Yoan 18:37 - Maaron Saveeŋ Tooni Patabuyaaŋ Tuam

³⁷ Piladus ilooŋ saveeŋ tooni, ve ighasoni muul ighe: “Ighe tauvene, na yo aat kinik taa?” Yesu iyol aliiŋa ighe: “Ene onoon. Saveeŋ tauta taum usavia na. Eemon yau kinik imin yo ugham ŋgar pani ne mako. Yau nazilam taan to napariaaŋ tamtamon to tighur ila saveeŋ onoon. Tinaŋ ipoop ghau pa puughu tane. Tauvene tamtamon tisov tau lolozi pa taghoniiŋ saveeŋ onoon, ene aat tilooŋ aliŋag ve titaghoni.” Yo 8:47

Mutu (Oov)

³⁷ Piladus ilooŋ saveeŋ toni, ve ighasoni muul ighaze: “Ighaze venen, yom kinik tou?” Yesu ipamuul aliŋa ighaze: “Saveeŋ tauto taum usavia ne. [Eemoghon you kinik inimale yom ugham ŋgar pani ne maau.] You nazi nanim taan pa napariaaŋ tamtoghon leso tighur ila saveeŋ onoon. Tinaŋ ipoop ghou pa pughu tonene. Tovenen tamtoghon tisob to tighaze titaghon saveeŋ onoon, nene pale tilooŋ aliŋag ve titaghoni.” Yo 8:47

Yoan 18:37 Referans Kwoze

Yoan 8:47

Sei tau ighe imin Maaron le, ene iloŋlooŋ Maaron aliiŋa ve itaghoni. Eemon yam tamtamon to Maaron mako. Tauta alooŋ aliiŋa mako.” Yo 10:26+, 18:37; 1Yo 4:6

1 Yoan 4:6

Eemon iit to Maaron. Tauvene isaav ighe tamtamon eta iwatagh Maaron, i aat ilooŋ aliŋamai. Ve yes tau tiwataghi mako na, tilooŋ aliŋamai mako. Ene eez to taghilaal tamtamon ve tawatagh: Yes titaghon pooz to Maaron Avuvu tau isasavia saveeŋ onoon, ma titaghon pooz to avuvu karom tau ipapaghau tamtamon pa eez to Maaron? Yo 8:47, 10:26+

Yoan 8:14

Yesu iyol aliŋazi ighe: “Onoon, yau nasavia taug ve napariaaŋ taug saveeŋ tsiau, leso tamtamon tighur ilam tsiau. Ve saveeŋ tsiau, ene onoon. Yam irau aghur ila. Pasaa, yau nawatagh nugh tau naleep pani gha nalam ne, ve aat namuul nala pani. Eemon yam awatagh nugh tawe mako. Yo 5:31+, 7:28+, 9:29

1 Yoan 3:19

Tauvene iit aat loloon pa tamtamon ve tagham poghani zi. Leso tawatagh taghe iit tataghon saveeŋ onoon. Ve saawe tau tayooz ila Maaron naagho, iit pale loloon poia. Irau taroi ma mayaan ne mako.

Yoan 14:6

Yesu iyol aliiŋa ighe: “Yau taug ta eez. Yau natotoi katin gham pa Maaron ve saveeŋ tooni onoon, ve namin puughu pa lepoogh maata yaryaare. Eez eemon to tamtamon titaghoni ve tila pa Tamaŋ, ene yau. Ite paam mako. Yo 10:9, Yo 11:25; Ep 2:18; Hib 10:19+

Yoan 7:17

Isaav ighe tamtamon eta ighe itaghon Maaron loolo, i aat ighilaal: Saveeŋ tau yau napaduduuŋ gham pani ne, ene ilam pa Maaron, ma nasavia itaghon taug ŋgar tsiau?

1 Petrus 1:22

Aazne, yam aghur ila saveeŋ onoon to vaaru poia ve ataghoni, tauta aŋgalaaŋ ila Maaron maata wa. Tauvene lolomim igheen to toŋvetaz tsiam to Krisi ve aghamgham poghani zi. Eemon yam aat azuari gham le aghur lolomim pazi kat. Yo 13:34+; Ro 12:9+; 1Tim 1:5; 1Yo 3:18

1 Timoti 6:13

Maaron, i imin puughu pa gabua naol isov tau tileep matazi yaryaare. Ve Yesu Krisi, i iroi mako, ve ivotia tauu ighazooŋ ila Pontius Piladus naagho. Yau avog iyaryaaŋ payo ila yesuru matazi tauvene: Ugham ŋgar saghati eta tau irau igham tamtamon tiyau avozi pa lupuuŋ to Krisi sov. Tutuuŋ tau nasavia payo ne, matam kisini ve utaghon duduŋaini lee irau saawe tau Tiina toit Yesu Krisi imuul ilam, ve itotoi tauu ivot ighazooŋ.

Lukas 23:3

Tauvene Piladus ighason Yesu ighe: “Mindai, yo tane, kinik to yes Yuda?” Yesu iyol aliiŋa ighe: “Saveeŋ tauta taum usavia na.” Yo 18:36

Markus 15:2

Piladus ighason Yesu ighe: “Mindai, yo tane kinik to yes Yuda?” Yesu iyol aliiŋa ighe: “Saveeŋ tauta taum usavia na.” Yo 18:36-37.

1 Yoan 5:20

Ve iit tawatagh: Maaron Naatu izilam taan, ve ipaghazoŋai ŋgar toit, leso tawatagh katin Maaron tauu. Tauta aazne, iit taleep ila to Maaron tauu ve Naatu Yesu Krisi, ve itiŋa tavalupu ghiit tamin eemon. Yesu Krisi, i Maaron tauu. Ve i ta imin puughu pa lepoogh maata yaryaare. Yo 17:3

Yoan 3:32

Gabua tau ŋeer to sambam tawe ighita ve ilooŋa, tauta isavia. Eemon tamtamon tighur ila saveeŋ tooni mako. Yo 1:10+, 3:11, 12:37+

Matayu 26:64

Yesu iyol aliiŋa ighe: “Saveeŋ tauta yo usavia na. Ve yau nasaav ghazooŋa payam tauvene: Murei, yam pale aghita: Tamtamon Naatu ileep ila niia to ghamuuŋ pooz tau igheen ila Maaron saksaki niima tapir. Ve i pale ileep ila taitai to sambam, ve imuul izilam.” Mbo 110:1; Dan 7:13; Mt 24:30

Matayu 27:11

Yes Yuda tigham Yesu ila, ve tipayooze ila Piladus tau gavana to Yudea na naagho, ra Piladus ighasoni ighe: “Mindai, yo kinik to yes Yuda?” Yesu iyol aliiŋa ighe: “Saveeŋ tauta taum usavia na.” Yoan 18:36-37.

Saveeŋ Yoŋgaaŋ 3:14

“Aŋela tau iŋgin lupuuŋ tsiau tau tileep izi nugh Laodisia na, ubood saveeŋ ila pani tauvene: ‘Ene saveeŋ to ŋeer tau ighe: “Onoon” pa saveeŋ mbuaaŋ naol isov to Maaron, ve igham anoŋazi ivot ila uraat tooni. I iyooz ariaaŋ ve ipariaaŋ saveeŋ onoon toman loolo eemon. Ve i imin puughu pa gabua naol isov tau Maaron ighur zi na. Aliiŋa ilat payo ighe: Yo 1:3+; 2Kor 1:20; Kol 1:15+

Saveeŋ Yoŋgaaŋ 1:4

Yau Yoan. Nabood rau tane ilat pa yam lupuuŋ liim ve ru to Krisi tau aleep izi taan sirivu to Asia na. Maaron toit, i ileep irau saawe. Ileep muuŋ geeg, ileep aazne, ve murei, i pale ilam. I tauu, tomania Yesu Krisi, ve Avuvu liim ve ru tau tileep ila Maaron naagho igharau niia to ghamuuŋ pooz na, poia toozi pale izaa tsiam, ve tiŋgin gham aleep poia toman lolomim luuma. Onoon.

1 Yoan 3:14

Iit tawatagh: Iit tapul eez to mateegh wa. Ve aazne, tataghon eez to Maaron, tauta tagham lepoogh poia ila tooni. Pasaa, loloon igheen to yes toŋvetaz to Krisi ve taghamgham poghani zi. Ve isaav ighe tamtamon eta loolo igheen to yes toŋvetaz to Krisi mako, ene i itaghon eez to mateegh.

Lukas 22:70

Yes tilooŋ saveeŋ tane, ve tisov tilup avozi ve tighasoni muul tighe: “Mindai, yo ughe yo Maaron Naatu?” Yesu iyol aliŋazi ighe: “Saveeŋ tauta taumim asavia na.”

Markus 14:62

Yesu iyol aliiŋa ighe: “Vee! Taug tane. Ve murei, yam pale aghita: ‘Tamtamon Naatu ileep ila niia to ghamuuŋ pooz tau igheen ila Maaron saksaki niima tapir. Ve i pale ileep ila taitai to sambam, ve imuul izilam.’ ” Mbo 110:1; Dan 7:13; Syg 1:7

Yoan 1:14

Aghita. Ŋeer tau ipaghazoŋai saveeŋ onoon ve ŋgar to Maaron pait, tauta imin tamtamon ve ilam gha ileep ila sosoon. I itotoi Maaron tapiri ve poia tooni ivot ighazooŋ, ve yei nighita pa matamai. Tauta nighilaalo nighe i Maaron tauu Naatu eemon tau ileep to Taama Maaron ve ilam. Poia to Maaron tomania ŋgar tooni tau isasavia saveeŋ onoon mon, ene ivon ila to Naatu tawe. Pil 2:6+; Kol 2:9; 1Tim 3:16; Hib 2:14; 1Yo 1:1+

Yoan 1:17

Onoon, Maaron ivotia tutuuŋ tooni pait ila Mose aavo. Eemon Yesu Krisi, tauta imin eez pa poia to Maaron izaa toit, ve ipaghazoŋai ghiit pa saveeŋ onoon.

Yoan 8:45

Saveeŋ isov tau yau nasasavia payam, ene onoon mon. Eemon yam lolomim pa saveeŋ onoon mako, tauta aghur ila saveeŋ tsiau mako.

Yoan 8:46

Ma mindai? Isaav ighe tsiam eta ighit ghau nagham sosor eta, na ivotia lak! Ve isaav ighe leg sosor eta mako, ve nasasavia saveeŋ onoon mon payam, mindai ta aghur ila saveeŋ tsiau mako? Hib 4:15; 1Pe 2:22; 1Yo 3:5

1 Yoan 2:21

Yau naghe yam akankaan pa saveeŋ onoon, ta nabood rau tane ilat ne mako. Saveeŋ onoon, yam awataghi wa. Ve yam awatagh: Saveeŋ onoon irau imin puughu pa karom eta mako. Puughu tane ta nabood rau tane ilat payam.