Titus 2:11 - Maaron Saveeŋ Tooni Patabuyaaŋ Tuam

¹¹ Iit tamtamon to Krisi irau tataghon ŋgar tauvene pasaa, Maaron itotoi poia tooni ivot ighazooŋ pa tamtamon tisov wa. Tauta aazne, iit leen eez to Maaron igham mulin ghiit ve taleep poi. 1Tim 2:4; Tit 3:4+;

Mutu (Oov)

¹¹ Iit tamtoghon to Krisi irau tataghon ŋgar tovene pasa, Maaron ipatooŋ poia toni ivot ighazooŋ pa tamtoghon tisob wa. Tauto aazne, leed ataam pa Maaron igham mulin ghiit ve taneep pooi. 1Tim 2:4; Tit 3:4+

Titus 2:11 Referans Kwoze

1 Timoti 2:4

Pasaa, i ighe igham mulin tamtamon tisov, ve igham zi tiwatagh katin saveeŋ onoon. Yo 3:16+; 1Tim 4:10

Epesus 2:8

Tauvene yam tau aghur ila to Krisi na, Maaron igham mulin gham itaghon tauu loolo ve poia tooni. Gabua tana ivot itaghon ŋgar poia eta tau yam aghamu ne mako. Ene Maaron igham payam sorok. Ro 3:24-28; Ga 2:16

Hibru 2:9

Eemon Yesu, o iit taghita. I iparav ariaaŋ le iliiv. Tauta aazne, Maaron ipakuru, ve igham eeza ivot imin tiina kat. Saawe tuuku tau Yesu ileep izi taan, Maaron itatan eeza ve ighuru izi rig pa yes aŋela. Pasaa, i ighe igham poghani ghiit ve igham mulin ghiit pa mateegh. Tauta Yesu igham iit tasov niaan, ve igham yavyavuuŋ tiina, ve imaat. Pil 2:7+; 1Yo 2:2; Syg 5:9

2 Tesalonika 2:16

Tamaan Maaron loolo igheen toit kat, ve poia tooni ipapalot ghiit. Tauta loloon poia irau saawe, ve taghurghur mataan pa lepoogh poia tomania Maaron izi nugh tooni sambam. Yesuru Tiina toit Yesu Krisi pale tirav atemim, ve tipalot gham. Leso ataghon ŋgar popoia maata maata, ve asavia saveeŋ popoia mon. Onoon. 1Tes 3:13; 1Pe 5:10

Rau Tau Paulus Iboode Pa Yes Roma Rom--Romans 5:15

Pasaa, Adam, i ŋeer eemon. Ve saawe tau izoor Maaron aliiŋa ve igham sosor, ene imin puughu pa mateegh igham tamtamon tisov. Yesu Krisi tauvene paam. I ŋeer eemon. Ve ila uraat tooni, poia tiina to Maaron izaa to eval tiina sorok, ve ireu sosor toozi. Tauvene poia tau Maaron itotoia pait, ve pataŋani tau ivot ila sosor to Adam, ene raratezi mako. Pasaa, sosor eemon geeg to Adam, ta ivaghamunia iit tasov, ve imin puughu pa Maaron ighur atuya pait. Eemon tamtamon tigham sosor katini ilam ilam le saawe to Yesu, ra Maaron igham poghani ghiit sorok itaghon tauu poia tooni, ve igham ghiit taduduuŋ ila i maata.

Yoan 1:14

Aghita. Ŋeer tau ipaghazoŋai saveeŋ onoon ve ŋgar to Maaron pait, tauta imin tamtamon ve ilam gha ileep ila sosoon. I itotoi Maaron tapiri ve poia tooni ivot ighazooŋ, ve yei nighita pa matamai. Tauta nighilaalo nighe i Maaron tauu Naatu eemon tau ileep to Taama Maaron ve ilam. Poia to Maaron tomania ŋgar tooni tau isasavia saveeŋ onoon mon, ene ivon ila to Naatu tawe. Pil 2:6+; Kol 2:9; 1Tim 3:16; Hib 2:14; 1Yo 1:1+

Uraat To Yes Mbaŋooŋa 11:23

Ila ivot toozi, ve ighita poia to Maaron tau igheen tomani zi na, le ighamu loolo poia kat. Ve ipalot zi ighe lolozi isaghav Tiina toit ve tikisi ariaaŋ taghon gha ila.

Uraat To Yes Mbaŋooŋa 20:24

Ve yau naghita naghe lepoghag to taan, ene gabua tiina mako. Isaav ighe tirav ghau namaat, ene kaut sorok. Eemon yau aat nataghon duduŋai eez tau Tiina toit Yesu Krisi ighuru payau na le napasovu. Ve uraat tau i tauu ighuru ila nimag na paam, naghe napasovu le isov kat. Uraat tauvene: Yau aat nayooz ariaaŋ ve napariaaŋ saveeŋ to vaaru poia. Leso tamtamon tiwatagh eez tau poia to Maaron izazaa to iit tamtamon sasaghatiin. 2Kor 4:1; Ga 1:1; Pil 1:20; 2Tim 4:7; Syg 12:11

Lukas 3:6

Leso tamtamon tisov to taan tighit katin uraat tau Maaron pale ighamu leso igham mulin zi.” Mbo 98:2; Is 40:3-5, 52:10

1 Timoti 1:14

I ighur poia tooni tiina kat izaa tsiau, ve igham ghau napaak ila tooni. Tauta aazne, naghur ila tooni, ve lolog igheen tooni, ve lolog pa tamtamon paam. Mbaŋ 8:3, 9:1+; 1Kor 15:9+

Rau Tau Paulus Iboode Pa Yes Roma Rom--Romans 5:2

Krisi ndaamo pait, tauta iit tau taghur ila tooni ne, irau tala tagharau Maaron, ve taleep ila poia tooni loolo. Ve loloon poia ve tintiniin pasaa, iit taghurghur mataan pa saawe to i igham ghiit tala taleep tomania ila mbonari loolo izi nugh sambam. Ep 2:17, 3:12; Hib 10:19

Kolosi 1:6

Saveeŋ to vaaru poia tau ilat peria tsiam na, ighurghur anooŋa popoia maata maata ivotvot irau nugh naol isov, raraate imin tau ivotvot payam. Saawe imin maata tau yam alooŋ poia to Maaron saveeŋa gha aghazooŋ pani, ve ilam aazne, vaaru poia ighurghur anooŋa popoia ivotvot ila yam sosomim. Yo 15:5

Galesia 2:21

Poia to Maaron tau izazaa toit ila uraat to Yesu Krisi na, irau matag veleghini imin kaut sorok ne mako. Isaav ighe ŋgar to taghoniiŋ tutuuŋ irau igham ghiit taduduuŋ ila Maaron maata, ene Krisi imaat sorok. Hib 7:11

2 Korin 6:1

Yeŋa Maaron niluplup ghei pa uraat tooni. Tauvene nighe nipalot gham tauvene: Poia to Maaron tau izaa tsiam na, aat ipaburigin gham pa taghoniiŋ Maaron ŋgar tooni. Leso poia tooni tana ighur anooŋa. Ighe mako, ene pale imin kaut sorok. 2Kor 1:24, 5:20; Hib 12:15

Uraat To Yes Mbaŋooŋa 13:47

Pasaa, Ŋeer Tiina aavo iyaryaaŋ payei ighe: ‘Yau naghur ghom umin ghazooŋa pa yes nugh nugh tau Yuda mako na. Naghe ulandoov saveeŋ tsiau ila pa tamtamon irau taan ziige ta naol ne, leso tiwatagh eez to nagham mulin zi.’ ” Is 42:6, 49:6; Lu 2:32

Uraat To Yes Mbaŋooŋa 13:43

Lupuuŋ toozi isov gha tamtamon tighawaar, ve eval tiina titaghon Banabas yesuru Paulus gha yesŋa tila. Siriv, yes Yuda duduuŋ. Ve siriv, ene yes tau titoor zi timin Yuda ve titaghon eez to Maaron. Yesuru tisavsaav tomani zi, ve tipalot zi tighe lolozi isaghav Maaron ve tiyooz tuŋia ila poia tooni. Mbaŋ 11:23, 14:22

Yoan 1:9

Tauvene ghazooŋa tauu, ta isul tamtamon tisov ve ipaghazoŋai zi pa Maaron, tauta izilam taan. Yo 8:12, 9:5; 2Kor 4:6

Lukas 24:47

Mako tivotia saveeŋ pa tamtamon ila i eeza tighe: Yes aat titoor ŋgar toozi ila pa Maaron, ve tipul ŋgar toozi sasaghati ileple, ve tighur ila to Mesia. Leso i ndaamo pazi, ve Maaron ireu sosor toozi. Uraat tane, yam aat apaburigini izi Yerusalem imin maata, mako aseeŋga ila le irau nughmariŋ. Mt 28:19

Markus 16:15

Ve Yesu isaav pazi ighe: “Ala arau nughmariŋ, ve avotia vaaru poia pa tamtamon tisov to taan. Mt 28:19; Mbaŋ 1:8; Kol 1:23

Matayu 28:19

Tauvene yam ala arau nugh naol isov, ve agham tamtamon tisov timin ziŋerag ve titaghon ŋgar tsiau. Arughuuz zi ila Maaron eeza, Taama, Naatu ve Avuvu Patabuyaaŋ. Ve tutuuŋ naol isov tau yau nasavi zi payam na, apaghazoŋai zi pazi. Leso matazi kisin zi ve titaghon zi. Ve alooŋ. Yau aat naleep tomani gham irau saawe, le ila taan saawe.” Yo 14:23; Mbaŋ 1:8

Hibru 12:15

Matamim imomoos poi pa taumim. Mako pale ŋgar saghati izeev tsiam eta, ve ighur muuri pa Maaron ve poia tooni. Tamtamon tauvene, i imin waar waraman tau itum izaa ila sosomim. I pale ivaghamunia tamtamon katini, ve igham zi tisaghat ila Maaron maata. Lo 29:18; 2Kor 6:1; Hib 3:12

2 Timoti 4:17

Onoon, yau zigau. Eemon Maaron ileep tomani ghau ve ipalot ghau. Tauta navotia katin vaaru poia pa yes tau Yuda mako na, gha tisov tilooŋa. Saawe tana, naghe pale namaat. Eemon mako. Maaron iuul ghau, ve ipas ghau navot ila laion aavo.

Kolosi 1:23

Eemon yam aat akis ghuruuŋ ila tsiam ariaaŋ, ve ayooz tuŋia ila to Krisi. Ve ŋgar to saŋaniiŋ lepoogh poia tau Maaron ighe igham pait na, gabua eta igham gherev payam ve apuli sov. Vaaru poia tau tisavia payam gha alooŋa na, isavia lepoogh tawe, ve tivotia irau nugh naol isov tau tighenaar ila sambam saamba na. Ve yau paam, Krisi ighur ghau namin besooŋa pani. Mk 16:15; Kol 1:6, 2:7

Rau Tau Paulus Iboode Pa Yes Roma Rom--Romans 10:18

Ighe tauvene, pale tasaav mindai pa yes Israela? Tilooŋ vaaru poia soone? Mako. Yes tilooŋa wa. Pasaa, Maaron aliiŋa isaav ighe: “Aliŋazi ila irau taan isov, ve saveeŋ toozi ilaan irau nughmariŋ.” Mbo 19:4

Uraat To Yes Mbaŋooŋa 17:30

“Muuŋ, tamtamon matazi dodoli, ve tikankaan pa Maaron. Tauta loolo kuruŋia pazi, ve maata ila pa sosor toozi geeg mako. Eemon aazne, i isaav ariaaŋ pa nughmariŋ ighe tipul ŋgar toozi sasaghati ileple, ve titoor ŋgar toozi ila pani. Lu 24:47; Mbaŋ 14:16; Ro 3:25; Tit 2:11+

2 Timoti 1:10

Ve aazne, Uleeŋa toit Yesu Krisi izilam taan, gha ipaghazoŋai poia to Maaron tawe ivot ighazooŋ, ve ipasov mateegh tapiri wa. Vaaru poia ipaghazoŋai ghiit pa eez to tagham lepoogh poia ila to Maaron ve taleep mataan yaryaare le alok. 1Kor 15:54+; Hib 2:14+