Pilipai 2:8 - Maaron Saveeŋ Tooni Patabuyaaŋ Tuam

⁸ Tauvene tamtamon tighita tighe i tamtamon imin iit. Ve i itatan tauu, ve maata loŋloŋai pa Maaron ila ila le imaat. Ve mateegh tooni, poia mako. Pasaa, imaat izala ai pambarooŋ. Mt 26:39; Yo 10:17+; Hib 5:8, 12:2

Mutu (Oov)

⁸ Tovenen tamtoghon tighita tighaze ye tamtoghon inimale iit. Ve ye itatan tau, ve mata loŋloŋaiŋa pa Maaron ila ila le imaat. Ve mateeŋ toni, poia maau. Pasa, imaat izala ai pambarooŋ. Mt 26:39; Yo 10:17+; Hib 5:8, 12:2

Pilipai 2:8 Referans Kwoze

Yoan 10:18

Tamtamon eta to taan irau irav ghau namaat sorok ne mako. Nayoki taug, o irav ghau namaat. Pasaa, yau tapirig irau to nayoki taug gha namaat, ve tapirig irau to naburig matag iyaryaar muul, itaghon saveeŋ tau Tamaŋ isavia payau na.”

Hibru 12:2

Ve mataan ila pa gabua ite paam sov. Mataan ila pa Yesu mon, ve talaan ŋaruini tala. Pasaa, i ta imuuŋ pait ve itotoi ghiit pa eez to ghuruuŋ ila. Ve i ta pale igham uratoi ghiit le ghuruuŋ ila toit ivot le iduduuŋ kat ila Maaron maata. Aghita. I ibaad pataŋani, ve tiravu imaat izala ai pambarooŋ. Eemon i ighita mayaŋa tawe imin kaut sorok. Pasaa, i iwatagh: Isaav ighe itaghon duduŋai Maaron ŋgar tooni, ene pale murei ileep poia toman tintini. Tauta aazne, i ileep ila Taama Maaron niima tapir igharau niia to ghamuuŋ pooz. Pil 2:8+; Hib 1:3, 3:1

1 Petrus 2:24

Saawe tau Krisi ibaad sosor toit atuya izala ai pambarooŋ, i iyamaan yavyavuuŋ tiina kat ila tiini. Leso tasov pa ghamuuŋ ŋgar saghati, ve taleep poia ila tooni, ve tataghon ŋgar duduuŋa mon. Tauvene zibzib niia tau igheen ila Krisi tiini, tauta igharaat gham gha poiamim wa. Is 53:5; Ro 6:10+

1 Petrus 3:18

Agham ŋgar pa Krisi. I ŋeer duduuŋa kat. Eemon i igham iit tamtamon sasaghatiin niaan, ve iyamaan yavyavuuŋ ila tiini gha imaat, leso ireu sosor toit, ve igham ghiit tala to Maaron. Uraat tooni tawe, i ighamu pai eemon, ve isov. Irau ighamu muul mako. Ve Maaron Avuvu ipaburigini pa mateegh, ve aazne i ileep maata yaryaare izi sambam.

2 Korin 8:9

Poia to Tiina toit Yesu Krisi, yam awataghi wa. Muuŋ, i irao pa gabua ta naol ne. Eemon ipuliir gabua tooni tawe tisov tizi tigheen, ve izilam taan gha ileep imin ŋeer mbolaaŋa, leso iuul gham, ve igham gham arau kat pa gabua to Maaron. Mt 8:20; Pil 2:6+

Matayu 26:39

Ra ilaagh ila rig, itap izi ve naagho izila pa taan, ve isuŋ pa Maaron ighe: “O Tamaŋ, isaav ighe yo irau upasalia rubruub tane payau, na ugham tauvene. Eemon utaghon ŋgar tsiau sov. Utaghon taum lolom.” Mt 6:10; Hib 5:7+

Uraat To Yes Mbaŋooŋa 8:33

Tipamayaŋini ve tipayooze pa savsaveeŋ. Eemon gabizooŋ toozi iduduuŋ mako. Sei pale isinai pa paaghu tooni? Mako. Pasaa, lepoogh tooni izi taan, ene tiŋgoora tuuku mon.” Is 53:7+

Titus 2:14

Yesu Krisi igham niaan gha imaat, leso ireu sosor toit isov ilale, ve ipas ghiit tavot pa saghati tapiri, ve igham ghiit taŋgalaaŋ ila Maaron maata. I igham tauvene, leso tamin i tauu le, ve tazuari ghiit pa ghamuuŋ uraat ve ŋgar popoia maata maata. Ga 1:4; Ep 2:10; 1Pe 2:9

Galesia 3:13

Tauvene eez to taghoniiŋ tutuuŋ, ene igham pataŋani pait. Pa ighe tataghon duduŋai tutuuŋ mako, ene pale aatyavyav to Maaron izaa toit ve ivaghamun ghiit. Eemon Yesu igham niaan gha ibaad aatyavyav to Maaron izala ai pambarooŋ. Tauta igham mulin ghiit pa pataŋani tawe. Saveeŋa igheen pataghaaŋ wa: “Ŋeer tau ighe tiravu ve ituuk ila ai, ene aatyavyav to Maaron igheen izaa tooni.” Lo 21:23; Ro 8:3; 2Kor 5:21

Yoan 14:31

Eemon yau aat nataghon duduŋai saveeŋ isov tau Tamaŋ ighuru payau na, ve pataŋani ivot payau itaghon ŋgar tooni. Leso tamtamon to taan tiwatagh tighe yau lolog igheen to Tamaŋ. Aiyo, aburig gha tapul nugh tane, ve tala.” Yo 10:18; Pil 2:8; Hib 5:8

Yoan 15:10

Isaav ighe matamim kisin tutuuŋ tsiau ve ataghon zi, ene aat awatagh kat aghe yau lolog igheen tsiam, ve aleep iloŋ ila ŋgar tsiau tane irau saawe. Imin yau. Matag kisin Tamaŋ tutuuŋ tooni ta naol ne, ve nataghon zi. Tauta nawatagh naghe i loolo igheen tsiau, ve naleep iloŋ ila ŋgar tooni tana irau saawe. 1Yo 5:3

Matayu 26:42

Yesu isavsaav pazi le isov, ra ipul zi, ve ila isuŋ muul imin pai ru ighe: “Tamaŋ, ighe yo irau upasalia rubruub tane payau mako, ene poia. Yau aat naghamu ve naghun ila. Utaghon taum lolom.”

Matayu 17:2

Tilepleep ta sewe, ve Yesu tiini itoora ila yes tol matazi, le naagho isul toman mbonari tiina kat imin aaz maata. Ve nonoghiiŋa tooni paam, ipisosooŋ kat ve mbonari tiina. Igham 34:29+; Yo 1:14; 2Pe 1:16+

Yoan 4:34

Yesu isaav pazi muul ighe: “Alooŋ. Yau aat nataghon Ŋeer tau imbaaŋ ghau nalam ne loolo, ve naparwai uraat tooni le isov kat. Aniiŋ tsiau, tauta ene. Yo 6:38, 17:4

Lukas 9:29

I isuŋsuŋ, ve naagho itoora, ve nonoghiiŋa tooni paam ipisosooŋ le isul toman mbonari tiina.

Hibru 12:4

Onoon, yam aparav ariaaŋ to atatan saghati tapiri. Eemon tsiam eta siŋ tooni imaliŋ soone.