1 Yoan 3:20 - Mutu (Oov)

²⁰ Onoon, sawa pida, tayamaan tauud taghaze taneep deŋiaad ila Maaron mata maau. Eemoghon poia to Maaron, nene tiina kat ve ŋgar toni ilib pa ŋgar toit. Ighaze mataad kisin mbeb ru tonene, nene pale ipalot ghiit, leso tamatughez pa tayoon ila Maaron mata sob.

Maaron Saveeŋ Tooni Patabuyaaŋ Tuam

²⁰ Onoon, saawe siriv, tayamaan ila loloon taghe taduduuŋ ila Maaron maata mako. Eemon poia to Maaron, ene tiina kat, ve ŋgar tooni iliiv ŋgar toit. Isaav ighe mataan kisin gabua ru tane, ene pale ipalot ghiit, leso taroi pa yozeeŋ ila Maaron naagho sov.

1 Yoan 3:20 Referans Kwoze

Hibru 4:13

Maaron, ye mata mala. Mbeb to ye ighur di, eta iyooŋ pani maau. Mbeb ŋgozaaŋ tisob tineep tighazooŋ ila mata. Ve iit tasob pale tayoon ila ye mata, leso tavotia ŋgar to tagham di ne ila toni, ve iŋgabiiz ghiit. Mbo 33:13+, 139:1+; 2Kor 5:10

1 Korin 4:4

Onoon, matag iŋgal naghaze uraat tiou, nagham sosor eta maau. Eemoghon irau nanumeer sorok naghaze ŋgar tiou isob deŋia ne maau. Naneep ve nasaŋan gabizooŋ to Tiina toit to muri pale ivot. Ghoro ye tau iŋgabiiz ghou. Mbaŋ 23:1; 1Kor 3:13; 2Kor 10:18

1 Yoan 4:4

Eemoghon ndinatug, yam Maaron tamtoghon toni. Ve yam atatan ndiran kaaromŋa tonowen ve alib padi wa. Pasa, Maaron Avuvu to inepneep ila lolomim ne, tapiri ilib pa ye to ipapazaagh tamtoghon ve titaghon ŋgar to taan. Yo 16:33; 1Yo 5:4+

Yoan 21:17

Ghoro Yesu ighasoni muul inim pae tol ighaze: “Simon, Yoan natu, yom lolom payou, ma maau?” Petrus ilooŋ Yesu igham ghasoniiŋ tonenen pani inim pae tol, le lolo ipataŋan. Tovenen ipamuul aliŋa ighaze: “Vee! Tiina, yom uwatag mbeb to naol ne. Yom uwatag, you lolog payom.” Yesu isaav pani ighaze: “Upan sipsip tiou. Lu 22:61+

Saveeŋ Yoŋgaaŋ 2:23

Ve Yezebel ndinatu paam, you pale narab di tisob timatmaat. Leso lupuuŋ to Krisi tisob tiwatag tighaze you natirtiir tamtoghon lolodi ve ŋgar todi. Ve you pale naghur atia iŋarua yam eŋaeŋa itaghon ŋgar tiam tiam. Mbo 7:9; Ro 2:6; 2Kor 5:10; Syg 20:12+

Yoan 8:9

Yes tilooŋ saveeŋ toni, ve eŋaeŋa tipaspas ve tiwaghaughau. Ndolman timuuŋ, ve yes papaghudi titaghon di, ve tisob tighau tila. Tovenen liva tonenen eŋgeni moghon iyondyood ila Yesu nagho.

Hibru 6:13

Sawa to Maaron imbua saveeŋ toman Abaram, ye iwaat tau iza pa saveeŋ mbuaaŋ toni leso ipariaaŋa. Pasa, tamtoghon eta iza ilib pa Maaron maau. Tauto iwaat tau iza pa saveeŋ tonowen, leso ipariaaŋa le iyaryaaŋ kat ighaze:

Uraat To Yes Mbaŋooŋa 5:33

Yes to tineep ila lupuuŋ tonowen, tilooŋ saveeŋ tonene, le ipas atedi ve tighaze tirab di timaat pataghaaŋ.

Rau Tau Paulus Iboode Pa Yes Roma Rom--Romans 8:34

Ve sei pale ighur atia pait pa sosor toit? Maau. Pasa, Yesu Krisi imaat pa sosor toit, ve Maaron ipamundigini pa mateeŋ wa. Ve aazne, ye inepneep ila Maaron nima waan, ve suŋuuŋ toni iŋaŋarua Tama pait. Mbo 110:1; Ro 8:1; Hib 7:24+; 1Yo 2:1

1 Yoan 3:19

Tovenen iit lolood pa tamtoghon ve tagham poian di. Leso tawatag taghaze iit tataghon saveeŋ onoon. Ve sawa to tayoon ila Maaron mata, iit pale lolood poia. Irau tamatughez ma mayaad ne maau.

1 Yoan 3:21

Yam ndiran tiou, lolog payam kat. Ighaze tayamaan tauud taghaze leed sosor eta ila Maaron mata maau, nene pale tamatughez pa tayoon ila mata maau. Ro 5:1; Hib 4:16, 10:22