Kolosi 2:13 - Maaron Saveeŋ Tooni Patabuyaaŋ Tuam

¹³ Muuŋ, yam amamalaaŋ pa tutuuŋ to Maaron, ve ataghon ŋgar to lolomim muŋgaana. Pasaa, saawe tana, Krisi irav motin ŋgar to lolomim muŋgaana soone. Tauvene lepoogh tsiam, ene imin yes mateegha. Lemim ghilalooŋ pa Maaron mako, ve irau agham ŋgar poia eta mako. Eemon aazne, Maaron ipaburigin gham tomania Krisi, ve agham lepoogh paaghu ila tooni wa. Pasaa, i ireu sosor toit isov ilale. Ro 6:13; Ep 2:1,5,11

Mutu (Oov)

¹³ Muuŋ, yam agham ŋgar naol to tiyel pa tutuuŋ to Maaron, ve ataghon ŋgar to lolomim muŋgina. Pasa, sawa tonenen, Krisi indiir ŋgar to lolomim muŋgina sone. Tovenen nepooŋ tiam, yam animale yes mateeŋa. Lemim ghilalooŋ pa Maaron maau, ve irau agham ŋgar poia eta maau. Eemoghon aazne, Maaron ipamundigin gham toman Krisi, ve agham nepooŋ paghu ila toni. Pasa, ye ireu sosor toit isob ilale wa. Ro 6:13; Ep 2:1,5,11

Kolosi 2:13 Referans Kwoze

Epesus 2:1

Muuŋ, lepoogh tsiam, ene imin yes mateegha. Pasaa, lemim ŋgar eta pa Maaron mako, ve irau agham ŋgar poia eta mako. Saawe isov, yam amamalaaŋ pa tutuuŋ tooni, ve agham ŋgar sasaghati naol. Kol 2:13.

Rau Tau Paulus Iboode Pa Yes Roma Rom--Romans 8:11

Ve isaav ighe Maaron toit tau ipaburigin Yesu Krisi pa mateegh na, Avuvu ileep ila lolomim, i pale ipaburigin gham paam pa mateegh ila Avuvu tawe tapiri, ve aleep matamim yaryaare toman anoŋamim paaghu. Ro 6:5; 1Kor 6:14; 2Kor 4:14

2 Korin 3:6

Tauvene Maaron tauu igham ghei nirao pa uraat tooni. Tauta nimin besooŋa pa eez paaghu to i yesŋa tamtamon tooni tivalupu zi timin eemon. Eez tane, ene eez to taghoniiŋ tutuuŋ tau tiboode na mako. Ene eez to Maaron Avuvu tau itortoor ghiit tamin paaghu. Pasaa, tutuuŋ tau tiboode na, ene igham ghiit tamaat. Ve Maaron Avuvu, i igham ghiit taleep poia ila to Maaron. Yo 6:63; Ro 7:6; Ga 3:10+; Hib 8:6+

Hibru 9:14

Ighe tauvene, Krisi siŋ tooni iliiv kat pa gabua tawe. Pasaa, Avuvu Patabuyaaŋ tau ilepleep irau saawe na, tapiri ipaloti, ve iyoki tauu gha imaat imin watooŋrau pa Maaron leso ireu sosor toit. Watooŋrau tooni tawe, poia le poia kat. Sosor eta ipaako mako. Tauvene siŋ tooni le tapiri tiina. Irau imin loloon ve tayamaan taghe taŋgalaaŋ kat ila Maaron maata. Ve tapul ŋgar tau ighegherev ghiit pa mateegh na, leso tabees poi pa Maaron maata yaryaare. Tit 2:14; Hib 10:22; 1Yo 1:7

2 Korin 5:19

Muuŋ, koi isap iit tamtamon ve Maaron sosoon. Pasaa, tamamalaaŋ pa tutuuŋ tooni. Eemon ila uraat to Krisi, Maaron ireu sosor toit, ve ipasov koi tawe. Tauta aazne, maata kisin sosor toit muul mako, ve itiŋa tavalupu ghiit tamin eemon wa. Ve i ighur saveeŋ tooni ilam tsiei, leso nivotia pa tamtamon, ve tiwatagh eez to yesŋa Maaron tivalupu zi timin eemon. Mbo 32:1+; Ro 3:23+; Kol 1:19+

Epesus 2:11

Yam tau Yuda mako na, matamim iŋgal. Muuŋ, yes Yuda tipapakur tauzi tighe yes, o tirav warozi. Ve tivevelegh gham tighe yam tirav waromim mako. Eemon uraat to ravuuŋ tamtamon warozi, ene gabua to uliin mon tau tamtamon tigham pa nimazi. Ene igham gabua eta pa loloon mako.

Lukas 15:32

Ughita. Iit taghe pa tazim imaat wa. Eemon ileep maata yaryaare. Ve taghe pa ilale wa. Eemon aazne, ilam peria ve taghita muul. Tauvene isaav ighe tagham ghanghaniiŋ pani toman tintiniin, ene iduduuŋ.’ ”

Lukas 15:24

Pasaa, iit taghe pa i imaat wa. Eemon mako. Maata yaryaare, ve imuul ilam ivot. Taghe pa i ilale wa. Eemon mako. Aazne, taghita muul.’ Tauvene besooŋa tooni tila tigham uraat itaghon olman aliiŋa. Ra tilup zi pa ghanghaniiŋ toman tintinizi. Ep 2:1,5

Yakobus 2:26

Tauvene isaav ighe tamtamon eta ighur ila, eemon ghuruuŋ ila tooni ipaburigini pa ghamuuŋ ŋgar poia mako, ene ghuruuŋ ila tooni tawe imaat wa. Imin iit tamtamon. Isaav ighe yaghuraan isov, ene tamaat.

Epesus 5:14

Ve ghazooŋa tooni isul zi, ve itoor zi. Leso anazi titotoi ghazooŋa tooni. Puughu tane ta tisavsaav tighe: “Yo tau ugheen na, uburig pa mateegh. Leso ghazooŋa to Krisi isul ghom.” Ro 13:11

1 Korin 15:45

Maaron aliiŋa tau tiboode na, isaav ighe: “Adam, ŋeer tau Maaron ighuru imin maata na, iburig imin tamtamon, ve maata iyaryaar.” Gnp 2:7 Ve Adam ite tau ivot murei na, i Avuvu ta igham ghiit taleep mataan yaryaare le alok. Yo 5:21,24; Ro 5:15+

Rau Tau Paulus Iboode Pa Yes Roma Rom--Romans 6:13

Aŋgin poghania anoŋamim siriv siriv, imin matamim, avomim, nimamim ma vene. Apul zi timin besooŋa pa ŋgar saghati muul sov. Muuŋ, yam aleep imin yes mateegha. Ve aazne, Maaron ipaburigin gham gha agham lepoogh paaghu ila tooni wa. Tauvene aghur taumim amin i le kat. Ve aghur anoŋamim siriv siriv tana tisov timin i le paam, leso timin besooŋa pa ŋgar duduuŋa. Ro 12:1; 2Kor 5:14+; Kol 3:5

1 Yoan 2:12

Natugŋa, yau nabood saveeŋ tane ilat payam pasaa, ila Yesu Krisi eeza, Tamaan Maaron ireu sosor tsiam isov ilale wa. Mbaŋ 10:43; 1Kor 6:11

1 Korin 15:36

Yo borau! Lem ŋgar mako! Ughita. Isaav ighe tavazogh gabua eta uuve, ene aat uuli imbuuz gha ilale, mako paaghu tooni itum izaa. Yo 12:24

Yoan 5:21

Taama Maaron, i ipaburigin yes mateegha ve tileep matazi yaryaare. Naatu tauvene paam. Isaav ighe loolo pa tamtamon eta, i aat ighamu ileep poia. Yo 11:25; Ro 4:17; 1Kor 15:45; Ep 2:5

Lukas 9:60

Yesu iyol aliiŋa ighe: “Mako. Yes tau lezi ghilalooŋ pa Maaron mako ve titaghon eez to mateegh na, yes irau titavia mateegha. Eemon yo aat ula uvotia pooz to Maaron pa tamtamon.”

Hibru 6:1

Saawe tau talooŋ saveeŋ to Krisi imin paaghu, tipaghazoŋai ghiit pa ŋgar raurauai imin maata. Ŋgar tauvene: Ŋgar tau pale igham ghiit tamaat gha talaleen na, iit aat tapuli ileple, ve tatoor ŋgar toit, ve taghur ila to Krisi. Ve tipaghazoŋai ghiit pa ŋgar maata maata to ghamuuŋ yaa, ve ŋgar to ghuruuŋ nimaan izala tamtamon pavozi imin palotiiŋ zi, ve burigiiŋ to yes mateegha. Ve tipaghazoŋai ghiit tighe Maaron pale igabiiz ghiit ve ighur atuya pait. Atuya tawe pale igheen le alok. Ŋgar tauvene ta tipaghazoŋai ghiit pani imin maata, ra tisavia ŋgar siriv. Ene poia. Eemon ighe tasasavia ŋgar tauvene mon, ene imin iit taghelia rir mon, ve tarau ruum anooŋa mako. Tauvene iit aat tazuari ghiit le taghazooŋ pa ŋgar siriv paam, leso ŋgar toit imatuugh pa Maaron saveeŋ tooni.

1 Timoti 5:6

Ve isaav ighe naar eta tiini ibees pa lepoogh poia to taan mon, onoon, i ileep maata yaryaare. Eemon ghuruuŋ ila tooni, ene imaat wa.

Rau Tau Paulus Iboode Pa Yes Roma Rom--Romans 4:17

Saveeŋa tiboode pataghaaŋ wa. Tighe: “Yau naghur ghom leso umin eval tiina to nugh nugh tamazi.” Gnp 17:4+ Aazne, saveeŋ tane ighur anooŋa pa iit tamtamon tau taghur ila to Krisi. Pasaa, Maaron ighit ghiit ighe iit tamin Abaram paaghu tooni. Abaram itotoi ghiit pa eez to ghuruuŋ ila. Pasaa, i ighur ila to Maaron ighe i irau ipaburigin yes mateegha. Ve ighur ila ighe Maaron isaav mon, ve gabua tau muuŋ tigheen mako na, tivot. Yo 5:21; Hib 11:3,19

Yoan 6:63

Maaron Avuvu mon ta irau igham lepoogh poia to anunuun ivot. Gabua tau tamtamon to taan tighamu ila tauzi tapirizi ma ŋgar toozi na, eta irau iuul zi to tigham lepoogh tawe ne mako. Saveeŋ tau yau nasavia payam, tauta imin eez payam to agham Maaron Avuvu ve aleep poia ila to Maaron. 2Kor 3:6; 1Pe 1:23

Yakobus 2:20

Yo lem ŋgar mako kat! Isaav ighe ughur ila to Maaron, ve ughamgham ŋgar poia mako, ghuruuŋ ila tsio, ene kaut sorok. Le anooŋa mako. Mindai? Ughe napaghazoŋai ghom pa saveeŋ tsiau tane puughu?

Yakobus 2:17

Ene raraate mon pa ghuruuŋ ila toit. Isaav ighe taghur ila mon, ve ghuruuŋ ila toit ipaburigin ghiit pa ghamuuŋ ŋgar popoia mako, ene imaat wa.

1 Timoti 6:13

Maaron, i imin puughu pa gabua naol isov tau tileep matazi yaryaare. Ve Yesu Krisi, i iroi mako, ve ivotia tauu ighazooŋ ila Pontius Piladus naagho. Yau avog iyaryaaŋ payo ila yesuru matazi tauvene: Ugham ŋgar saghati eta tau irau igham tamtamon tiyau avozi pa lupuuŋ to Krisi sov. Tutuuŋ tau nasavia payo ne, matam kisini ve utaghon duduŋaini lee irau saawe tau Tiina toit Yesu Krisi imuul ilam, ve itotoi tauu ivot ighazooŋ.

Kolosi 2:12

Ŋgara tauvene: Saawe tau agham yaa, yam apaak Krisi pa mateegh tooni, ve titavi gham tomania Krisi. Ve Maaron igham gham apaak Krisi pa burigiiŋ tooni paam, tauta agham lepoogh paaghu ila tooni. Pasaa, yam aghur ila Maaron tapiri tau ipaburigin Krisi pa mateegh. Ro 6:3+; Ep 2:6, 3:7; Kol 3:1+