Galesia 1:15 - Maaron Saveeŋ Tooni Patabuyaaŋ Tuam

^15-16 Eemon, saawe tau tinaŋ ipoop ghau soone, Maaron isiigh ghau pataghaaŋ wa. Ve murei ra, i ipoi ghau namin le, itaghon tauu loolo ve poia tooni, ve itotoi Naatu payau, leso navotia vaaru pa yes tau Yuda mako na. Saawe tau gabua tana ivot payau, yau nala nail ŋeer eta to taan to ipaghazoŋai ŋgar tsiau ne mako. Yer 1:5; Mbaŋ 9:15; Ro 1:1

Mutu (Oov)

^15-16 Eemoghon, sawa to tinaŋ ipoop ghou sone, Maaron isia ghou pataghaaŋ wa. Ve muri ghoro, ye ipoi ghou nanim le, itaghon tau lolo ve poia toni, ve ipatooŋ Natu payou, leso navotia varu pa yes to Yuda maau ne. Sawa to mbeb tonenen ivot payou, you nala nakaal ŋgeu eta to taan pa ipaghazoŋan ŋgar tiou ne maau. Yer 1:5; Mbaŋ 9:15; Ro 1:1

Galesia 1:15 Referans Kwoze

2 Timoti 1:9

Maaron, i igham mulin ghiit, ve ipoi ghiit tamin le, leso tataghon ŋgar patabuyaaŋ. Ve iit tagham ŋgar poia eta, ta i ipoi ghiit pani ne mako. I itaghon tauu loolo, ve poia tooni. Muuŋ kat, saawe tau gabua eta ivot soone, i maata iŋgal pataghaaŋ ighe igham poghania iit tamtamon tau tapaak Krisi ve taleep ila tooni. Ro 8:28; Ep 1:4, 2:8+; 1Tes 4:7

Epesus 1:5

Tauvene muuŋ kat, Maaron loolo igheen toit, ve maata iŋgal ighe igham ghiit tamin i natŋa ila uraat to Yesu Krisi. Ene i itaghon tauu loolo ve poia tooni. Yo 1:12; Ga 4:5

1 Korin 1:9

Iit irau tanumeer Maaron. Pasaa, i itataghon saveeŋ tooni irau saawe. Ve ipoi gham gha yamŋa Naatu Yesu Krisi avalupu gham amin eemon wa. Pil 1:6; 1Tes 5:23+; 1Pe 5:10

Rau Tau Paulus Iboode Pa Yes Roma Rom--Romans 1:1

Yau Paulus nabood rau tane. Yau besooŋa to Yesu Krisi. I tauu isiigh ghau namin le, ve ipoi ghau namin mbaŋooŋa tooni, leso navotia vaaru poia to Maaron. Mbaŋ 9:15; Ga 1:15

Uraat To Yes Mbaŋooŋa 13:2

Saawe ee, tiŋgun tauzi pa ghaniiŋ aniiŋ itaghon suŋuuŋ ŋgara. Tisuŋsuŋ ila le Avuvu Patabuyaaŋ isaav pazi ighe: “Aghur Banabas yesuru Saul tivot, leso tigham uraat tau napoi zi pani na.” Mbaŋ 9:15; Ro 10:15; Ep 3:7+; 1Tim 2:7

Uraat To Yes Mbaŋooŋa 9:15

Eemon Tiina toit isaav pani muul ighe: “Mako. Ula. Pa ŋeer tawe, yau taug nasiigho wa to imin uraata tsiau ariaaŋa ee. I pale ivotia varug ila nugh nugh naghozi. Yes tau Yuda mako na, ve yes kinik, ve yes Israela paam. Mbaŋ 26:16+; Ga 1:15+; 1Tim 1:12

Rau Tau Paulus Iboode Pa Yes Roma Rom--Romans 8:30

Ve yes ta Maaron ŋgar tooni iyaryaaŋ pazi, tauta ipoi zi timin le. Ve yes tau ipoi zi timin le, tauta igham zi tiduduuŋ ila i maata. Ve yes tau igham zi tiduduuŋ ila maata na, i aat ikis zi tileep tuŋia ila tooni ila ila le igham zi tila tileep tomania ila mbonari loolo izi nugh sambam. Yo 10:28+; 1Kor 6:11

Rau Tau Paulus Iboode Pa Yes Roma Rom--Romans 1:5

Ila uraat to Yesu Krisi, Maaron ighur ghau namin mbaŋooŋa tooni itaghon tauu poia tooni. Leso nagham nughmariŋ tau Yuda mako na tighur ila tooni, ve titaghon aliiŋa, ve tipaghazoŋaini tighe i eeza tiina. Mbaŋ 26:16+; Ro 16:26; 1Kor 15:9+; Ga 1:15+

Matayu 11:26

O Tamaŋ, yo utaghon taum lolom ve poia tsio, tauta ugham tauvene.”

1 Petrus 5:10

Maaron toit tau poia puughu na, i ipoi gham amin Krisi le, leso igham gham ala aleep tomania ila mbonari loolo le alok. Pataŋani tau aazne abadbaado na, malau mako pale isov. Ve murei, Maaron tauu pale igham gham aleep poia muul, ve ipalot gham, leso ayooz tuŋia, ve ataghon suvinia ŋgar tooni. 2Kor 4:17; 1Pe 1:6

Epesus 3:11

Gabua naol tane itaghon Maaron tauu ŋgar tooni tau igheen muuŋ geeg ve ilam, saawe tau sambam ve taan tivot soone. Ve aazne, Tiina toit Yesu Krisi igham anooŋa ivot wa.

Epesus 1:9

Ŋgar yoŋgaaŋa tooni tau igheen ila tauu loolo, tauta Maaron ipaghazoŋai ghiit pani wa. Ŋgar tawe iŋarui Yesu Krisi. Pasaa, Maaron ighe igham pooz pa gabua naol isov ila ila le ighe saawe duduuŋ tau i tauu ighuru na ivot, mako ilup gabua naol isov tau tileep izi sambam ve taan na timin eemon, ve ighur zi tileep ila Krisi saamba, ve Krisi imin daaba pazi. Ro 16:25+; Ep 3:9+; Kol 1:16+,26

Galesia 1:6

Oyai, yau nagham ŋgar naol pa yam Galesia. Aghita. Ila uraat to Yesu Krisi ve poia tooni, Maaron ipoi gham amin le wa. Eemon yam rekia mon aghur murimim pani, ve aghe ataghon vaaru poia ite. Ve vaaru poia eemon ta ighengheen. Ite paam mako. Alooŋ. Tamtamon siriv tau tilepleep tomani gham na, yes titortoor vaaru poia to Krisi, ve tikaukau ŋgar tsiam. Zeran tawe, saveeŋ toozi isapir kat. Mbaŋ 15:1,24; 2Kor 11:3+

1 Korin 15:10

Eemon poia to Maaron itoor ghau, tauta namin mbaŋooŋa to Krisi ve aazne nataghon ŋgar tooni. Poia tooni izaa tsiau sorok mako. Ighur anooŋa. Pasaa, yau nagham katin uraat le naliiv mbaŋooŋa tisov. Eemon yau taug mako. Poia to Maaron igheen tsiau, tauta ipapalot ghau gha naghamgham uraat tane. 2Kor 11:5,23, 12:11+; Kol 1:29

1 Korin 1:24

Eemon yes tau Maaron ipoi zi timin le na, yes Yuda ve Grika paam, yes tighilaal tighe Krisi, i itotoi Maaron tapiri ve ŋgar tooni ivot ighazooŋ pait. Ro 1:16; Kol 2:3

1 Korin 1:1

Yau Paulus. Maaron ipoi ghau namin le, ve ighur ghau namin mbaŋooŋa to Yesu Krisi itaghon i tauu loolo. Yeiru toŋvetaz toit Sostenes nibood rau tane ilat pa yam tau aleep ila lupuuŋ to Maaron izi nugh Korin na. Yam apaak Yesu Krisi ve aleep ila tooni, tauta amin tamtamon tooni patabuyaaŋa wa. I ipoi gham amin le, leso ataghon ŋgar patabuyaaŋ imin i tauu. Ve yam mon mako. I igham tauvene pa tamtamon tisov to nughmariŋ tau tisuŋsuŋ ila Tiina toit Yesu Krisi eeza na. I tiina toozi, ve tiina toit paam. 1Kor 6:11; 2Tim 1:9

Lukas 10:21

Saawe duduuŋ tana, Avuvu Patabuyaaŋ igham Yesu loolo poia le poia kat. Tauvene isaav ighe: “O Tamaŋ, yo Tiina tau uŋgin sambam ve taan. Yau napait ghom toman lolog poia. Pasaa, yes tau lezi ŋgar tintiina ve tighazooŋ pa gabua naol na, yo uŋgooz uraat tsiau tane puughu pazi. Ve upaghazoŋaini pa yes tau titatan tauzi ezazi, ve tinumeer ghom imin yes geegeu tinumeer tamazŋa ve tinazŋa. Aa Tamaŋ, yo utaghon taum lolom ve poia tsio, tauta ugham tauvene. 1Kor 1:20, 26+; 3:18+

Rau Tau Paulus Iboode Pa Yes Roma Rom--Romans 9:24

Ene nasavia iit tau Maaron ipoi ghiit tamin le na. Iit Yuda, ve yes tau Yuda mako na paam.

Rau Tau Paulus Iboode Pa Yes Roma Rom--Romans 8:28

Iit tawatagh: Gabua naol isov tau tivotvot ne, Maaron itortoor zi timin gabua popoia pa yes tau lolozi igheen tooni. Ene yes tau i ipoi zi timin le itaghon tauu ŋgar tooni. Gnp 50:20; 2Tim 1:9

1 Korin 1:21

Maaron, i ŋgar tooni tiina, ve ighita ighe poia to ipoon eez pa tamtamon to taan, leso tipait tauzi ezazi sov. Tauta yes ŋgara to taan ŋgar toozi irau iuul zi to tiwatagh Maaron mako. Maaron ighe itaghon eez ite to igham mulin tamtamon. Ene saveeŋ to Krisi tau nivovotia ne. Onoon, yes tau titaghon taan ŋgara na, tighita saveeŋ tane tighe ene saveeŋ to yes kankanooŋa. Eemon yes tau tighur ila saveeŋ tane, Maaron pale igham mulin zi. Mt 11:25+

Galesia 1:1

Yau Paulus, mbaŋooŋa to Yesu Krisi, ta nabood rau tane. Uraat tau naghamghamu ne, tamtamon eta ighur ghau pani mako, ve lupuuŋ eta to taan tighur ghau pani mako. Yesu Krisi gha Taama Maaron tau ipaburigini pa mateegh na, yesuru ta tighur ghau pa uraat tane. Mbaŋ 9:15