketu-kolu basa emi osi angol-la ma osi aiboam-mala.

1 KORINTUS 15:20

Tehu nananitak, Kristus nanatao naso'da falik neme mamate sa mai so. Ia nde da'di bua nape'dak esa nae, hataholi manamate basa kala, neukose nanatao naso'da falik.

YAKOBIS 1:18

No dale hihii mesa na de, Ana tao ita da'di Ndia anan, tunga hala-kokola ndo na. Ana tao leondiak, fo ela ita hapu mamana matua-madema lena heni basa hata maso'dak fo nakadada'di kasa.

BILANGAN 28:18

Nai feta ndia, fai makasososan-na, emi muse makabubua, fo makaluku-makatele, ma ta bole maue-male'di ue-le'dis mabela fa.

BILANGAN 28:27

Tunu-hotu fe Manetualain tutunu-hohotu nanatunuk-ka, nalupa sapi mane dua, bi'ilopo maneanak esa, ma bi'ilopo ana mane hitu, besak-ka teuk beke esak, ma ta lu'u la'ak fa. Tutunu-hohotu nanatunuk ndia boon-na, nandaa no Manetualain dalen-na.

BILANGAN 29:1

Neu hataholi Yahudi-la bula ka hitun-na, fain esa soona, emi muse makabubua fo makaluku-makatele, ma ta bole maue-le'di ue-le'dis mabela fa. Nai faik ndia, muse puu pupuuk-kala.

KELUARAN 12:16

Nai faik makasososan-na, ma fai ka hitun-na boe, emi muse makabubua, fo tao makaluku-makatele. Nai faik ndia dalen-na, emi ta bole tao tatao-nono'ik hata esa boen, ta'da fe'e emi paluu beek, soaneu do'de-nasu emi nana'a-nininum.