Yoxuwa 24:19 - BIBELE Mahungu Lamanene

¹⁹ Kambe Yoxuwa a ku ka Vaisraele: “Mi nge swi koti ku tirhela HOSI Xikwembu, hikuva i Xikwembu xo hlawukeka, lexi xi lavaka ku tirheriwa xi ri xoxe; xi nga ka xi nga mi rivaleri milandzu ni swidyoho swa n'wina.

Xitsonga (Bibele)

¹⁹ Yoxuwa a ku eka tiko: “Mi nga ka mi nga tirheli Yehovha, hikuva i Xikwembu lexo kwetsima, i Xikwembu xa rilondzo: Xi nga ka xi nga rivaleli milandzu ya n'wina ni swivi swa n'wina.

Yoxuwa 24:19 Referans Kwoze

Esaya 5:16

Kambe HOSI Xikwembu xa matimba hinkwawo xi ta dzunisiwa, hikuva xi avanyisa hi ku lulama; hi xona Xikwembu lexo kwetsima lexi kombaka ku hlawuleka ka xona hi ku endla leswi lulameke.

Eksoda 23:21

Yingisani ntsumi leyi, mi endla leswi yi nga ta swi vula; mi nga tshuki mi ala swileriso swa yona, hikuva yi nga ka yi nga mi tsetseleli loko mi tiarisa, naswona yi tirha hi vito ra mina.

Pisalema 99:9

Twarisani HOSI Xikwembu xa hina, xi nkhinsameleni entshaveni ya xona leyo hlawuleka, hikuva xona xi kwetsimile.

Pisalema 99:5

Twarisani HOSI Xikwembu xa hina, xi nkhinsameleni laha xi tikombaka kona. HOSI Xikwembu hi xona ntsena xi kwetsimeke!

Levhitika 19:2

ku ya tivisa ntshungu hinkwawo wa Vaisraele marito ya xona lama nge: “Hlawulekani, hikuva ndzi hlawulekile mina HOSI, Xikwembu xa n'wina.

Eksoda 20:5

u nga tshuki u swi nkhinsamela, kumbe ku swi tirhela, hikuva mina HOSI Xikwembu xa wena, ndzi Xikwembu xa rilaveta: Ndzi ba lava va ndzi vengaka kun'we ni vana va vona, ku fika eka rixaka ra vona ra vunharhu ni ra vumune.

1 SAMIELE 6:20

Vavanuna va Beta-Xemexe va ku: “Xana i mani la nga yimaka emahlweni ka HOSI, Xikwembu lexo hlawuleka, xana? Loko hi lava ku xi susa laha ka hina, xana hi ta xi yisa kwihi ke?”

Eksoda 34:14

“Mi nga tshuki mi nkhinsamela swikwembu swin'wana, hikuva mina HOSI, vito ra mina hi mina Xikwembu-xa-rilaveta, ndzi Xikwembu lexi lavaka ku gandzeriwa xi ri xoxe ntsena.

Matewu 6:24

“A ku na munhu loyi a nga kotaka ku tirhela tihosi timbirhi; hikuva ú ta venga yin'wana, a rhandza leyin'wana. Mi nge koti ku tirhela Xikwembu ni rifuwo ra misava.

Esaya 30:15

HOSI N'wini wa hinwaswo, Muhlawuleki wa Israele, ú mi byerile, a ku: “Tlhelelani eka mina, mi tshama mi ku whíí, ndzi ta mi ponisa, loko mi va vanhu lavo rhula, lava va ndzi tshembaka, mi ta kuma matimba.” Kambe n'wina a mi pfumelanga,

Esaya 30:11

tshikani leswi mi swi endlaka, mi nga ha tirhi ntirho lowu, mi nga ha hi byeli nchumu hi ta Muhlawuleki wa Israele.’ ”

2 TIKRONIKA 36:16

Kambe vanhu va kona va yile emahlweni va sandza malandza ya Xikwembu, va ala ku amukela marito ya xona, va hlekula vaprofeta va xona, ku kondza HOSI Xikwembu xi chululela vukari bya xona ehenhla ka vona, ku pfumaleka ni loyi a ponaka eka byona.

1 SAMIELE 3:14

Sweswi ke, ndzi tiyisa hi ku hlambanya eka va rixaka ra Heli, ndzi ri: Swidyoho swa vona swi nga ka swi nga rivaleriwi ni siku ni rin'we, hambi hi magandzelo, hambi hi timhamba!”

Rhuti 1:15

“Languta”, ku vula Nahumi, “makwenu ú tlhelele karikwavo ni le ka swikwembu swa ka vona. Tlhela na wena, u landza makwenu!”

Yoxuwa 24:23

Yoxuwa a ku: “Loko swi ri tano, hambanani ni swikwembu leswi swi nga exikarhi ka n'wina, mi tinyiketa eka HOSI Xikwembu xa Israele hi timbilu ta n'wina hinkwato.”

Levhitika 20:26

“Hlawulekani, mi tirhela mina ntsena, hikuva ndzi hlawulekile mina HOSI; ndzi mi hlawurile exikarhi ka vanhu va matiko man'wana leswaku mi va va mina.

Levhitika 10:3

Kutani Muxe a ku ka Aroni: “Leswi hi swona HOSI Xikwembu a xi vula swona loko xi ku: ‘Lava va tshinelaka kusuhi na mina, va fanele ku ndzi chava, Vaisraele hinkwavo va fanele ku ndzi dzunisa.’ ” Loko a ri Aroni, a tikhoma a miyela.

Habakuku 1:13

Mahlo ya wena a ma tsakeli ku hlalela leswo biha, hikuva ma tengile ngopfu; a wu languti leswo biha, u nga endli nchumu. Kutani ke, hikwalaho ka yini u languta ntsena vaxisi, u miyelela yini loko lavo biha va mita vanhu-kulobye lava lulameke ku tlula vona ke?

Esaya 27:11

Loko marhavi ya kona ma ta va ma omile, ma ta tshoveka ma wa, kutani vavasati va ta tshivela ndzilo ha wona. Vanhu lava a va twisisi, hikokwalaho muendli wa vona a nge va tweli vusiwana, a nga ka a nga va tsetseleli, muvumbi wa vona.

Eksoda 34:7

lexi kombaka tintswalo leti to tshembeka ku fika eka rixaka ra khume ra madzana, lexi rivalelaka milandzu, ni ku tiarisa, ni swidyoho, kambe xi nga tshikiki ku ba lava dyoheke, ku fika eka vana va vona, ni ka vatukulu va vona ku yisa erixakeni ra vunharhu ni ra vumune.”

Levhitika 20:7

Hikokwalaho, hambanani ni mikhuva yo tano, mi va lava hlawulekeke: Hi mina HOSI, Xikwembu xa n'wina.

Yoxuwa 24:18

Vaamori hinkwavo lava a va tshama etikweni leri, HOSI Xikwembu xi va hlongorile va suka emahlweni ka hina; kutani na hina hi ta tirhela HOSI Xikwembu, hikuva hi xona Xikwembu xa hina.”

Pisalema 99:3

We HOSI, vanhu a va ku dzunise, hikuva vukulu bya wena bya chavisa, hi wena ntsena la kwetsimeke.

Nahume 1:2

HOSI i Xikwembu xa rilondzo, lexi rihisetaka. HOSI ya rihiseta, ya kariha; HOSI yi tirihisela eka valala va yona, yi karihela lava va yi vengaka.

Levhitika 11:44

hikokwalaho, tivoneleni leswaku mi va lava hlawulekeke, hikuva mina ndzi hlawulekile. Mi nga tshuki mi tinyamisa hi ku dya xihadyana xihi na xihi lexi kokovaka emisaveni.

Levhitika 11:45

Hi mina HOSI Xikwembu; ndzi mi humesile etikweni ra Egipta leswaku ndzi va Xikwembu xa n'wina; hikokwalaho mi fanele ku va lava hlawulekeke, hikuva mina ndzi hlawulekile.”

Esaya 2:9

Vanhu lava hinkwavo va ta tsongahatiwa, va khomisiwa tingana; va nga ka va nga rivaleriwi!