Zakariya 14:8 - BIBELE Mahungu Lamanene

⁸ Hi siku rolero mati ma ta khuluka ma huma emutini wa Yerusalema, ma ya chela elwandle ra le vuxeni, laman'wana ma ya chela elwandle ra vupeladyambu, ma endlisa sweswo hi ximumu ni xixika.

Xitsonga (Bibele)

⁸ Esikwini rolero, mati lama pfelelaka ma ta huma eYerusalema, man'wana ya wona ma khulukela elwandle ra le vuxeni, man'wana elwandle ra le vupeladyambu; swi tshama swi va tano rihunga ni vuxika.

Zakariya 14:8 Referans Kwoze

Yohane 7:38

Hilaha Tsalwa ri vuleke hakona, ‘milambu ya mati lama hanyaka yi ta khuluka yi huma embilwini ya loyi a pfumelaka eka mina.’ ”

Yohane 4:14

Kambe un'wana ni un'wana la nwaka mati lawa ndzi nga ta n'wi nyika wona, a nga ka a nga ha tlheli a twa torha ni siku ni rin'we; kambe mati lawa ndzi nga ta n'wi nyika wona, ma ta va eka yena xihlovo xa mati lama pfelelaka, ku yisa evutomini lebyi nga heriki.”

Yohane 4:10

Yesu a n'wi hlamula, a ku: “Loko onge u tivile leswi Xikwembu xi nyikaka swona, ni loyi a vulavulaka na wena a ku: ‘Ndzi nyike mati ndzi nwa’, a wu ta va u komberile eka yena, kutani a a ta va a ku nyikile mati lama hanyaka.”

Yuwele 3:18

“Hi siku ra kona, tintshava ti ta pfempfa vhinyo yo nandziha; ntswamba wu ta khuluka eswintshabyanini, swinkobyana hinkwaswo swa tiko ra Yuda swi ta hobomulana. Endlwini ya mina HOSI, ku ta baleka nthavela, mati ma ta huma ma ya cheleta Nkova-wa-Xitimi.

Yuwele 2:20

“Lava taka hi le n'walungwini, ndzi ta va hlongola va ya kule na n'wina, ndzi ta va yisa emananga, etikweni leri omeke swinene. Lava rhangeke emahlweni, ndzi ta va byisela eLwandle-ra-ku-fa, lava saleke endzhaku ka vona, ndzi ta va nghenisa eLwandle-ra-Mediteraniya. Mintsumbu ya vona yi ta nun'hwa yi ku ngù-ngù-ngù, hikuva va mi hoxele ngopfu.

Esaya 49:10

A va nga fi hi ndlala kumbe torha, ku hisa ka dyambu a ku nga va dlayi, hikuva loyi a va twelaka vusiwana, ú ta va rhangela, ú ta va fambisa hi lomu ku nga ni swihlovo.

Nhlavutelo 22:17

Moya ni Mutekiwa va ri: “Tana! Ni loyi a swi twaka a a vule a ku: ‘Tana!’ Loyi a nga ni torha a a te; ni loyi a swi navelaka a a nwe mati ya vutomi a nga hakeli.”

Esaya 35:7

laha a ku hisa ngopfu, ku ta va ni tiva ra mati, ndhawu yo oma ngopfu yi ta humesa swihlovo; lomu mahlolwa a ma rhendzeleka-rhendzeleka ni ku wisa kona, byanyi byi ta hundzuka tinhlanga ni majekejeke.

Luka 24:47

Kutani, hi vito ra yena, timhaka ta ku hundzuka ni ta ku rivaleriwa swidyoho ti ta twarisiwa ematikweni hinkwawo, ku sungula hi le Yerusalema.’

Esaya 58:11

Mina HOSI, ndzi ta mi rhangela emahlweni minkarhi hinkwayo, ndzi mi nyika swilo hinkwaswo leswinene leswi mi swi navelaka, ndzi tlhela ndzi mi tiyisa; mi ta fana ni ntanga lowu kumaka mati yo ringana, mi kota xihlovo lexi mati ya xona ma nga phyiki.

Risimu ra Tinsimu 4:15

I xihlovo xa le ntangeni, xihlovo xa mati lama pfelelaka, i xinambyana lexi khulukaka, xi khuluka xi huma eLebanoni.

Mikiya 4:2

Vanhu va tinxaka to tala va ta rhambana va ku: “Tanani hi ya khandziya ntshava ya HOSI, hi kongoma endlwini ya Xikwembu xa Yakobo; xi ta hi dyondzisa leswi xi lavaka swona, kutani hi ta famba endleleni ya xona!” Emutini wa Siyoni, hi kona ku nga ta huma Nawu, Rito ra HOSI ri ta huma eYerusalema.

Zakariya 14:4

Hi siku rolero HOSI Xikwembu xi ta yima ehenhla ka Ntshava ya Mitlhwari, yona leyi langutaneke na Yerusalema hi tlhelo ra vuxa, kutani ntshava leyi yi ta pandziwa hi le xikarhi, ku huma nkova lowukulu, wu sukela evuxeni wu ya fika evupeladyambu. Hafu ya ntshava yoleyo yi ta ntlhentlhela en'walungwini, hafu leyin'wana yi ta ntlhentlhela edzongeni.

Yohane 5:4

hikuva, hi minkarhi yin'wana, ntsumi ya Hosi a yi xikela evuhlambelweni, yi ta pfindlusa mati; kutani la rhangeke a nghena loko mati ma ha ku pfindlusiwa, a a hanyisiwa, hambi a ri ni vuvabyi byihi na byihi.]