Yeremiya 2:23 - BIBELE Mahungu Lamanene

²³ “Mi nga vuli mi ku: ‘A hi tinyamisanga, a hi khongelanga swikwembu swa Baali!’ Tsundzukani hilaha mi dyoheke hakona eminkoveni, anakanyani leswi mi swi endleke: A mi tsutsuma mi ya hala ni hala ku fana ni kamela ya ntswele leyi lavaka nkuzi.

Xitsonga (Bibele)

²³ “U nga vurisa ku yini leswaku a ndzi tinyamisanga, a ndzi landzanga Baali xana? Languta mitila ya wena erivaleni; anakanya leswi u swi endleke, wena kamela ra matsambo leri tsutsumelaka lahaya ni lahaya.

Yeremiya 2:23 Referans Kwoze

Yeremiya 7:31

Va akile ndhawu yo gandzela eka yona le Tofete enkoveni wa va ka Hinomu, va dlaya vana va vona va xinuna ni va xisati, va humesa ha vona magandzelo lama hisiwaka. Mhaka leyi, a va lerisiwanga hi mina, a ndzi yi ehleketanga ni siku ni rin'we!

Swivuriso 30:12

Ku ni vanhu lava tivonaka va tengile, kasi va lo pyì, hi thyaka!

Varhoma 3:19

Ha swi tiva leswaku hinkwaswo leswi Nawu wu vulaka swona, swi kongoma lava nge hansi ka wona, leswaku vanhu hinkwavo va pfariwa milomo, ni leswaku misava hinkwayo yi yisiwa eku avanyisiweni emahlweni ka Xikwembu.

Luka 10:29

Kambe yena, hi ku navela ku tiendla la lulameke, a ku ka Yesu: “Munhu-kulorhi i mani xana?”

Yeremiya 31:22

N'wina vanhu vo ka va nga tshembeki, tshikani ku kanakana, hikuva HOSI Xikwembu xi tumbuluxile leswintshwa etikweni: Wansati ú ta tilavela wanuna!

Yeremiya 9:14

Va tiomisile tinhloko, va endla leswi va swi rhandzaka, va tirhela swikwembu swa Baali hilaha vatata wa vona va va dyondziseke hakona.

Yeremiya 3:2

Tlakusa mahlo u languta eswitsungeni. Xana yi kona ndhawu leyi u nga endlangiki swa vugangu bya wena eka yona xana? U tshamerile swigangu etindleleni ku fana ni Muarabu la tumbelelaka vanhu emananga. Vunghwavava bya wena lebyo chavisa byi nyamisile tiko hinkwaro.

Swivuriso 30:20

Wansati la oswaka, ú endlisa leswi: Ú dya a tlhela a tisula nomo, kutani a ku: “Mina, a ndzi endlanga nchumu xo biha.”

Swivuriso 28:13

Loyi a fihlaka swidyoho swa yena, a nge humeleli, kasi loyi a swi vulaka, kutani a hambana na swona, ú ta kuma tintswalo.

Pisalema 50:21

Swilo leswi mi swi endlile, kambe mina a ndzi hlamulanga nchumu; mi ehleketile leswaku ndzi yima na n'wina, kambe sweswi ndza mi tshinya, ndzi mi vona nandzu.

Pisalema 36:2

Ú tivona a lulamile ngopfu, kutani loko swidyoho swa yena swi tshuka swi paluxiwa, a nga swi vengi.

Estere 8:16

Vayuda a va vangama tinghohe, va yimbelela va tsakile, va titwa va ri vanhu.

Yeremiya 2:36

U hatlisa ngopfu ku hundzuluxa mikhuva ya wena. Tiva leswaku Vaegipta va ta ku khomisa tingana, ku fana ni leswi Vaasiriya va ku endleke swona.

Yeremiya 14:10

HOSI Xikwembu xi vula sweswo ehenhla ka vanhu lava, xi ri: “Va tsakela ku ndzi fularhela; a va tshami ehansi. Hikokwalaho mina HOSI a ndza ha va amukeli; swidyoho swa vona a ndzi nga swi rivali, ndzi ta va bela swona.”

Yeremiya 16:10

“Loko vanhu lava va twa marito lawa hinkwawo, va ta ku vutisa va ku: ‘Hikwalaho ka yini HOSI Xikwembu xi hi vangele makhombo lamakulu lawa xana? Xana hi dyohe yini? Hi endlile yini xo biha emahlweni ka HOSI Xikwembu xa hina xana?’

Hosiya 1:2

Loko HOSI Xikwembu xi sungula ku rhwexa Hosiya marito ya xona, xi te ka yena: “Leswi tiko ri endlaka vunghwavava lebyikulu hi ku fularhela mina HOSI, na wena yana u ya titekela nsati loyi a nga nghwavava, a ta ku velekela vana vo fana na yena.”