Hibru 9:28 - Maaron Saveeŋ Tooni Patabuyaaŋ Tuam

²⁸ Krisi tauvene paam. I iyoki tauu gha imaat imin watooŋrau pai eemon, ve isov. I ibaad pataŋani tiina, leso ireu sosor to tamtamon katini. Ve murei, i pale imuul izilam. Saawe tana, i irau igham uraat muul pa rewaaŋ sosor to tamtamon mako. I ilam to igham mulin yes tau tighurghur matazi pani ve tisasaŋani. Mt 26:28; Ro 6:10; Pil 3:20; Tit 2:13

Mutu (Oov)

²⁸ Krisi tovene paam. Ye iyokia tau ve imaat inim watooŋrau pa ee moghon, ve isob. Ye imbaad pataŋani tiina pa ireu sosor to tamtoghon katindi. Ve muri, ye pale imuul izi inim. Sawa tonenen, ye irau igham uraat muul pa rewaaŋ sosor to tamtoghon maau. Ye pale inim pa igham mulin yes to tighur matadi pani ve tisasaŋani. Mt 26:28; Ro 6:10; Pil 3:20; Tit 2:13

Hibru 9:28 Referans Kwoze

Titus 2:13

Ve taghur mataan pa saawe to Tiina toit Yesu Krisi imuul ilam, ve itotoi tapiri ve mbonari ivot ighazooŋ. I Maaron toit tau eeza tiina kat, ve i Uleeŋa toit. Gabua tawe ighe ivot, ene aat tintiniin kat pa poia to Maaron tau pale izaa toit. Pil 3:20; 1Pe 1:3+; 2Pe 3:13+

1 Petrus 2:24

Saawe tau Krisi ibaad sosor toit atuya izala ai pambarooŋ, i iyamaan yavyavuuŋ tiina kat ila tiini. Leso tasov pa ghamuuŋ ŋgar saghati, ve taleep poia ila tooni, ve tataghon ŋgar duduuŋa mon. Tauvene zibzib niia tau igheen ila Krisi tiini, tauta igharaat gham gha poiamim wa. Is 53:5; Ro 6:10+

Rau Tau Paulus Iboode Pa Yes Roma Rom--Romans 6:10

Pasaa, i imaat pa sosor toit pai eemon, ve isov. Irau imaat muul mako. Ve aazne, i ileep to igham uraat itaghon Maaron loolo ve ŋgar tooni. Hib 7:27, 9:28; 1Pe 3:18

2 Timoti 4:8

Tauvene atuya poia to yes tau tiparav ariaaŋ gha tiliiv na, tauta isasaŋan ghau. Atuya tawe, ene vene: Saawe to Mboŋ Murei, Tiina toit tau gabizooŋ tooni duduuŋa na, pale ighit ghau ighe yau ŋeer duduŋag. Ve yau mon mako. Tamtamon tisov tau lolozi pani, ve tighe le tighita muleeŋ tooni, ene i pale igham ŋgar raraate mon pazi. Yems 1:12; 1Pe 5:4; Syg 2:10

Rau Tau Paulus Iboode Pa Yes Roma Rom--Romans 8:23

Ve yes mon mako. Iit paam. Onoon, Maaron igham tauu Avuvu pait wa. Ene imin puughu pa gabua popoia naol tau murei pale tagham zi na. Eemon aazne, taleep toman pataŋani ve tataŋtaŋ, ve tasaŋan saawe to Maaron ipas ghiit pa saghati tapiri, ve igham leen anoŋaan paaghu. Saawe tana ighe ivot, mako i ipavotvotin ghiit ighe: “Ene yau natugŋa.” 2Kor 5:2+; Pil 1:23, 3:21

1 Yoan 3:2

Yam zeran tsiau, lolog igheen tsiam kat. Aazne, iit tamin Maaron natŋa wa. Ve saa lepoogh tau murei pale taghamu, ene iit takankaan pani. Pasaa, Maaron ipaghazoŋai ghiit pa gabua tana soone. Eemon iit tawatagh: Saawe tau Krisi imuul ilam gha itotoi tauu ivot ighazooŋ, ve taghit katini, ene aat taleep imin i tauu. Mt 5:8, Ro 8:29; 2Kor 3:18

Uraat To Yes Mbaŋooŋa 1:11

“Yam zeran to Galilaia, puughu mindai ta ayozyooz ve matamim izazala pa sambam? Alooŋ. Yesu tawe, aazne Maaron ighamu gha ipul gham, ve imuul izala pa sambam. Eemon murei, i pale imuul izilam raraate imin tau aazne aghita izala na.” Mt 26:64; 1Tes 4:16; Syg 1:7

1 Tesalonika 1:10

Ve tisavi gham tighe yam asasaŋan Maaron Naatu tau i ipaburigini pa mateegh na. I pale ipul sambam ve izilam to igham mulin ghiit pa aatyavyav to Maaron tau murei pale ivot. Ro 5:9; Pil 3:20; 1Tes 5:9; Tit 2:13

Matayu 26:28

Ene yau siŋig tau pale imaliŋ pa tamtamon katini. Leso ireu sosor toozi, ve ipariaaŋ saveeŋ mbuaaŋ to eez paaghu tau pale Maaron ve tamtamon tivalupu zi timin eemon. Igham 24:8; 1Kor 10:16; Hib 9:28

1 Petrus 3:18

Agham ŋgar pa Krisi. I ŋeer duduuŋa kat. Eemon i igham iit tamtamon sasaghatiin niaan, ve iyamaan yavyavuuŋ ila tiini gha imaat, leso ireu sosor toit, ve igham ghiit tala to Maaron. Uraat tooni tawe, i ighamu pai eemon, ve isov. Irau ighamu muul mako. Ve Maaron Avuvu ipaburigini pa mateegh, ve aazne i ileep maata yaryaare izi sambam.

Rau Tau Paulus Iboode Pa Yes Roma Rom--Romans 8:3

Tutuuŋ, ene irau ipas ghiit tavot pa ŋgar saghati ve mateegh tapiri, ve igham ghiit taduduuŋ ila Maaron maata ne mako. Pasaa, loloon muŋgaana, ene iravrav matin tapiriin. Eemon gabua tau tutuuŋ irau ighamu mako, tauta Maaron tauu ighamu. Pasaa, i imbaaŋ tauu Naatu izilam taan, gha igham lepoogh imin iit tamtamon sasaghatiin, ve tiini igham yavyavuuŋ, ve imaat imin watooŋrau to ireu sosor toit. Mbaŋ 13:38+; Ro 7:18; 2Kor 5:21; Hib 10:1+

Saveeŋ Yoŋgaaŋ 1:7

Aghita. I pale ileep ila taitai ve ilam, ve tamtamon tisov tighita pa matazi. Yes tau tiravu imaat na, pale tisov tighita paam. Tauvene nughmariŋ to taan pale tighita, ve titaŋ tiina. Onoon kat. Gabua tane pale ivot. Dan 7:13; Sek 12:10; Mt 24:30

Hibru 4:15

Onoon, iit tamtamon tapiriin imbolmbool. Eemon daaba toit to watooŋrau tawe, i loolo isasaghatin ghiit. Pasaa, tovaaŋ naol isov tau ivotvot pait ne, ene ivot pani paam, ve i iwatagh zi wa. Eemon i igham sosor eta mako. Mt 4:1+; 2Kor 5:21; Hib 2:17; 1Pe 2:22; 1Yo 3:5

1 Yoan 3:5

Ve yam awatagh: Krisi, i le sosor eta mako, ve izilam taan to ireu sosor toit. 2Kor 5:21; Hib 9:26; 1Pe 2:22+

2 Tesalonika 2:1

Yam toŋvetaz, aazne yei nighe nipaes payam pa saawe to Tiina toit Yesu Krisi imuul ilam ve tiyauur ghiit tala tooni, leso itiŋa taleep. Tauvene nighason gham nighe aghur taliŋamim poi pa saveeŋ tsiei tane. 1Tes 4:15+

1 Korin 1:7

Tauvene aazne, ambool pa tapiri, ma ŋgar poia eta tau Maaron Avuvu ireii pait ne mako. Ve asasaŋan aghe le aghita saawe to Tiina toit Yesu Krisi imuul ilam ve Maaron itotoia ivot ighazooŋ. Pil 3:20; 1Tes 1:10; Tit 2:13

Rau Tau Paulus Iboode Pa Yes Roma Rom--Romans 5:15

Pasaa, Adam, i ŋeer eemon. Ve saawe tau izoor Maaron aliiŋa ve igham sosor, ene imin puughu pa mateegh igham tamtamon tisov. Yesu Krisi tauvene paam. I ŋeer eemon. Ve ila uraat tooni, poia tiina to Maaron izaa to eval tiina sorok, ve ireu sosor toozi. Tauvene poia tau Maaron itotoia pait, ve pataŋani tau ivot ila sosor to Adam, ene raratezi mako. Pasaa, sosor eemon geeg to Adam, ta ivaghamunia iit tasov, ve imin puughu pa Maaron ighur atuya pait. Eemon tamtamon tigham sosor katini ilam ilam le saawe to Yesu, ra Maaron igham poghani ghiit sorok itaghon tauu poia tooni, ve igham ghiit taduduuŋ ila i maata.

Hibru 9:25

Yes Yuda, ndaman isov, daaba to watooŋrau iloŋloŋ ila balbaal loolo tau patabuyaaŋ le patabuyaaŋ kat. Ve saawe tau iloŋ ila, i ila tomania tauu siŋ tooni mako. I ilala tomania siŋ to ŋgai. Eemon Krisi, i igham watooŋrau pai katini mako. Iyoki tauu gha imaat pai eemon, ve isov.

Matayu 20:28

Leso itaghon Tamtamon Naatu ŋgar tooni. Aghita. I ilam to tamtamon tibees pani ne mako. I ilam imin besooŋa to iuul tamtamon, ve iyoki tauu gha imaat pa eval tiina. Leso ighol atuya to sosor toozi, ve ipas zi pa saghati tapiri.” Pil 2:7; 1Tim 2:6

Matayu 25:31

Yesu isaav muul ighe: “Murei, Tamtamon Naatu pale imuul ilam tomania yes aŋela tisov, ve itotoi pooz tooni ivot ighazooŋ toman tapiri ve mbonari tiina. Saawe tana ighe ivot, i pale ileep ila niia to ghamuuŋ pooz toman mbonari tiina, ve igabiiz tamtamon. Pasaa, i kinik. Mt 16:27, 19:28; Syg 20:11+

Rau Tau Paulus Iboode Pa Yes Roma Rom--Romans 3:25

Maaron ighur Krisi to imaat imin watooŋrau, leso siŋ tooni ireu sosor to tamtamon ve itatan aatyavyav to Maaron. Tauvene yes tau tighur ila tooni na, i aat ireu sosor toozi isov ilale. Yes tau muuŋ tigham sosor na paam, Maaron loolo isaghatin zi, tauta ivaghamun zi mako ve ipul zi tileep. Ŋgar tooni tawe, ene iduduuŋ. Pasaa, i iwatagh ighe murei Naatu pale ibaad sosor toozi atuya. Mbaŋ 13:38+; 2Kor 5:19; Kol 1:20

Hibru 1:14

Pasaa, aŋela, yes besooŋa to Maaron. I imbaŋmbaaŋ zi to tiuul yes tau i ighe igham mulin zi. Mbo 34:7, 91:11, 103:20; Mbaŋ 12:7

Hibru 2:3

Ve uraat tau Yesu ighamu to igham mulin ghiit na, ene tiina le tiina kat. Tauvene isaav ighe loloon iveghaini ve tapul ŋgar pani, pale tapaghau tauun pa Maaron aatyavyav tooni mindai? Mako. Hib 10:28+, 12:25 Uleeŋ tana, Tiina toit Yesu ivotia imin maata. Ra yes tau tilooŋ saveeŋ ila tooni na, anazi tipalot saveeŋa pait. Mk 1:14+; Mbaŋ 1:8; 1Yo 1:1+

Hibru 5:9

Ve ighamu le irau kat pa ghamuuŋ uraat to watooŋrau. Tauta Maaron isaav pani ighe i ighuru imin daaba to watooŋrau imin Melkizedek. Tauvene yes tau tilooŋ aliiŋa ve titaghoni, i pale igham mulin zi, ve tisov tileep matazi yaryaare le alok. Hib 2:10,17, 5:6, 7:1+

Hibru 7:27

Tauvene i imin daaba siriv to watooŋrau mako. Pasaa yes tawe, saawe isov tighamgham watooŋrau pa rewaaŋ sosor to tauzi imin maata. Mako tigham watooŋrau pa sosor to tamtamon siriv. Eemon Yesu, i le sosor eta to igham watooŋrau pani ne mako. Ve gabua ite paam. Watooŋrau tau i igham pa rewaaŋ sosor to iit tamtamon, i ighamu pai eemon, ve isov. Watooŋrau tawe, i ighamu indeeŋ saawe tau iyoki tauu gha imaat. Hib 5:3, 9:12; 1Pe 3:18

Hibru 10:10

Tauvene Yesu Krisi iyoki tauu gha imaat pai eemon itaghon Maaron loolo to ireu sosor toit. Tauta aazne, i igham ghiit tamin tamtamon patabuyaaŋa to Maaron wa. Yo 17:19; Hib 9:28, 13:12

Hibru 12:14

Azuari gham to atotoi ŋgar luuma pa tamtamon tisov. Leso yamŋa avalupu gham amin eemon. Ve azuari gham pa ŋgar patabuyaaŋ. Pa tamtamon tau ighe itaghon ŋgar patabuyaaŋ mako, ene irau ighita Ŋeer Tiina mako. Mt 5:9; Ro 12:18; 2Kor 7:1; 1Pe 1:15+

Rau Tau Jud Iboode Jut--Jude 1:21

Maaron loolo igheen toit kat, ve ighamgham poghani ghiit. Tauvene yam paam, matamim kisin ŋgar tooni tawe ve ataghoni irau saawe. Ve asaŋan saawe to Tiina toit Yesu Krisi loolo isaghatin gham ve igham mulin gham, ve igham gham aleep matamim yaryaare le alok.