AMOS 6:10 - Susula Malalaok Hehelu Palak Ma Hehelu Beuk

¹⁰ Teidalek fo manaito-ato natoi-natonon-na, neukose ana mai fo ana ko'o no tolanoon ndia popolan-na leo deak neu. Soona naloo bou-bou neu hataholi manai uma ndia buin-na nae, “Ade bei hapu nggelok bei laso'da do ta?” Soona, neukose namanene hala natataak-ka nae, “Ta!” Teidalek fo natoi-natono popolak ndia, neukose nafa'da nae, “Boso kokolak seluk bai! Ita ta bole seseik Manetualain na'den-na fa.”

AMOS 6:10 Referans Kwoze

AMOS 8:3

Nai faik ndia nakameek manai uma manek-kala, neukose lasafali da'di kikii-makaleleuk. Nai mamanak lala'en-na, mamates nanatapa henik no denge-dengek-ka, lalefule'ak.”

SEMUEL SUSULAK-KA ESAN-NA 31:12

boema, hataholi palani ta'ti batu-la, ala la'ok leme ndia leo Bet-Sean leu, le'odae katemak esa. Lakona heni Saul no anamanen-nala popolan-nala, neme kota ndia papala nanadaman lain mai, boema lenin leo Yabesh neu, de ala hotun.

AMOS 5:13

Hu kande emi tatao-nono'i ma ndia, de hataholi manatee-tenok-kala dodoo lae, malole lenak ka'da bedenge nai le'do-fai mangalauk leondiak-ka.

YESKIAL 24:21

anduku-alosak hala heheluk-ka nde ia neu emi: Emi dalem-ma namatua neu Manetualain Uman-na be'i-balakain. Emi hii meten fo emi meu donge-daman, tehu neukose Manetualain tao nanggenggeo Uman-na. Ma o teidalem fo bei muli-solum fo manaleo manai Yerusalem-ma, neukose nanataonisak nai natee-natatik dale.

YESKIAL 20:39

Manetualain Fo Mademaina nafa'da nae, “Hai hataholi Israel-la lemin! Besak ia, tunga emi dale hihiim-ma, fo esa-esak neu sene-do'ok neu ndia sosongo-tatangon! Tehu mafandendelek te, basa ndia soona, emi muse tunga Au, ma boso boe tao maggenggeo Au na'de malalao-malalafung-nga, nenik emi meni tutunu-hohotuk fe emi sosongo-tatangom sila-la.

YEREMIA 44:26

Tehu besak ia mamanene hata fo Au afa'dan neu emi, hai hataholi Israel manai Masir lemin; Au, Manetualain, soo-supa unik Au na'deng-nga fo matua-madema de Au ta po'i emi pake Au na'deng-nga soaneu tao naheluk esa so'on. Emita bole mafa'da mae, ‘Au soo-supa unik Manetualain fo maso'dak-ka!’

YEREMIA 16:6

Hataholi kamasu'ik-ka ma hataholi nuu ta hata-taak mani nusak ia neukose mates te ta hapu manamatoi fa. Ta hapu hataholi esa boen neukose tao nahe'di aopan-na do nggeu heni langa doon-na da'di leo manafaluk soaneu sila fa.

BILANGAN 17:12

Boema, hataholi Israel-la, lafa'da Musa lae, “Metema leondiak soona, ami soe so! Neukose mopo-mate ami!

2RAJA-RAJA 23:16

Basa boema, Yosia lipa leo dea neu, de nita lates de'ubee lai letek lain. Boema, nadenu hataholi, fo neu ofe heni lates sila-la, fo ana su-nala dui-kalun, fo ana hotus neu mei tunu-hotuk fo, bei manapila lo'a-lo'ak ndia lain. Ana tao nanggenggeo mei tunu-hotuk sila-la, eno-dalan leondiak. Boema hata fo, makahulun-na Manetualain nabin-nala lafa'da elak-ka, ana da'di, fo nai lelek Manek Yerobeam-ma, bei napadeik deka no mei tunu-hotuk ndia, la'e fai malole esa. Basa ndia boema, Manek Yosia, nita late fe'ek esa seluk.

2RAJA-RAJA 6:33

Elisa beita kokolak nate'e fa te, manek-ka losa nai ndia so, de nae, “Manetualain nde fe susa ia, tunin-na ita! Da'di, sosoak hata, au amahena tutulu-fafalin bai?”

YEREMIA 9:21

Mamates-sa, ana masok tunga jendela, de ana tola nakandoo leo uma manek-ka neu so; ana kaa-na ni'iana-la lai enok lain, boema hataholi muli-soluk-kala, lai mook-ka.