Yeremiya 11:23 - BIBELE Mahungu Lamanene

²³ Lembe leri ndzi nga ta ba vanhu va le Anatoto ha rona, ndzi ta va vangela makhombo, va hela hinkwavo ku nga sali na un'we!”

Xitsonga (Bibele)

²³ Ku nga ka ku nga phonyoki na un'we wa vona, hikuva ndzi ta vangela vanhu va Anatoto khombo hi lembe ra ku biwa ka vona.’ ”

Yeremiya 11:23 Referans Kwoze

Yeremiya 23:12

Hikokwalaho tindlela ta vona ti ta rheta; va ta susumetiwa exinyamini va wela hansi. Siku ndzi va tshinyaka, ndzi ta va vangela makhombo, ku vula mina HOSI.

Luka 19:44

va ta ku hirimuxela hansi, va herisa ni lava akeke ka wena; kutani valala va nga ka va nga tshiki ribye ehenhla ka ribye laha ka wena, hikuva a wu tivanga nkarhi lowu u endzeriweke ha wona.”

Mikiya 7:4

Lava tlulaka van'wana hi vunene, va kota xigatlu, lavo lulama ngopfu va fana ni rihlampfu ra mitwa. Nkarhi wa vona wa ku biwa, lowu vaprofeta va va byeleke wona, wu fikile, kutani sweswi va hlangane tinhloko.

Hosiya 9:7

Nkarhi wa ku biwa wu fikile, un'wana ni un'wana ú ta kuma hakelo ya yena. N'wina va tiko ra Israele mi ta swi tiva. Eka n'wina, muprofeta wa hlanya, wanuna loyi a nga ni Moya wa Xikwembu, eka n'wina ú ni rihuhe! Swi tano hi mhaka ya swidyoho swa n'wina leswo tala, ni rivengo ra n'wina lerikulu.

Yeremiya 50:27

Tinhenha ta yena hinkwato a ti dlayiwe, a ti byiseriwe eku tlhaviweni kukota swifuwo; siku ra tona ra khombo ri fikile, wu tile nkarhi wa tona wa ku biwa.

Yeremiya 48:44

Loyi a tsutsumaka khombo, ú ta wela ekheleni, la khandziyaka a huma ekheleni, ú ta phasiwa hi ntlhamu. Ndzi ta vangela tiko ra Mowabu emaxangu lawa, siku ndzi ri baka. Ndzi vula sweswo mina HOSI!

Yeremiya 46:21

Masocha lawa va ma tholeke ma tsakisa kukota marhole lama noneke; kambe na wona ma ta tlhela hi ku tsutsuma, ma tsandzeka ku va lwela. Siku ra wona ra ku biwa ri fikile, wu tile nkarhi wa mina wa ku ma avanyisa.

Yeremiya 44:27

Vanhu lava, ndzi ta hatla ndzi va vangela makhombo, ematshan'wini ya ku va katekisa. Vavanuna hinkwavo va ka Yuda lava nga tikweni ra Egipta, va ta dlawa hi matlhari ni tindlala va kondza va hela.

Yeremiya 11:19

Khale a ndzi fana ni xinyimpfana lexi yisiwaka eku tlhaviweni xi nga tivi nchumu; a ndzi nga swi tivi leswaku ku ni lava va ndzi tshamaka xikungu va lava ku ndzi dlaya. A va ku: “Hi ta lovisa murhi lowu ni mihandzu ya wona, hi ta wu tsema wu suka emisaveni ya lava hanyaka, vito ra wona ri nga ha tsundzukiwi hi munhu!”

Yeremiya 8:12

Xana ku endla swa manyala leswi, swi va khomisile tingana xana? E-e, a va nyumanga ha swona niswitsanana, a swi va twisanga ku vava. Hikokwalaho na vona va ta hluriwa ku fana na van'wana esikwini leri ndzi nga ta va avanyisa, va ta wela hansi va nga ha pfuki. Ndzi vula sweswo mina HOSI.”

Yeremiya 6:9

HOSI ya matimba hinkwawo yi vurisa sweswo yi ri: “Khwajani masalela ya Vaisraele mi va hlengeleta, mi fana ni vatshoveri loko va phendla-phendla marhavi, va nga siyi nchumu emirhini ya vhinya.”

Yeremiya 5:29

Hikokwalaho mina HOSI ndzi ri: Vanhu lava ndzi ta va ba, rixaka lero tano, ndzi ta tirihisela eka rona.”

Yeremiya 5:9

Hikokwalaho mina HOSI ndzi ri: Vanhu lava ndzi ta va ba hakunene, rixaka lero tano, ndzi ta tirihisela eka rona!

Obadiya 1:18

Va ka Yakobo ni va ka Yosefa va ta fana ni ndzilo, ni malangavi ya wona: Va ta hisa va ka Esawu va tshwa va hela kukota mavivi; eka va ka Esawu, a ku nga poni na un'we, ndzi vurisa sweswo, mina HOSI.”