Yeremiya 8:5 - BIBELE Mahungu Lamanene

⁵ Vanhu lava va Yerusalema va tiarisela yini, hikwalaho ka yini va tshamela ku tinonon'whisa ke? Va namarhela swikwembu swa hava, va ala ku hundzuka!

Xitsonga (Bibele)

⁵ Tiko leri ra Yerusalema, ri hambuka hikwalaho ka yini hi ku hambuka loku nga heriki xana? Va titiyisa hi mano ya vona ha yini, kutani va alela yini ku hundzuka xana?

Yeremiya 8:5 Referans Kwoze

Yeremiya 9:6

Va tlhandleka tihanyi ehenhla ka tihanyi, kutani va ala ku ndzi tiva; ndzi vula sweswo mina HOSI.”

Yeremiya 5:3

We HOSI, u tsakela ku vona munhu la nga ni ntiyiso. Vanhu lava u va bile, kambe a va twanga ku vava. U lavile ku va herisa, kambe va arile ku tshinyiwa. Va tiomisile tinhloko, va nga pfumeli ku hundzuka.

Zakariya 7:11

Kambe vanhu va arile ku yingisa switsundzuxo leswi: Va swi be hi makatla, va tisiva tindleve leswaku va nga swi twi,

Vaheveru 12:25

Tivoneleni leswaku mi nga aleli loyi a vulavulaka. Lava aleke ku yingisa mutsundzuxi wa vona laha misaveni, a va ponanga. Hikokwalaho, xana hina hi nga ponisa ku yini, loko hi ala ku yingisa loyi a hi tsundzuxaka a ri ematilweni xana?

Yohane 5:40

Kutani a mi swi lavi ku ta eka mina leswaku mi ta kuma vutomi.

Hosiya 11:7

Vanhu va mina va ni ntolovelo wa ku ndzi fularhela, hikokwalaho va rhwexiwile mpingu, ku hava loyi a nga ta va rhula wona.

Yeremiya 5:27

Tindlu ta vona ti tele hi swa vukanganyisi, tanihi xirhundzu lexi taleke hi tinyanyana leti phasiweke. Vanhu lava va fumile ngopfu,

Esaya 44:20

Munhu wo tano, swo fana ni loko a dya nkuma; ú kanganyisiwa ni ku lahlekisiwa hi miehleketo ya yena; a nga swi koti ku tintshunxa entlhan'wini wa kona, kumbe ku tivutisa a ku: “Xana a ndzo tikanganyisa hi xilo lexi ndzi xi khomeke xana?”

Esaya 30:10

Va byela vamavonakule, va ku: ‘Mi nga ha vhumbhi nchumu.’ Va byela ni vaprofeta, va ku: ‘Mi nga ha hi byeli ntiyiso, kambe hi byeleni leswi nga ta hi tsakisa, leswi hi navelaka ku twa swona ntsena;

Nhlavutelo 2:25

Ntsena khomelelani mi tiya eka leswi mi nga na swona, ku kondza ndzi ta.

1 Vatesalonika 5:21

kambe kambisisani hinkwaswo, mi tiya eka leswinene.

Hosiya 4:16

Hakunene vanhu va Israele va tinonon'hwisa, va fana ni thokazi ro karhata; xana HOSI Xikwembu xi nga va yisa emadyelweni lamanene wonge hiloko va ri swinyimpfana, ke?

Yeremiya 2:32

Nhwanyana a nga ka a nga rivali vuhlalu bya yena, na rona hlomisa ri nge rivali swiambalo swa rona swa nkhuvo. Kambe n'wina vanhu va mina, i khale swinene mi ndzi rivarile.

Esaya 1:20

kambe loko mi tiarisa mi ndzi fularhela, mi ta herisiwa hi fumu. Ndzi vulavurile, mina HOSI!”

Swivuriso 4:13

Hlayisa swiletelo, u nga swi tshiki; swi sirhelele, hikuva hi byona vutomi bya wena.

Yeremiya 5:6

Hikokwalaho ku ta huma nghala exihlahleni yi va dlaya, hlolwa ro ta hi le mananga ri ta va herisa; yingwe leyi tumbeleke kusuhi ni miti ya vona yi ta khoma hinkwavo lava humaka kona, yi va handzulela. Va tivangele sweswo hi ku dyohela HOSI Xikwembu, va xi fularhela minkarhi leyo tala.

Yeremiya 14:7

Vanhu va huwelela va ku: “We HOSI, hi dyohile emahlweni ka wena, hi tlhelele ndzhaku minkarhi yo tala, mintirho ya hina leyo biha ya hi mangalela. Hambiswiritano hi pfune hikwalaho ka vito ra wena.

Daniele 9:11

Hina hinkwerhu Vaisraele, hi tlurile nawu wa wena hi wu tshika, hi ala ku yingisa rito ra wena. Hikokwalaho leswi hi ku dyoheleke we Xikwembu, hi weriwile hi ndzhukano lowu Muxe nandza wa wena a wu tsaleke eNawini, lowu a wu tiyiseke hi ku hlambanya.

Yeremiya 3:5

U te ka mina: ‘Xana u ta ndzi hlundzukela ni ku ndzi karihela minkarhi hinkwayo xana?’ Sweswo u swi vurile hi nomo ntsena, hikuva u yile emahlweni u endla leswo biha hinkwaswo.”

Yeremiya 6:17

Ndzi vekile varindzi etikweni ndzi ku ka vona: ‘Mi yingisela mpfumawulo wa mhalamhala!’ kambe vona va hlamula va ku: ‘A hi nga tikarhateli swona.’

Yeremiya 6:19

Wena misava yingisa: Vanhu lava ndzi ta va vangela makhombo. Va ta tshovela leswo biha leswi va swi byaleke, hikuva a va yingisanga marito ya mina, ni nawu wa mina va arile ku wu landza.

Hosiya 11:5

Va ta tlhelela etikweni ra Egipta, kutani va ta fumiwa hi hosi ya Vaasiriya, hikuva va arile ku vuyela eka mina.

Hosiya 13:2

Ku dyoha ka vona ku ya ku nyanya: Va n'okisa silivhere ya vona, va tivumbela swikwembu swa swifaniso; swifaniso leswi, va swi endla hi vukheta, hinkwaswo swi vumbiwa hi lava tivaka maendlele ya kona. Kutani van'wana va vulavula ha vona, va ku: “Vanhu lava va nga eku humeseni ka gandzelo, va ntswontswa rhole!”