Kolosi 3:15 - Mutu (Oov)

¹⁵ Ŋgar luuma to Krisi irau igham pooz ila lolomim, ve ipatooŋ gham pa sa ŋgar to pale aghami pa tamtoghon. Pasa, Maaron ipoi gham anim le, ve ilup gham anim Krisi anoŋa ee moghon, leso ataghon ŋgar tovene. Ve lolomim poia pa Maaron, ve apaiti pa poia toni irau sawa isob. Yo 14:27+; Ro 12:5; Pil 4:7

Maaron Saveeŋ Tooni Patabuyaaŋ Tuam

¹⁵ Ŋgar luuma to Krisi aat igham pooz ila lolomim, ve itotoi gham pa saa ŋgar tau pale agham pa tamtamon. Pa Maaron ipoi gham amin i le, ve ilup gham amin Krisi anooŋa eemon, leso ataghon ŋgar tauvene. Ve lolomim poia pa Maaron, ve apaiti pa poia tooni irau saawe. Yo 14:27+; Ro 12:5; Pil 4:7

Kolosi 3:15 Referans Kwoze

Yoan 14:27

“You pale napul gham. Tovenen naghaze napul luuma tiou ineep toman gham, leso aneep poia toman lolomim luuma. Nepooŋ poia to naghaze nagham payam, nene raraate inimale nepooŋ poia to tamtoghon to taan tighamghami ne maau. Tovenen lolomim imbumbu malep, ve amatughez malep. Yo 16:33; Ro 5:1; Pil 4:7; Kol 3:15

Rau Tau Paulus Iboode Pa Yes Roma Rom--Romans 15:13

Maaron to iit taghurghur mataad pani, pale igham yam to aghur ila toni lolomim poia kat, ve aneep poia toman lolomim luuma. Ve Avuvu Patabuaŋ tapiri ipalot gham, leso lolomim ru sob, ve anumeer Maaron kat, ve asaŋan sawa to ye igham mulin ghiit ve taneep pooi. Onoon. Ro 14:17; 1Kor 4:20

1 Tesalonika 5:18

Sa mbeb to ighaze ivot payam, lolomim poia pa Maaron ve apaiti. Pasa, ye ighaze yam tamtoghon to anim Krisi le, agham tovene. Ep 5:20; Kol 3:17

Rau Tau Paulus Iboode Pa Yes Roma Rom--Romans 5:1

Tovenen, iit to taghur ila to Krisi, taneep deŋiaad ila Maaron mata wa. Ve Tiina toit Yesu Krisi irab motin koi to muuŋ ineep ila itiŋa Maaron sosood. Ye inim ataam pait, tauto aazne itiŋa Maaron talup ghiit tanim ee moghon wa. Mbaŋ 10:36; Ro 3:28; 2Kor 5:19; Ep 2:13+; Kol 1:20

Kolosi 3:17

Saveeŋ tiam toman uraat tiam, ve sa ŋgar ite paam to ighaze aghami, yam irau aghami ila Tiina toit Yesu iza pa apaiti. Ve lolomim poia pa Tamaan Maaron paam, ve apaiti pa poia toni ila Yesu iza. 1Kor 10:31; 1Tes 5:18; Hib 13:15

Yoan 16:33

Saveeŋ tonene, you nasavia payam, leso aneep tuŋia inim tiou, ve luuma tiou ineep toman gham. Onoon, sawa to aneep izi taan, pataŋani pale igham gham. Eemoghon amatughez malep. Lolomim poia ve ayoon ariaŋa! Pasa taan tapiri, you natatani wa.” Yo 14:27; Ro 8:35+; 1Yo 4:4, 5:4

Epesus 5:20

Ve sa mbeb to ighaze ivot payam, poia payam ma ipataŋan payam, nene lolomim poia pa Tamaan Maaron, ve apaiti ila Tiina toit Yesu Krisi iza irau sawa isob. Kol 3:17; 1Tes 5:18; Hib 13:15

2 Korin 9:11

Tovenen Maaron pale igham gham araua kat pa mbeb tisob. Leso yam irau agham ulaaŋ pa tamtoghon irau sawa isob. Ve sawa to yei nigham mbeb tiam ila peria to yes to mbolaaŋ igham di, yes pale lolodi poia pa Maaron, ve tipaiti pa ulaaŋ to yam agham padi.

Epesus 4:4

Aghita. Lupuuŋ ee moghon to Krisi to inepneep. Nene iit tamtoghon toni to tanim Krisi anoŋa. Ve Maaron Avuvu ee moghon to inepneep. Ve sawa to Maaron ipoi gham anim le, ye ipoi gham pa aghur matamim pa mbeb ee moghon. Ve Tiina toit ee moghon, ghurla toit ee moghon, ghamuuŋ ya toit ee moghon, ve Tamaan ee moghon. Nene Maaron. Mbeb tisob tineep ila ye samba ve tigham uraat titaghon ŋgar toni. Ve ye ineep ila mbeb tisob lolodi. Ro 11:36, 12:5; 1Kor 8:6, 12:13; Kol 1:5

Rau Tau Paulus Iboode Pa Yes Roma Rom--Romans 14:17

Pooz to Maaron, nene mbeb to ghaniiŋ ve ghunuuŋ maau. Pooz to Maaron ŋgara, nene vene: Tataghon ŋgar deŋia, ve itiŋa talup ghiit tanim ee moghon, ve Avuvu Patabuaŋ igham ghiit taneep toman lolood poia kat ve lolood luuma. Ro 15:13; Ga 5:22+

1 Timoti 2:1

Yo, mbeb tiina to naghaze napalot gham pani muuŋ, nene vene: Yam irau aghur tamtoghon tisob ila suŋuuŋ tiam. Asuŋ pa Maaron toman lolomim poia pani, ve aghasoni pa iuul di ve igham pooz padi. Aghur yes kinik toman daba tisob to taneep ila sambadi ne, ila suŋuuŋ tiam. Leso pataŋani indeeŋ ghiit sob, ve taneep poia toman lolood luuma, ve mataad iŋgal Maaron ve tataghon ŋgar toni, ve taŋgin tauud pooi tanimale yes to ledi ŋgar pa Maaron. Ro 13:1; Ep 6:18; Pil 4:6

Kolosi 2:7

Lolomim ikis Krisi kat, ve agham tapirimim ila toni, animale ai to waria izila kat. Ve ayoon tuŋia ila toni, animale ruum to tireii izala gungun ariaŋadi. Ve aghur ila toni ariaŋa. Leso ataghon saveeŋ to tipatoot gham pani. Ve lolomim poia pa Maaron ve apaiti pa poia toni irau sawa isob. Ep 2:20+, 3:17; 1Tes 5:18

Epesus 5:1

Maaron lolo payam kat, ve igham gham anim ye tau ndinatu. Tovenen laghooŋ tiam, yam irau ataghon ŋgar toni, ve lolomim pa tamtoghon tisob ve agham poian di, inimale Krisi lolo pait ve ipul tau imaat pait. Ŋgar to ye ighami, nene igham Maaron lolo poia inimale watooŋrau to vuzi poia kat. Mt 5:48; Yo 13:34; 1Pe 1:15+; 1Yo 3:16

2 Korin 4:15

Yei niyoon ariaŋa pa badooŋ pataŋani tiei to naol ne, leso niuul gham. Yei nighaze poia to Maaron iza to ival tiina, leso lolodi poia pani ve tipait iza pa tapiri ve poia toni. 2Kor 1:6; Kol 1:24; 2Tim 2:10

Saveeŋ Yoŋgaaŋ 7:12

“Onoon kat. Iit tapait Maaron toit pa poia toni. Ye iza tiina kat, ve ŋgar toni tiina. Lolood poia pani pasa, ye igham poian ghiit. Ye ariaŋa, ve tapiri tiina kat. Tovenen iit pale tapaiti tovene itaghoni taghoni gha ila! Onoon.” Syg 5:12+

Kolosi 1:12

ve apait Tamaan Maaron toman lolomim poia. Pasa, ye igham mulin gham, ve aazne yamŋa tamtoghon toni patabuaŋa asob izamim iyoon pa agham nepooŋ poia ila ye tau ŋguruba izi ndug sambam. Mbaŋ 26:18; Ep 1:11,18, 3:16

Hibru 13:15

Tovenen iit tapait Maaron ila Yesu iza. Onoon kat, iit to taghur ila to Yesu ve tavotia iza ne, avood pale ipait Maaron irau sawa isob. Nene inim watooŋrau toit ila pani. Mbo 69:30+; Ep 5:20; 1Pe 2:5

1 Korin 7:15

Eemoghon ighaze toŋvetaz eta to Krisi azuwa ighur ila maau, ve azuwa tonenen ŋgar toni iyaryaaŋ kat ighaze irab motin vaiuuŋ todi, nene ye to ighur ila, irau iyok pani, ve ipuli ila. Ŋgar tovene, le ŋgalsekiiŋ maau. Pasa, Maaron ighaze iit tataghon ŋgar luuma. Ro 12:18, 14:19

Rau Tau Paulus Iboode Pa Yes Roma Rom--Romans 1:21

Pasa, yes tiwatag: Maaron inepneep. Eemoghon tiroron pani maau. Matadi velegini inimale mbeb sorok. Ve lolodi poia pani ve tipaiti pa ŋgar popoia to ye ighamgham padi ne maau. Pasa, mbeb soroksorok to anoŋadi maau, tighamun ŋgar todi le tiwaghamgham. Ŋgar todi ighazooŋ maau inimale tineep ila ndoroom lolo. Mbnp 8:21; Ep 4:17+

1 Korin 10:17

Ve mberet ee moghon to iit tasob taghani, tauto ipatooŋ ghiit ighaze iit tasob tanimale ŋgeu ee moghon anoŋa. Nene Krisi. Yo 6:33+; Ro 12:5; 1Kor 12:13,27

1 Timoti 6:12

Ghurla toit, nene mbeb tau. Tovenen yom irau uparab ariaŋa pani, ve uzuaria ghom le ugham nepooŋ to mataad iyaryaar. Matam iŋgal. Muuŋ, yom umatughez maau, ve uvotia ghurla tiom ila ival tiina matadi. Sawa tonenen, Maaron ipoi ghom pa ugham nepooŋ tonenen. 1Kor 9:25+; 1Tim 1:18; 2Tim 4:7