Yohane 20:22 - BIBELE Mahungu Lamanene

²² Loko a vurise sweswo, a va huhutela, a ku: “Amukelani Moya lowo Kwetsima.

Testamente Leyimpsha Xichangana

²² Loko avulise svosvo, avahuhutela, aku: “Yamukelani Moya Lowokwetsima.

Xitsonga (Bibele)

²² Kuteloko a vurise sweswo, a huhutela eka vona, a ku: “Amukelani Moya lowo Kwetsima.

Yohane 20:22 Referans Kwoze

Ntirho 33:4

hikuva Moya wa Xikwembu, hi wona wu ndzi vumbeke, Lowa-matimba-hinkwawo ú ndzi huhutele wona, a ndzi nyika vutomi.

Genesa 2:7

Kutani HOSI Xikwembu xi vumba munhu hi ntshuri wa misava, xi huhutela moya lowu nyikaka vutomi etinhompfini ta yena, kutani munhu a va xivumbiwa lexi hanyaka.

Timhaka 19:2

kutani a va vutisa a ku: “Xana mi amukerile Moya lowo Kwetsima siku mi pfumeleke xana?” Va ku ka yena: “E-e, a hi si twa leswaku ku ni Moya lowo Kwetsima.”

Timhaka 8:15

loko vona va fikile, va khongelela vapfumeri leswaku va nyikiwa Moya lowo Kwetsima,

Timhaka 2:38

Petro a ku ka vona: “Hundzukani, kutani un'wana ni un'wana wa n'wina a khuvuriwa hi vito ra Yesu Kriste, leswaku mi rivaleriwa swidyoho swa n'wina; kutani mi ta amukela nyiko, wu nga Moya lowo Kwetsima,

Ezekiele 37:9

Hiloko Xikwembu xi ndzi lerisa xi ku: “We Ezekiele, vitana moya wa vutomi, u wu byela leswaku mina HOSI N'wini wa hinkwaswo ndzi ni rito eka wona leri nge: ‘Wena moya wa vutomi , tana u huma ematlhelweni ya mune ya misava, u ta u ta nghena eka mintsumbu ya vanhu lava, leswaku va tlhela va kuma ku hanya!’ ”

Pisalema 33:6

HOSI Xikwembu xi endle matilo hi rito ra xona, xi lo lerisa kunene, kutani dyambu ni n'weti ni tinyeleti, swi va kona hinkwaswo.

Timhaka 2:4

Hinkwavo va tala hi Moya lowo Kwetsima, kutani va sungula ku vulavula hi tindzimi tin'wana, hilaha Moya wu nga va nyika ku vulavula hakona.

Yohane 7:39

Hi ku vula sweswo, a a ringanisa Moya lowu lava pfumeleke eka yena va nga ta nyikiwa wona. Ku fikela nkarhi wolowo, Moya lowo Kwetsima a wu nga si nyikiwa, hikuva Yesu a a nga si tlakusiwa.

Vagalatiya 3:2

Ndzi byeleni mhaka leyi yin'we ntsena: Xana mi nyikiwile Moya hileswi mi hlayiseke Nawu xana, kumbe xana hileswi mi pfumeleke Evhangeli, siku mi nga yi twa ke?

Timhaka 4:8

Kavaloko Petro a tala hi Moya lowo Kwetsima, a ku ka vona: “Tihosi, na n'wina vakulukumba va tiko!

Timhaka 10:47

“I mani la nga alaka sweswi leswaku vanhu lava va khuvuriwa hi mati, leswi va amukeleke Moya lowo Kwetsima kukotisa hina ke?”

Yohane 15:26

“Siku ku nga ta fika Muyimeri, loyi ndzi nga ta mi rhumela yena a ta hi le ka Tatana, a nga Moya wa ntiyiso lowu humaka eka Tatana, ú ta humesa vumbhoni ehenhla ka mina;

Yohane 14:16

Ndzi ta kombela Tatana, kutani yena ú ta mi nyika Muchaveleri un'wana, loyi a nga ta va na n'wina hilaha ku nga heriki,

Yohane 16:7

Hambiswiritano, ndza mi byela ntiyiso: Swi ta va swinene eka n'wina loko ndzi famba. Hikuva loko ndzi nga fambi, Muyimeri a nga ka a nga ti eka n'wina; kambe loko ndzi famba, ndzi ta n'wi rhumela a ta eka n'wina.

Yohane 20:21

Yesu a engeta a ku ka vona: “Ku rhula a ku ve na n'wina! Tanihi leswi Tatana a ndzi rhumeke, na mina ndza mi rhuma.”

Yohane 20:23

Loko mi rivalela vanhu swidyoho swa vona, va ta rivaleriwa hakunene; loko mi nga rivaleli vanhu swidyoho swa vona, a va nga rivaleriwi.”