Lukas 2:34 - Maaron Saveeŋ Tooni Patabuyaaŋ Tuam

^34-35 Ra Simeon ighur poia to Maaron izaa toozi, ve isaav pa Yesu tiina Maria ighe: “Ulooŋ. Ŋeer marani tane, Maaron ighuru pa valaghiiŋ tamtamon katini to Israel. Siriv pale tizori ve titap gha tilalez. Ve siriv, i pale igham zi tiburig tiyooz. Pasaa, i pale igham ŋgar tau igheen ila tamtamon lolozi na ivot ighazooŋ. Eemon tamtamon katini pale tizori. Ve ŋgar tau pale ivot pani na, yo pale uyamaana imin mbuzaagh maata iŋgal atem.” Is 8:14; Mt 21:42+; Yo 19:25; Ro 9:32+

Mutu (Oov)

^34-35 Ghoro Simeon ighur poia to Maaron iza todi, ve isaav pa Yesu tina Maria ighaze: “Ulooŋ. Pain tonene, Maaron ighuri pa valagiiŋ tamtoghon katindi to Israel. Pida pale tizuruni ve titap ve tilaledi. Ve pida, ye pale igham di timundig tiyoon. Pasa, ye pale igham ŋgar to ineep ila tamtoghon lolodi ivot ighazooŋ. Eemoghon tamtoghon katindi pale tizuruni. Ve ŋgar to pale ivot pani, nene yom pale uyamaana inimale buza mata iŋgal atem.” Is 8:14; Mt 21:42+; Yo 19:25; Ro 9:32+

Lukas 2:34 Referans Kwoze

1 Korin 1:23

Eemon yei nivovotia saveeŋ pa mateegh to Krisi izala ai pambarooŋ. Saveeŋ tane, saawe tau yes Yuda tilooŋa, tirere pani ve tighur ila mako. Ve saawe tau yes Grika tilooŋa, tiveleghi tighe ene saveeŋ to yes kankanooŋa. Yo 6:60+; 1Kor 2:2,14

1 Petrus 4:14

Tauvene isaav ighe yam avotia Krisi ve ataghon ŋgar tooni, ve tamtamon tisik saveeŋ saghati payam ve tivelegh gham, na tintinmim pa poia to Maaron tau izaa tsiam. Pa saawe tauvene, Maaron Avuvu tau itotoi Maaron tapiri ve poia tooni pait na, pale ileep kat tomani gham. Mt 5:11

Hibru 7:7

Iit tasov tawatagh: Ŋeer tau igham palotiiŋ pa tamtamon, ene i eeza iliiv yes tau tigham palotiiŋ ila tooni na.

Rau Tau Paulus Iboode Pa Yes Roma Rom--Romans 9:32

Pasaa, lolozi pa taghoniiŋ eez to ghuruuŋ ila mako, ve tighe uraat ve ŋgar popoia tau tighamgham zi na, pale igham zi tiduduuŋ ila Maaron maata. Tauta timin tamtamon tau itut aaghe ila maet, ve itap. Lu 2:34; 1Kor 1:23

Uraat To Yes Mbaŋooŋa 6:7

Saawe tana, Maaron saveeŋ tooni ilaan toman tapiri irau nugh nugh. Tauvene Yesu ziŋeera tivot timin eval le eval kat izi Yerusalem. Ve yes zeran to watooŋrau tauvene paam. Tamtamon toozi katini titoor ŋgar toozi, ve tighur ila to Krisi ve titaghon eez tooni. Mbaŋ 12:24, 19:20

Uraat To Yes Mbaŋooŋa 24:5

“Yei nighita ŋeer tane nighe ŋgar tooni poia mako. I imin moroghooŋ saghati. Pasaa, i ipapaburigin parzoraaŋ ve malmal tintiina ila yes Yuda sosozi irau taan naol isov. Yo uwatagh: Yes tau titaghon Yesu to Nasaret na, tipet tauzi tila soghan pa yes Yuda ve tipaburigin lupuuŋ paaghu wa. Tauta yes eval tirere pazi. Ve ŋeer tane, i imuŋmuuŋ pa lupuuŋ toozi. Mbaŋ 16:20, 17:6, 21:28

Uraat To Yes Mbaŋooŋa 17:6

Eemon tiil zi le mako. Tauvene tigham Yason tomania toŋvetaz siriv to Krisi, ve tisasaar zi tila, ve tipayooz zi ila yes daaba to nugh naghozi. Ra tiboob tighe: “Zeran tau Yason igham zi tila tileep ruum tooni na, tilaghlaagh irau taan isov, ve tipapazaagh tamtamon pa ghamuuŋ ŋgar sasaghati naol. Ve aazne, tilam tivot toit wa. Zeran tawe tizorzoor kinik tiina to Rom tutuuŋ tooni. Pasaa, tisavsaav tighe kinik ite ilepleep, eeza Yesu.” Lu 23:2; Yo 19:12; Mbaŋ 16:20

Uraat To Yes Mbaŋooŋa 13:45

Yes Yuda tighita eval tiina kat timeke tila tighe tilooŋ Paulus yesuru Banabas saveeŋ toozi. Tauta ŋuŋuaaŋ tiina ivot pazi, ve tiburig gha yesŋa Paulus tivazorai zi, ve tisik saveeŋ veleghiiŋ naol pani. 1Tes 2:15+

Uraat To Yes Mbaŋooŋa 4:26

Yes kinik to taan tigham aghezi pa malmal. Yes pooza tilup zi, ve tiil eez to tizoor Maaron tomania Mesia tooni ve tighe titatan zi.’ Mbo 2:1+

Yoan 5:18

Saveeŋ tooni tane ireu daaba tana lolozi. Tauvene ŋgar toozi iyaryaaŋ kat tighe le tiravu imaat. Pasaa, tighita tighe i imamalaaŋ pa tutuuŋ to umbom patabuyaaŋ. Ve ŋgarig igham sosor ite paam izala paavo. Pasaa, i isaav ighe i taama Maaron. Tauvene tighita tighe i ipakur tauu ighe i raraate imin Maaron. Yo 10:30,33, 19:7

Yoan 3:20

Tamtamon tisov tau tighamgham ŋgar saghati na, tighurghur koi pa ghazooŋa to Maaron, ve tileep soghan pani. Pasaa, tiroi tighe: Ghazooŋa tooni pale itotoi sosor toozi ivot ighazooŋ.

Matayu 27:63

“Tiina tsiei, yei matamai iŋgal saveeŋ ziiri ee tau aavo karom tawe isavia. Saawe tau ileep maata yaryaare, i isavsaav ighe: ‘Yau aat namaat. Ve mboŋ imin tol, mako naburig muul.’

Matayu 12:46

Yesu isavsaav, ve tiina tomania tazŋa tilam tivot. Yes tiyooz izi muuri, ve timbaaŋ pa Yesu tighe tighita ve yesŋa tisavsaav.

Matayu 11:19

Ve saawe tau Tamtamon Naatu ilam ve igham uraat tooni, i ighanghan ve ighunghun. Eemon i paam, tamtamon lolozi pani mako, ve tighe: ‘Aghita. Ŋeer tawe ipaak yes zeran to ghamuuŋ sosor ve yes tau tiyauyau takes, ve yesŋa tiluplup zi pa ghanghaniiŋ ve ghunghunuuŋ.’ Eemon uraat tau aazne ivotvot itaghon ŋgar to Maaron, ene itotoi ighe ŋgar tooni iduduuŋ mon.” Lu 5:29+, 15:1+

Hibru 7:1

Melkizedek tau nasavia ne, i kinik to nugh Salem, ve i ŋeer to watooŋrau tau ibesbees pa Maaron Tiina Tau Iliiv Zimaronŋa Tisov. Saawe tau Abaram yesŋa kinik siriv tigham malmal le iliiv zi, i imuul ila le izaa to Melkizedek izi eeze. Ra Melkizedek ighur poia to Maaron izaa tooni. Gnp 14:17+

Uraat To Yes Mbaŋooŋa 28:22

Ve poia pa taum ulam peria wa. Leso nilooŋ katin ŋgar tsio ila taum avom. Pasaa, yei niwatagh mon tauvene: Nughmariŋ tiyauyau avozi pa lupuuŋ tsiam paaghu tane tighe ŋgar tsiam siriv isosor.” Mbaŋ 17:6-7, 24:5