Yuwele 2:26 - BIBELE Mahungu Lamanene

²⁶ “Swakudya, mi ta dya mi tlhela mi nga ha swi lavi, kutani mi ta dzunisa vito ra mina HOSI Xikwembu xa n'wina, mina ndzi mi endleleke swilo swo hlamarisa; kutani vanhu va mina a va nga ha tlheli va khomiwa hi tingana, ni siku ni rin'we.

Xitsonga (Bibele)

²⁶ Mi ta dya, mi ko mi xurha, mi ta dzunisa vito ra Yehovha, Xikwembu xa n'wina, la mi endleleke leswi hlamarisaka, kutani tiko ra mina ri nga ka ri nga ha tshami ri khomiwa hi tingana, ni siku ni rin'we.

Yuwele 2:26 Referans Kwoze

Varhoma 10:11

Tsalwa ri te: “Un'wana ni un'wana la pfumelaka ka yena, a nga ka a nga khomiwi hi tingana.”

Pisalema 22:26

Swisiwana swi ta dya swi xurha; lava va ku chavaka, va ta ku dzunisa we HOSI, va engeteriwa masiku ya ku hanya.

Varhoma 5:5

kutani ku langutela a ku hi khomisi tingana, hikuva Xikwembu xi cherile rirhandzu ra xona etimbilwini ta hina hi Moya lowo Kwetsima lowu hi nyikiweke wona.

Duteronoma 12:7

Mi ta dyela endhawini leyi mi tsakile, emahlweni ka HOSI Xikwembu xa n'wina, hikuva xi ta va xi mi katekisile eka hinkwaswo leswi mi nga ta swi endla, n'wina ni mindyangu ya n'wina.

Esaya 49:23

Tihosi ti ta va vatatana eka wena, vasati va tona va ta va vamanana lava va nga ta ku hlayisa. Hinkwavo va ta nkhinsama va korhama, va nantswetela ritshuri emilengeni ya wena. Hikokwalaho, u ta swi tiva leswaku HOSI Xikwembu, hi mina; lava va ndzi tshembaka, va nga ka va nga khomiwi hi tingana.”

Esaya 45:17

Kambe HOSI Xikwembu xi ta ponisa Vaisraele hilaha ku nga heriki, va nga ka va nga khomiwi hi tingana, kumbe ku hlanganisiwa tinhloko ni siku ni rin'we.

Levhitika 26:5

Ntshovelo wa n'wina wu ta va wu tele ngopfu: Hi nkarhi wo kha mihandzu ya vhinya, mi ta va ma ha hula koroni, kasi na yona vhinya mi ta yi kha ku kondza ku ya fika xirimo. Mi ta va mi tshamisekile, mi dya mi xurha.

1 Yohane 2:28

Kutani sweswi, vana vanga, tshamani eka Kriste, leswaku loko a humelela, hi ta tiya nhlana, naswona hi nga vi na tingana eku fikeni ka yena.

Varhoma 9:33

hilaha ku tsariweke hakona va ku: “Vona, ndzi veka eSiyoni ribye leri wisaka vanhu, ni ntambha leri ri va khunguvanyisaka; kambe loyi a pfumelaka eka yena la nga ribye leri, a nga ka a nga khomiwi hi tingana.”

Esaya 54:4

“U nga chavi, hikuva a wu nga ha khomiwi hi tingana; u nga tipandzisi nhloko, hikuva a wu nga ha vangeriwi leswi nga ta ku nyumisa; tingana leti u veke na tona loko wa ha ri ntsongo, u ta ti rivala, ni leswaku a wu hlekuriwa loko u nga ha ri na nuna, a wu nga ha swi tsundzuki.

Esaya 25:1

We HOSI, u Xikwembu xa mina, ndzi ta ku vonga, ndzi dzunisa vito ra wena, hikuva u endlile leswo hlamarisa; u tshembekile, a wu tshikanga makungu lawa u ma endleke khale.

Zakariya 9:17

Hakunene tiko ri ta saseka, ri tsakisa! Majaha ni vanhwana va ta kula va tsakile, hikuva va ta phameriwa swakudya ni swakunwa leswinene.

Zakariya 9:15

HOSI ya matimba hinkwawo yi ta hlayisa vanhu va yona; maribye ya xihangu ma ta hlula valala ma va heta, ma halata ngati ya vona kukota vhinyo, kukota ngati ya swifuwo emagandzelweni, leyi tataka nkambana, yi tsakamisa ni timhondzo ta alitari.

Sofoniya 3:11

“Esikwini rero, ndzi ta susa tingana ta mintirho hinkwayo leyi mi yi endleke, loko mi ndzi hundzukela; hinkwavo lava tikurisaka ni lava titshembaka, ndzi ta va susa exikarhi ka n'wina; mi ta tshika ku tikukumuxa entshaveni ya mina leyo hlawuleka.

Esaya 29:22

Hikokwalaho, HOSI Xikwembu xa va ka Yakobo lexi kutsuleke Abrahama, xi vurisa sweswo, xi ri: “Va ka Yakobo a va nga ha nyumi, va nga ka va nga khomiwi hi tingana.

Genesa 33:11

Ndzi kombela leswaku u amukela tinyiko ta mina leti tisiweke eka wena, hikuva Xikwembu xi vile ni tintswalo eka mina, naswona ndzi ni swilo swo ringana.” Hi ndlela leyi, Yakobo a khongotela Esawu ku kondza a teka tinyiko.

1 Timotiya 6:17

Kambe loko va ri lava va nga ni rifuwo ra misava leyi, va byele leswaku va nga tikurisi, kumbe ku veka ku tshemba ka vona erifuweni leri nga tiyangiki, kambe va veka ku tshemba ka vona eka Xikwembu: Hi xona xi hi nyikaka hi ntalo swilo hinkwaswo leswaku hi tikorwisa ha swona.

Esaya 55:2

Xana mi xavela yini hi mali ya n'wina swilo leswi nga riki swakudya, naswona hikwalaho ka yini mi tirhela leswi nga xurhisiki, xana? Tikarhateleni ku yingisa mina, kutani mi ta dya leswo nandziha, mi hanya emafurheni.

Risimu ra Tinsimu 5:1

Ndzi ta entangeni wa mina, murhandziwa, we nhwana wanga, ndzi ta hlengeleta mafurha ya mirha ni swinun'hweriso swa mina, ndzi dya swihlenge swa mina ni vulombe bya swona, ndzi nwa vhinyo ya mina ni ntswamba wa mina. N'wina vanakulorhi, dyanani mi nwa, nwanani mi kolwa, n'we vanghana.

Swivuriso 13:25

Munhu wo lulama ú dya a xurha, khwiri ra lowo homboloka rona, ri etlela ni ndlala.

Pisalema 116:7

Sweswi ndzi ni ku rhula, hikuva HOSI Xikwembu xi ndzi katekisile ngopfu.

Pisalema 103:5

Xi ndzi phamela leswinene, kutani ndzi tiyile; vuntshwa bya mina bya pfuxetiwa, onge ndzi ngo haha kukota gama.

Pisalema 72:18

A ku nkhensiwe HOSI Xikwembu xa Israele, hikuva hi xona ntsena xi endlaka mahlori!

Pisalema 37:19

Enkarhini lowo tika va nge nyumisiwi, va ta dya va xurha hambiloko dyandza ri ri kona;

Pisalema 13:6

Ndzi ta yimbelela ndzi dzunisa HOSI, hikuva yi ndzi endlerile leswinene.

Nehemiya 9:25

Va tekile miti leyi biyeleriweke hi rirhangu yi va ya vona, va teka ni tiko lero saseka, ni tindlu leti teleke hi swilo hinkwaswo leswinene; va teka ni swihlovo leswi kovotliweke emaribyeni, ni masimu ya vhinya, ni mintanga ya mirhi ya mitlhwari, ni ya mirhi ya mihandzu ya tinxaka-xaka. Kutani va dya va xurha, va nyuhela; va tiphinile hikwalaho ka tintswalo ta wena letikulu.

Duteronoma 12:18

Kambe sweswo mi ta swi dyela emahlweni ka HOSI Xikwembu endhawini leyi xi nga ta tihlawulela yona; mi ta dya ni vana va n'wina va xinuna ni va xisati, ni malandza ya n'wina ya xinuna ni ya xisati, ni Valevhi lava va nga mitini ya n'wina, mi titsakela emahlweni ka HOSI Xikwembu eka hinkwaswo leswi mi swi endlaka.

Duteronoma 12:12

Kutani mi ta titsakela emahlweni ka HOSI Xikwembu xa n'wina, n'wina ni vana va n'wina va xinuna ni va xisati, ni malandza ya n'wina ya xinuna ni ya xisati, ni Valevhi lava nga ta tshama emitini ya n'wina, hikuva vona va ta va va nga ri na nsimu kumbe ndzhaka exikarhi ka n'wina.

Duteronoma 8:10

Kutani loko mi dyile mi xurha, mi ta tlangela HOSI Xikwembu xa n'wina, hikokwalaho ka tiko lero saseka leri xi mi nyikaka rona.

Levhitika 26:26

Swakudya swa n'wina ndzi ta swi hunguta swinene; vavasati va khume va ta sweka mbita yin'we, va mi phamela swona hi mpimo, kambe mi ta dya mi nga xurhi.

Mikiya 6:14

Mi ta dya, kambe a mi nga xurhi, mi ta tshama mi ri karhi mi twa ndlala minkarhi hinkwayo; mi ta ringeta ku fihla leswi mi nga na swona, kambe swi nga ka swi nga poni; leswi swi nga ta va swi ponile, ndzi ta swi herisa hi tinyimpi.

Duteronoma 11:15

Mi ta dya mi xurha; hambi swi ri swifuwo swa n'wina, HOSI Xikwembu xi ta swi mirisela byanyi bya swona.

Pisalema 67:5

Vanhu va matiko a va ku dzunise we Xikwembu, hinkwavo a va ku dzunise.

Levhitika 25:19

Tiko ra n'wina ri ta mi mirisela swakudya, kutani mi ta dya mi xurha, mi tshama mi hlayisekile.