Pilipai 2:15 - Maaron Saveeŋ Tooni Patabuyaaŋ Tuam

^15-16 Leso lemim sosor mako, ve ŋgar tsiam isov iŋgalaaŋ ve iduduuŋ mon ila Maaron maata, ve aleep imin i natŋa. Eval tiina to taan tau aleep ila sosozi na, laghooŋ toozi iduduuŋ mako, ve titaghon ŋgar sasaghati. Eemon yam akis saveeŋ maata yaryaare, ve azuzuuna ila pazi, tauta atotoi ghazooŋa to Krisi pazi imin pitum tau tiraŋ pa mboŋ. Ighe ataghon ŋgar isov tane, saawe to Krisi imuul ilam, yau pale lolog poia, ve napakur ghau payam. Pasaa, gabuamim pale itotoi ghau ighe yau napul tapirig sorok payam mako. Yau nagham katin uraat tsiau ve anooŋa ivot. Mt 5:14+; Ep 5:1,8; 1Tes 2:19+

Mutu (Oov)

^15-16 Leso lemim sosor eta sob, ve ŋgar tiam isob iŋgalaaŋ ve deŋia moghon ila Maaron mata, ve aneep animale ye ndinatu. Ival tiina to taan to aneep ila lolodi, laghooŋ todi deŋia maau, ve titaghon ŋgar samsamia. Eemoghon yam akis saveeŋ mata yaryaara, ve azuzuuna ila todi, tauto apatooŋ ghazooŋa to Krisi padi animale pitum to tiraŋ pa mboŋ. Ighaze yam ataghon ŋgar naol tonene, sawa to Krisi imuul inim, you pale lolog poia, ve napakur ghou payam. Pasa, gabuamim pale ipatooŋ ghou ighaze you napul tapirig payam sorok maau. You nagham katin uraat tiou ve anoŋa ivot. Mt 5:14+; Ep 5:1,8; 1Tes 2:19+

Pilipai 2:15 Referans Kwoze

1 Petrus 2:12

Yam aat agham ŋgar duduuŋa mon ila yes tau tiwatagh Maaron mako na matazi. Onoon, aazne, tiŋgal saveeŋ naol payam tighe yam zeran to ghamuuŋ ŋgar saghati. Eemon isaav ighe tighit gham ataghon ŋgar poia, ene pale igham zi titoor ŋgar toozi. Leso saawe tau Maaron ilam ve ighur atuya pa tamtamon, yes paam pale tipait eeza pa tapiri ve poia tooni. Mt 5:16; Ro 12:17; 2Kor 8:21; Pil 2:15

Matayu 5:45

Leso ataghon ŋgar to Tamamim Maaron tau ileep sambam. Pasaa, i itotoi poia tooni pa tamtamon tisov. Igham aaz tooni ighaaz pa zeran popoiazi, ve yes tau sasaghatizi paam. Ve igham uman izizi pa zeran duduŋazi, ve yes tau ŋgar toozi iduduuŋ mako na paam. Ep 5:1

1 Tesalonika 5:23

Maaron toit, i ŋgar luuma puughu, ve iŋgin ghiit taleep poia irau saawe. I tauu aat igham gham ataghon ŋgar patabuyaaŋ mon. Ve iŋgin anunumim, lolomim ve ŋgar tsiam, tomania anoŋamim, ve igham gham ataghon ŋgar poia mon le irau muleeŋ to Tiina toit Yesu Krisi. Leso lemim sosor eta ila i maata sov. Ro 15:33; 1Kor 1:8+; 1Tes 3:13; 2Tes 3:16

2 Petrus 3:14

Tauvene zeran tsiau, saawe tau aleep ve asasaŋan saawe to gabua tana ivot, yam azuari gham le ŋgar tsiam isov iŋgalaaŋ mon. Leso lemim sosor eta ila Maaron maata mako, ve yamŋa Maaron avalupu gham amin eemon ve aleep poia. Pil 1:10; 1Tes 3:13, 5:23

1 Korin 1:8

Maaron tauu pale ipalot gham, ve igham gham ayooz ariaaŋ le azaa pa saawe tau i ighuru payam na. Leso saawe tau Tiina toit Yesu Krisi imuul ilam, i aat ighit gham ighe lemim sosor eta mako.

Titus 2:10

ve nimazi kauia pa gabua eta to daaba toozi sov. Yes aat titaghon duduŋai ŋgar to daaba toozi ve matazi izaa pa uraat toozi. Leso daaba toozi irau tinumeer zi. Ŋgar tauvene pale igham tamtamon tighilaal tighe Maaron tau Uleeŋa toit na, saveeŋ tooni, ene gabua paghuuna. Mt 5:16; Pil 2:15

1 Petrus 2:9

Eemon yam, Maaron isiigh gham amin le, ve igham gham amin lupuuŋ eemon wa. Yam zeran to watooŋrau tau tibees pa kinik tiina. Ve yam tamtamon patabuyaaŋa to Maaron. I ipoi gham gha apul ŋgar to ndoroom, ve aloŋ ala ghazooŋa tooni loolo, leso avotia ŋgar popoia maata maata tau i ighamgham payam na. Ghazooŋa tawe, paghuuna le paghuuna kat. Ighe tagham ŋgar pani, ene aat ŋgar toit imbool. Igham 19:5+; Kol 1:13; Syg 5:10

Matayu 5:48

Tauvene yam aat azuari gham le ŋgar tsiam isov iduduuŋ ve poia mon imin Tamamim Maaron tau ileep sambam.” Yems 1:4

1 Timoti 3:10

Tauvene yam aghur sorokin tamtamon timin uraata pa lupuuŋ to Krisi sov. Aghita yes tau lezi sosor eta mako, ve atoov zi le ighe tirao, o aghur zi. 1Tim 5:22

1 Timoti 3:2

Tamtamon tau ighe imuuŋ pa uraat to ŋginiiŋ lupuuŋ to Krisi na, laghooŋ tooni isov irau iduduuŋ mon, leso tamtamon tiyau avozi pani sov. Tauvene maata ila pa livaa ite paam sov. I aat maata kisin tauu azaawa mon. Ve irau loolo ipazaagha rekrekia mako. Isaav ighe loolo ighur pa ghamuuŋ gabua eta, i aat aate imaat ve igabiiz poi. Le isov, o ighamu. Ve vaaru isaghat sov. I aat iŋgin tauu poi, ve ighamgham yes loomba. Ve i aat le ŋgar pa uraat to paduduŋaaŋ tamtamon pa Maaron aliiŋa. Tit 1:6+

Pilipai 1:10

ve aghilaal saa ŋgar tau poia kat to ataghoni. Ve naghe Yesu Krisi ipaburigin gham, leso ghuruuŋ ila tsiam ighur anooŋa ve ataghon ŋgar duduuŋa. Ighe agham tauvene, yam aat apaghazoŋai tamtamon pa Maaron tapiri ve poia tooni, ve tipait eeza. Ve saawe tau Yesu Krisi imuul ilam, yam lemim sosor eta mako, ve ŋgar tsiam isov iŋgalaaŋ mon ila Maaron maata. 1Kor 1:8; Kol 1:10; 2Pe 3:14

Epesus 5:27

Pasaa, i ighe lupuuŋ tooni ivot kat [imin livaa tau ighe ivai ve igharaat ghi le paghuuna kat]. Leso saawe to Mboŋ Murei, i igham iit tau taleep ila lupuuŋ tooni ne, ve itiŋa tavalupu ghiit tamin eemon, ve iit popoiaan ila i maata. Leen sosor eta mako, ve ŋgar saghati eta igheen toit muul mako, ve tataghon ŋgar patabuyaaŋ mon. 2Kor 11:2; Kol 1:22; Tit 3:5; Hib 10:22

Rau Tau Paulus Iboode Pa Yes Roma Rom--Romans 16:19

Yam, tipaesia varumim irau nugh tighe ataghon duduŋai Krisi saveeŋ tooni. Tauta agham ghau lolog poia kat. Ve naghe ŋgar saghati eta igheen tomani gham sov. Ve ŋgar popoia, o aghilaalo ve akisi. Mt 10:16; Ro 1:8; 1Kor 14:20

Uraat To Yes Mbaŋooŋa 2:40

Petrus isavia saveeŋ tane mon mako. I isaav ariaaŋ pazi pa saveeŋ siriv siriv paam. Pa ighe igham zi titoor ŋgar toozi ila pa Maaron. Tauvene isaav pazi ighe: “Ataŋ rarai Maaron, leso igham mulin gham! Mako pale alalemim tomania zeran sasaghati tau tileep pa saawe tane.” Ga 1:4

Matayu 10:16

“Alooŋ. Yau nambaaŋ gham ala amin sipsip tau tileep ila ŋgavuun sagsag sosozi. Tauvene saawe isov, yam aat agham ŋgar poi itaghon ŋgar to moot. Ve ŋgar saghati eta igheen tsiam sov. Ataghon ŋgar tau iduduuŋ mon ila Maaron maata imin man mbunumoor. Lu 10:3; Ro 16:19

Hibru 7:26

Poia pa iit leen ŋeer to watooŋrau tauvene. I irau iuul ghiit. Pasaa, i imin iit tamtamon sasaghatiin to taan mako. I le sosor eta mako. I patabuyaaŋ, ve ŋgar tooni isov, ene iŋgalaaŋ mon. Taama Maaron ighamu izala nugh sambam, ve aazne eeza iliiv gabua ta naol ne. 2Kor 5:21; Hib 4:14+

Titus 2:15

Saveeŋ tsiau isov tane, yo aat usavia pa tamtamon, ve avom iyaryaaŋ pazi, leso titaghoni. Yes tau tizorzoor saveeŋ na, uvotia sosor toozi ivot ighazooŋ ve uyaon zi, leso tighilaal ve tipuli. Ve tamtamon eta ivelegh ghom pa uraat tsio sov. Pasaa, yo ezam pa uraat tauvene. 2Tim 4:2

Titus 1:6

Ughur tamtamon tauvene: Laghooŋ toozi isov iduduuŋ mon ila tamtamon matazi, leso tiyau avozi pazi sov. Ve matazi kisin tauzi azuwazŋa mon. Ve natuzŋa tighur ila to Yesu Krisi, ve tiŋgin tauzi poi. Tigham taliiŋzizi mako, ve tizoor saveeŋ mako. Leso varuzi poia.

1 Timoti 5:20

Yes ŋginiiŋa tau tinoknok ghamuuŋ sosor na, uvotia sosor toozi ila eval tiina matazi, ve uyaon zi. Leso yes siriv tighita ve tiroi. Ep 5:11; Tit 1:13

Uraat To Yes Mbaŋooŋa 20:30

Ve yam taumim paam, tamtamon tsiam siriv pale tiburig, ve tikau Maaron saveeŋ tooni. Leso tigherev yam tau aazne ataghon Yesu na gha apul saveeŋ onoon ileple, ve ataghon zi pa ŋgar toozi. 1Tim 1:3+, 19+; 1Yo 2:19

Yoan 5:35

Yoan, i imin yaryarooŋa tau ighan ve isul tamtamon. Ve saawe rigmon tau i ileep tomani gham, yam tintinmim ve lolomim poia pa ghazooŋa tooni.

Lukas 6:35

Yam aat ataghon ŋgar ite tauvene: Lolomim pa koiamimŋa, ve agham poghani zi. Agham gabua pazi toman lolomim poia. Ve aghur matamim pazi to tiyat gabua tsiam sov. Leso agham lemim atuya tiina, ve amin Maaron Tiina Tau Iliiv Zimaronŋa Tisov na natŋa. Pasaa, yes zeran sasaghatizi, ve yes tau tighita poia tooni imin kaut sorok ve lolozi iveghveegh pani na, i ighamgham poghani zi paam. Ro 5:8

Matayu 17:17

Yesu isaav pazi imin mbuziriiŋ ighe: “Oyai, yam tamtamon to aazne, aghur ila mako, ve ŋgar tsiam ikaukau kat. Itiŋa takaria lepoogh wa. Tauvene naghe pa ŋgar tsiam ivot ve aghilaal rig. Eemon mako. Monmon yam aghamgham pataŋani payau. Pale ŋeez o namariau? Poia, agham ŋeer marani tana ilam.”

Saveeŋ Yoŋgaaŋ 3:9

Yau nawatagh: Yuda siriv tighamgham pataŋani payo. Zeran tana tigham ezazi sorok tighe yes Yuda. Eemon tigham karom. Pasaa, yes titaghon duduŋai Yuda ŋgar toozi mako. Yes tileep ila Sadan lupuuŋ tooni. Tauvene yau aat nagham zi tilat tiput aghezi ila aghem puughu, ve tipakur ghom. Leso tighilaal tighe yau lolog igheen tsio kat. Is 60:14; Ro 2:28; Syg 2:9

1 Timoti 5:14

Tauvene yau nagham ŋgar naghe yes zinaara paghpaaghu tivai muul, ve tipoop, ve tiŋgin poghania tauzi ruum toozi, o poia. Leso lezi sosor eta ila koiaanŋa matazi sov, ve irau tiyau avozi pait mako. 1Kor 7:9

1 Timoti 5:7

Saveeŋ tsiau tane, yo irau avom iyaryaaŋ pani. Leso laghooŋ to zinaara toit iduduuŋ mon ila tamtamon matazi, ve irau tiyau avozi pazi sov.

2 Korin 6:17

Tauta Maaron isaav muul ighe: “Apul zeran sasaghati tana tileep, ve ala aleep soghan pazi. Ve gabua tau ighe iŋgalaaŋ mako, na agharauu sov. Leso nagham gham toman lolog poia. Wkp 5:2; Is 52:11; Syg 18:4

Lukas 1:6

Yesuru tamtamon duduŋazi. Lezi sosor eta ila Maaron maata mako. Saawe isov, matazi kisin tutuuŋ to Ŋeer Tiina tomania tutuuŋ ŋgara, ve titaghon duduŋaini.

Pilipai 3:6

Muuŋ, yau nazuari ghau naghe le nataghon katin tutuuŋ to yes Yuda. Tauta ipazaagh ghau ve naghur pataŋani naol pa lupuuŋ to Krisi. Tutuuŋ to yes Yuda, yau nasapir pa eta mako. Nataghon zi le tisov. Mbaŋ 8:3, 9:1+; Ga 1:13+

Saveeŋ Yoŋgaaŋ 2:5

Matam iŋgal ŋgar tau muuŋ ughamghamu na. Pa aazne, yo utap tiina. Tauvene utoor ŋgar tsio, ve utaghon ŋgar tau papazoge ughamghamu na. Ighe mako, yau pale nalat ve napas lam tsio aia ighau pa niia. Hib 10:32+