Yeremiya 32:44 - BIBELE Mahungu Lamanene

⁴⁴ Etikweni ra ka Benjamini, ni le mitini leyi rhendzelaka Yerusalema, ni le mitini ya le magangeni ni ya le timbaleni ni ya le dzongeni, vanhu va ha ta humesa mali va xava masimu; va ha ta tsala mavito ya vona epapileni ra vun'wini, va ri fungha emahlweni ka timbhoni, hikuva mina HOSI ndzi tiboha ku tlhela ndzi va katekisa.”

Xitsonga (Bibele)

⁴⁴ Masimu ma ta xaviwa hi mali, va ta tsala matsalwa ya nxavo, va ma tiyisa, va teka timbhoni, etikweni ra Benjamini ni le matlhelweni ya Yerusalema, ni le mitini ya Yuda, ni le mitini ya le ntshaveni, ni le mitini ya le rivaleni, ni le mitini ya tlhelo ra n'walungu; hikuva ndzi ta vuyisela lava khomiweke va vona, ku vula Yehovha.”

Yeremiya 32:44 Referans Kwoze

Yeremiya 17:26

Vanhu va ta ta va huma emitini ya Yuda ni le tindhawini leti rhendzeleke Yerusalema; van'wana va ta huma etikweni ra Benjamini, ni le timbaleni, ni le magangeni, ni le dzongeni. Vanhu lava va ta humesa magandzelo lama hisiwaka ya nyama ni ya mapa ni ya mirhi ya risuna, va humesa ni minkhenso endlwini ya mina HOSI.

Yeremiya 33:26

a ndzi ta tshika ni vatukulu va Yakobo na Davhida, ndzi nga veki un'wana wa ka Davhida a fuma yindlu ya Abrahama na Isaka na Yakobo. Kambe mina ndzi ta tlhela ndzi va katekisa, ndzi va twela vusiwana.”

Yeremiya 33:11

Hambiswiritano etindhawini teto, ku ta tlhela ku twakala minkulungwana, ni huwa ya ntsako, ni mpfumawulo wa minkhuvo ya vukati, ni tinsimu ta lava tisaka minkhenso ya vona eTempeleni, va ri karhi va yimbelela va ku: “ ‘Dzunisani HOSI ya matimba hinkwawo, hikuva yi ni vunene, rirhandzu ra yona hi leri nga heriki!’ “Hakunene ndzi ta pfuxa xivandla lexi, kutani xi ta kateka ku fana ni khale.

Yeremiya 33:7

Va ka Yuda ni Vaisraele, ndzi ta tlhela ndzi va katekisa, ndzi va tiyisa ku fana ni khale.

Yeremiya 32:10

Ndzi tsala vito ra mina emapapileni ya vun'wini, ndzi fungha rin'we emahlweni ka timbhoni, kutani ndzi pima silivhere exikalwini.

Yeremiya 32:37

Yingisani! Vanhu va wona ndzi ta va hlengeleta va huma ematikweni hinkwawo lawa ndzi va hangalaseke va ya eka wona, siku ndzi va hlundzukeleke ni ku va karihela; ndzi ta va vuyisa exivandleni lexi, ndzi va nyika ku tshamiseka eka xona.

Esaya 44:26

Kambe leswi malandza ya mina ma swi tivisaka, ndza swi tiyisa, ni makungu lawa varhumiwa va mina va ma twarisaka, ndzi endla leswaku ma humelela. Hi tlhelo ra muti wa Yerusalema, ndzi ri: ‘Wu ta tlhela wu va ni vanhu.’ Hi tlhelo ra miti ya Yuda, ndzi ri: ‘Yi ta akiwa hi vuntshwa, ndzi ta yi pfuxa.’

Yeremiya 13:19

Miti ya le dzongeni yi rhendzeriwile hi valala, a ka ha ngheni munhu eka yona; va ka Yuda va yisiwa evukhumbini, va famba hinkwavo, ku nga sali na un'we.”

Yeremiya 30:3

hikuva nkarhi wa ta lowu ndzi nga ta tlhela ndzi katekisa vanhu va mina, va nga vona Vaisraele ni va ka Yuda. Ndzi ta va vuyisa etikweni leri ndzi ri nyikeke vatata wa vona, kutani va ta ri teka ri va ra vona; ndzi vula sweswo mina HOSI.”

Yeremiya 31:23

HOSI ya matimba hinkwawo Xikwembu xa Israele xi vurisa sweswo xi ri: “Siku ndzi nga ta tlhela ndzi katekisa tiko ra Yuda ni miti ya kona, vaaki va kona va ta tlhela va tirhisa marito lawa ya nge: “ ‘HOSI a yi ku katekise wena muti wa Xikwembu xo lulama, wena ntshava ya Muhlawuleki!’

Yeremiya 33:13

Emitini leyi nga magangeni, ni leyi nga timbaleni, ni leyi nga dzongeni, ni leyi nga tikweni ra Benjamini, ni leyi nga kusuhi ni muti wa Yerusalema, ni leyi nga tikweni ra Yuda, ka ha ta hlayiwa swifuwo loko swi vuya etshangeni. Ndzi vula sweswo mina HOSI.

Obadiya 1:19

Vanhu lava tshamaka edzongeni ra tiko ra Yuda va ta teka tiko ra va ka Esawu; lava nga vupeladyambu, va ta teka tiko ra Vafilista; va ta teka tiko ra va ka Efrayimi ni ra Samariya; va ka Benjamini vona va ta teka ra Giliyadi.

Obadiya 1:20

Vuthu ra Vaisraele lava yisiweke evukhumbini ri ta teka tiko ra Vakanana ku ya fika emutini wa Sarepta. Lava sukeke eYerusalema va yisiwa evukhumbini le Safarada, va ta teka miti leyi nga dzongeni.

Sofoniya 2:7

Tiko leri ri ta tekiwa hi va le Yuda lava poneke; va ta risela kona swifuwo swa vona; namadyambu va ta ya etlela etindlwini ta le Axikeloni, hikuva HOSI Xikwembu xa vona xi ta va tsetselela, xi tlhela xi va katekisa.

Zakariya 7:7

Marito lawa ma ha fana ni lawa HOSI Xikwembu xi ma twariseke hi milomo ya vaprofeta lavo rhanga; eminkarhini ya kona, vaaki va muti wa Yerusalema ni va swimitana leswi nga kusuhi, a va ha tele va tshamisekile; hambi va ri vanhu va le magangeni ni va le dzongeni a va ha tele.

Yeremiya 30:18

HOSI Xikwembu xi vurisa sweswo xi ri: “Ndzi ta tlhela ndzi katekisa mindyangu ya va ka Yakobo, miti ya vona ndzi ta yi twela vusiwana; muti wa Yerusalema wu ta tlhela wu akiwa exintshabyanini xa wona, na tona tindlu ta le ntsindza ti ta tlhela ti akiwa lomu a ti ri kona khale.