Markus 5:2 - Mutu (Oov)

^2-4 Ndug tonowen, ŋgeu eez inepneep. Ye, avuvu samsamiadi katindi tizeeva, ve moghon moghon inepneep ilooŋ ila yaam saambu pida to tigharaat di tinim naal pa mateeŋa. Sawa to Yesu iyaat izi pa waaŋ, ŋgeu tonowen ipul ina to yaam saambu we, ve ilaagh iŋarua Yesu ila. Ŋgeu tonenen, sawa naol tikaui pa ravraav toman sen. Eemoghon ikuup motmotin di, ve ighau ila. Pasa, ye tapiri tiina kat. Tovenen tamtoghon eta irau ikisi ve ikaui muul maau. Ve tamtoghon eta irau ighami ate izi ne maau.

Maaron Saveeŋ Tooni Patabuyaaŋ Tuam

^2-4 Nugh tawe, ŋeer ee ilepleep. I, avuvu sasaghati katini tizeeva, ve monmon ilepleep iloŋ ila maet puura siriv tau tigharaat zi timin naal pa mateegha. Saawe tau Yesu iyaat izi pa waaŋ, ŋeer tawe ipul niia ta maet puura we, ve ilaagh ŋaruini ila. Ŋeer tana, saawe naol, tikauu pa ravraav toman sen. Eemon ikupkuup motmotin zi, ve ighaughau ila. Pasaa, i tapiri tiina kat. Tauvene tamtamon eta irau ikisi ve ikauu muul mako. Ve tamtamon eta irau ighamu aate izi ne mako.

Markus 5:2 Referans Kwoze

Markus 1:23

Sawa tonenen, ŋgeu eez ineep toman di ila rumai lolo. Ye, avuvu samia izeeva. Tovenen imboob aliŋa tiina ighaze:

Lukas 9:42

Pain tonowen iŋarua Yesu ila, ve avuvu samia tonowen imundig pani, ve ipiyaava izila taan, ve igham tua ikatotooŋ. Tovenen Yesu iyaan avuvu samia ighau, ve igharaat pain tonenen le tini poia. Ghoro ighuri imuul ila to tama.

Lukas 8:27

Yesu iyaat izi pa waaŋ, ve ŋgeu eez to ndug tonowen ilaagh iŋarua ila. Ye, avuvu samsamiadi katindi tizeeva le ŋgar toni iwaghamgham kat. Tovenen muuŋ ve inim, ye indudi pa uli eta maau. Ilaghlaagh tini ŋginiŋa. Ve ineep ila ruum eta maau. Inepneep ilooŋ ila yaam saambu pida to tigharaat di tinim naal pa mateeŋa.

Markus 7:25

Liva eez to ndug tonowen, avuvu samia izeev natu liva. Liva tonowen, ye Yuda maau. Ye Grik tidi to taan Ponisia to ineep ila taan suruvu to Siria. Ye ilooŋ Yesu varu, ve rikia moghon iŋarua Yesu ila, itap izi Yesu aghe pughu, ve itaŋ rorani ighaze indiir avuvu samia tonowen ighau pa natu liva.

Markus 4:1

Yesu ila ivot ya naliu dige, ve ipamundigin uraat toni muul to patoŋaaŋ tamtoghon pa Maaron aliŋa. Sawa tonenen, ival tiina kat tila tiluvuti tighaze tilooŋ saveeŋ toni. Tovenen ye iza waaŋ eez, ve tipanduura ivot ila ris. Ghoro mbole izi, ve ivotia Maaron aliŋa padi. Ve ival tiina tonowen tineep izi naari, ve tighurghur taliŋadi pa saveeŋ toni.

Markus 3:30

Yesu isavia saveeŋ tonenen padi pasa, yes tighaze avuvu samia izeeva.

Markus 1:26

Ye isaav tovene, ve avuvu samia iwatokin ŋgeu tonenen, iyak samia, ve ipuli ve ila. Mk 9:26

Markus 3:9

Ival tiina tonenen tila tiluvut Yesu. Tovenen ye isaav pa taghoniiŋa toni tigham waaŋ eta inim isaŋan pani. Ighaze tamtoghon tigiriŋi, ghoro iza waaŋ ve ila ipot saguan.

Markus 4:36

Tovenen tighur ival tiina tila, ve taghoniiŋa toni tiza waaŋ to Yesu ineep izala pogho ne, ve tivot tila. Waaŋ pida tila toman di paam.

Markus 5:21

Yesu toman taghoniiŋa toni tigham waaŋ, ve timuul tila pa ya naliu paŋa ite. Sawa to tila tilooŋ, ival tiina kat tila tiluvut Yesu izi naari.