1 TAWARIKH 27:1 - Susula Malalaok Hehelu Palak Ma Hehelu Beuk

^1-15 Malanga uma loo, mauli-malanga teidale-bobongik ma malanga solda'du matuainan-nala nde ito-ato paleta nai nusa Israel-la. Tunga teuk, fo nai bulak esa dalen-na, bubuak esa hapu bela-ba'uk langganggatiaok, fo malangan esa nde da'di mauli-malangan. Bubuak esa soona, hataholi lifun duahulu haa. Basa mauli-malangan fo manahapu bela-ba'uk nai bulak esa dalen-na, na'den-nala nde ia: Bulak makasososan-na: Yasobam, fo Zabdiel anan-na (fo teidale-bobongik Peres ma leo Yehuda hataholin ndia). Bulak ka dua: Dodai, fo Ahohi tititi-nonosin. Miklot nde limaboa konan-na. Bulak ka telu: Benaya, fo Imam Yoyada anan-na; ndia mauli-malangan nai “Bubuak Tridasawira” (fo anan Amizabad nde limaboa konan-na). Bulak ka haa: Asael, fo Yoab tolanon-na (Anan Zebaja nde nggatin-nana). Bulak ka lima: Samhut, fo Yizrah tititi-nonosin ndia. Bulak ka nee: Ire, fo Ikes anan-na, neme kota Tekoa mai. Bulak ka hitu: Heles, fo Efraim neme kota Peloni, tititi-nonosin ndia. Bula ka falu: Sibkhai neme kota Husa mai (fo teidale-bobongik Zerah, ma leo Yehuda hataholin ndia). Bulak ka sio: Abiezer neme kota Anatot-ta mai, fo nai leo Benyamin nusan-na. Bulak ka sanahulu: Maharai, fo Zerah neme kota Netofa, tititi-nonosin ndia. Bulak ka sanahulu esa: Benaya, neme kota Piraton-na mai fo nai leo Efraim-ma nusan-na. Bulak ka sanahulu dua: Heldai, fo Otniel neme kota Netofa tititi-nonosin ndia.

1 TAWARIKH 27:1 Referans Kwoze

MIKHA 5:2

Da'di, neukose Manetualain po'ilotak sila musun-nala koasa anan-nala, losa inak fo nananaketuk soaneu da'di manakoasa ndia inan, ana bongi-nan. Basa ndia soona, hataholi fo sila leoina esa, bei lai mamana tu'u-tapak, neukose Ana taos da'di esa loo sila leoinan-na.

1 TAWARIKH 28:1

Manek Dauk-ka paleta fo ela basa mauli-malangan Israel-la lakabubua. Da'di basa maneleo, malangan teidale-bobongik, basa manamanea manek-ka ma anamanen-nala hata-heton boema bana-manun-nala – dede'a keke'un-na, basa uma manek-ka hataholi matua-mademan-nala, malanga solda'du matuaina-la ma hataholi nananita-nalelak-kala, fo basa-basas lakabubua lai Yerusalem.

1 TAWARIKH 13:1

Manek Dauk ka nakokolaok no basa malanga solda'du matuainan fo nauli-nalanga solda'du lifun esa ma solda'du natun esa.

1RAJA-RAJA 5:14

ma Adoniram da'di sila malangan-na. Salomo ba'e hataholi sila neu bubuak telu, fo bubuak esa soona hataholi lifun sanahulu. Bubua kateluk sila-la leo langgatiaok fo bulak esa nai Libanon ma bulak duan nai uma.

1RAJA-RAJA 4:27

Nai bulak esa dalen-na, bupati la langganggati aok fe nana'ak soaneu Mane Salomo ma soaneu basa hataholi manahapu nana'ak manai uma manek-ka, nalosa ala ta to'a-taa hata esa boen.

1RAJA-RAJA 4:7

Salomo so'u bupati sanahulu duan nai basa nusa Israel-la lala'en-na. Sila bela-ba'un nde pe'da lakabubuan-na na'a-nininuk fo maneme sila nusan dale mai soaneu manek-ka ma uma manek-ka isin-nala. Bupati la esa-esak fe natataak neu dede'ak ndia nai bulak esa dalen-na tunga teuk.

SEMUEL SUSULAK-KA ESAN-NA 8:12

Ana so'u nggelok da'di malanga solda'du matuaina neu solda'du lifun esa, ma nggelok nalanga solda'du limahulu. Neukose manek ndia nakaseti emi foi-fala tinan-na, pe'da-fua ndia keketu-kokolun buna-boan, tao tafa-sisilo ma kaleta musun-nala taka-besin.

ULANGAN 1:15

Hu ndia de, nai mauli-malangan fo emi helek sila-la dalek, au hele hataholi de'ubee manatee-tenok, ma ha'da-paliin malole, fo au so'us da'di emi mauli-malangam. Sila de'ubee, da'di mauli-malangan neu hataholi lifun esa, ma nggelok lauli-lalanga hataholi natun esa, nggelok lauli-lalana hataholi 50, ma nggelok lauli-lalanga hataholi 10. Au so'u mauli-malangan fe'ek boe, fo ala ito-ato emi leom-ma.

KELUARAN 18:25

de ana hele-na, leoina Israel-la hataholi manatee-tenon de'ubee. Ana fes da'di mauli-malangan neu hataholi lifun esa, natun esa, limahulu, ma sanahulu.

1 TAWARIKH 26:32

Basa ito-ato agama lala'en-na ma ito-ato paleta nai Israel fo Lee Yarden-na boboan dulu – fo nde leo Ruben, Gad ma leo Manasye seli, nusan-na – ala fen neu Yeria malanga uma loon lifun duan-natunhitu, fo Manek Dauk-ka helek sila-la basa-basas hataholi nananita-nalelak mesa-mesan.

1 TAWARIKH 29:6

Boema basa malangan teidale-bobongik-kala, mane leo-la, basa malanga solda'du matuaina-la ma basa manaho'u manek-ka hata-heton lala'en-na lafa'da lae sila boeo hii fe tutulu-fafalik.

YOSUA 23:1

Doon-na seli, nai lelek Manetualain fe hataholi Israel-la nee-nee lino linok; boema musu-a ta fes nasanene'dak mahelek so'on. Nai lelek ndia Yosua namalasi nanseli so.

2 SEMUEL 23:8

Dauk malanga solda'du palani tatibatun-nala, na'den-nala nde ia: Hataholi makasososak-ka nde, Ishbaal, hataholi Hakhmoni, fo mauli-malangan nai “Bubuak ka Telu-a.” (Triwira). Ana la'ban hai hataholi 800, nai natee-natatik esa dalek, de ana tee nisa la'iesak-kasa.

1 TAWARIKH 11:10

Basa Dauk malanga solda'du matuainan fo nananita-nalelak-kala, na'den-nala nde ia. Latee-lata'ti sama-sama loo laun Israel-la lala'en-na, fo ela Dauk da'di manek, sama leo Manetualain helu basan so. Ma ala tia-to'ba lahele Dauk paletan-na.

2TAWARIKH 1:2

Manek Salomo fe paleta neu basa malanga solda'dun lifun esa ma solda'dun natun esa, basa manaho'u paleta-la, ma basa malanga uma loo Israel-la