Yeremiya 13:25 - BIBELE Mahungu Lamanene

²⁵ Lexi hi xona xiphemu xa wena, we Yerusalema, lexi mina HOSI ndzi nga ku avela xona, hikuva u ndzi rivarile, u tshemba swikwembu swa mavunwa.

Xitsonga (Bibele)

²⁵ Hi kona ku averiwa ka wena, i nyiko leyi ndzi ku ringaniseleke yona, ku vula Yehovha hikuva u ndzi rivele, kutani u titshembele mavunwa.

Yeremiya 13:25 Referans Kwoze

Ntirho 20:29

Xikwembu xi ta herisisa sweswo munhu lowo homboloka, hi yona ndzhaka leyi xi n'wi aveleke yona.”

Matewu 24:51

kutani n'wini wa nandza loyi ú ta n'wi ba swinene, a n'wi cukumeta kun'we ni vakanganyisi, laha ku nga ta va ni minkosi, ni ku getsela ka meno.

Yeremiya 2:32

Nhwanyana a nga ka a nga rivali vuhlalu bya yena, na rona hlomisa ri nge rivali swiambalo swa rona swa nkhuvo. Kambe n'wina vanhu va mina, i khale swinene mi ndzi rivarile.

Pisalema 11:6

Lavo homboloka, yi va nisela mpfundze ni xivavula, mpandzwa wa vona i moya lowu hisaka.

Pisalema 9:17

Lavo homboloka va kongoma exivandleni xa vafi, va nga vamatiko hinkwavo lava nga riki na mhaka na Xikwembu.

Mikiya 3:11

Varhangeri va muti va pfumela ku xaviwa ehubyeni, vaprista va dyondzisela muholo ntsena, na vona vaprofeta va vhumbhela ku hakeriwa; hinkwavo va tisirhelela hi ku vula leswaku va nge humeleriwi hi nchumu xo biha, hikuva Xikwembu xi na vona.

Yeremiya 10:14

Hinkwavo lava va swi vonaka, va hlamala, va nga swi twisisi; lava tivaka ku n'okisa nsuku va vumba swikwembu, va ta khomisiwa tingana ha swona, hikuva swifaniso leswi a hi swa ntiyiso, ni ku hefemula a swi hefemuli.

Yeremiya 2:13

hikuva vanhu va mina va ndzi dyoherile kambirhi: Va ndzi tshikile mina ndzi nga xihlovo xa mati lama khulukaka, kutani va tikovotlele makhele yo hlayisela mati, kambe makhele ya kona a ma pfunanga nchumu, hikuva a ma pandzekile.”

Esaya 28:15

Mi tidzunisa, mi ku mi endlile ntwanano ni rifu, ni leswaku xivandla xa vafi i munghana wa n'wina; mi tshemba leswaku khombo lero chavisa leri taka ri ta hundza hi le kule, hikuva mi teka mavunwa mi ma endla khokholo, mi tiendlela xisirhelelo hi ku xisa van'wana.

Esaya 17:4

“Eminkarhini yoleyo, va ka Yakobo va ta ondza, va ta sala marhambu ntsena.

Varhoma 1:25

Va tshikile ntiyiso wa Xikwembu, va landza mavunwa, va gandzela ni ku tirhela leswi vumbiweke, ematshan'wini ya Muvumbi loyi a fanelaka ku vongiwa hi masiku ni masiku. Amen!

Esaya 34:17

HOSI Xikwembu xi swi avela tindhawu, xi swi bela ni mindzilekana; tiko ra Edomu ri ta va kaya ra swona hilaha ku nga heriki, swi ta tshama eka rona minkarhi hinkwayo.

Esaya 65:7

Mina HOSI Xikwembu ndzi ri, ndzi ta va bela swidyoho swa vona, ni swa vatata wa vona, hikuva va hisile mirhi ya risuna etintshaveni, va tlanga hi vito ra mina va ri swintshabyanini; ndzi ta va ba ndzi va bela ni leswi va swi endleke khale.”

Yeremiya 3:21

Ku twakala xirilo eswitsungeni; i xa Vaisraele lava tisolaka hi mihloti, hikuva va hambukile endleleni ya ntiyiso, va rivala HOSI Xikwembu xa vona.

Sofoniya 3:2

a wu twi ku byeriwa, naswona a wu amukeli switsundzuxo; a wu tshembi HOSI Xikwembu, ni le kusuhi na xona, a wu tshineli.

Yeremiya 18:15

Kambe vanhu va mina vona va ndzi rivele, kutani va hisela swikwembu swa hava emirhi ya risuna. Swikwembu leswi swi va khugula va wa, va tshika ndlela ya vona ya khale, kutani va sungula ku chochovela hi nhova ematshan'wini yo famba hi gondzo leri lulamisiweke.

Ezekiele 23:35

Hikokwalaho ndzi ri, leswi u ndzi tshikeke u ndzi fularhela, u fanele ku rhwala nandzu wa manyala ya wena ni wa vunghwavava bya wena.”