Yeremiya 11:15 - BIBELE Mahungu Lamanene

¹⁵ Xana varhandziwa va mina va ha lava yini endlwini ya mina, leswi lavo tala exikarhi ka vona va endlaka mintirho leyo biha, xana? Va rhwala tinyama leto hlawuleka, va ti yisa kule na n'wina. Loko khombo ri mi fikela, mi ta tsaka ke?

Xitsonga (Bibele)

¹⁵ “Murhandziwa wa mina wa ha ri ni mhaka yihi endlwini ya mina, loko va ri karhi va endla manyala lamanyingi kona xana? Kambe nyama leyi hlawulekeke yi ta susiwa eka wena. Kakuloko u endla ku biha, hi kona u tsakaka.”

Yeremiya 11:15 Referans Kwoze

Swivuriso 2:14

lava tsakisiwaka hi ku endla swo biha, va tsakela mahanyelo layo homboloka;

Tito 1:15

Swilo hinkwaswo swi tengile eka lava tengeke; kambe a ku na lexi tengeke eka lava nyameke, ni ka lava nga pfumeriki, hikuva miehleketo ya vona ni mapfalo ya vona swi nyamisiwile.

Yakobo 4:16

Kambe n'wina ma tidzunisa, hi mhaka ya n'wina ya ku titiva ngopfu. Ku tidzunisa hinkwako loko tano ku bihile.

1 Vakorinto 13:6

rirhandzu a ri tsakeli ku homboloka, kambe ri tsakisiwa hi ntiyiso.

Varhoma 11:28

Leswi Vaisraele va nga ala Mahungu Lamanene, i valala va Xikwembu, ku pfuna n'wina vamatiko; kambe leswi va nga hlawuriwa hi xona, i varhandziwa va xona hikwalaho ka vakokwa wa vona;

Luka 8:28

Loko a vona Yesu, a huwelela, a tiwisela hansi emahlweni ka yena, a tlakusa rito a ku: “Mhaka ya mina na wena hi yihi ke, wena Yesu N'wana wa Xikwembu xa le henhla-henhla? Ndza ku khongela, u nga ndzi xanisi.”

Matewu 22:11

“Kuteloko hosi yi nghenile ku ta languta lava tshamiseke eswakudyeni, yi vona munhu la nga ambalangiki xiambalo xa nkhuvo;

Hosiya 3:1

Kutani HOSI Xikwembu xi ku ka mina: “Tlhela u ya rhandzana ni wansati wa muoswi loyi a tsakeriwaka hi xigangu xa yena. Leri hi rona rirhandzu leri mina HOSI ndzi rhandzaka vanhu va tiko ra Israele ha rona, hambileswi vona va ndzi dyohelaka hi ku landza swikwembu swin'wana, va tsakela ni swimbhundzwa swa mihandzu ya vhinya leyi omisiweke.”

Yeremiya 15:1

HOSI Xikwembu xi ndzi byerile xi ku: “Vanhu lava a ndzi nga va tsetseleli, hambiloko Muxe na Samiele va nga ta emahlweni ka mina va va khongelela. Va hlongole va suka emahlweni ka mina!

Yeremiya 12:7

HOSI Xikwembu xi ri: “Ndzi tshikile vanhu va mina, vahlawuriwa va mina, ndzi va cukumetile; varhandziwa va mbilu yanga ndzi va nyiketile emavokweni ya valala va vona.

Yeremiya 3:14

HOSI Xikwembu xi ri: “N'wina vanhu va mina vo ka va nga tshembeki, vuyani, hikuva ndzi N'wini wa n'wina. Emutini wun'wana ni wun'wana ndzi ta hlawula munhu un'we, ni ka nyimba yin'wana ni yin'wana ndzi ta hlawula vambirhi, kutani ndzi ta mi tlherisela emutini wa Siyoni.

Yeremiya 3:8

U vonile leswaku ndzi tshikile Israele la nga tshembekiki hikwalaho ka vunghwavava bya yena. Kambe Yuda lowa mukanganyisi a nga chavisiwanga hi swona; na yena ú lo ya emahlweni a tilavela swigangu.

Yeremiya 2:2

“Famba u ya huwelela emahlweni ka vanhu va Yerusalema, u va byela leswaku mina HOSI ndzi ri: “ ‘Ndzi anakanya ku tshembeka ka n'wina loko ma ha ri lavantshwa, ni rirhandzu ra n'wina loko ma ha ku hloma, ni hilaha a mi ndzi namarhela hakona emananga, lomu ku nga byariwiki nchumu.

Esaya 50:1

HOSI Xikwembu xi vurisa sweswo xi ri: “Mi ehleketa leswaku ndzi mi tshikile, n'wina Vaisraele, ku fana ni wanuna la hlongolaka nsati wa yena; loko swi ri tano, ri kwihi papila leri tiyisaka mhaka ya kona, xana? Mi anakanya leswaku ndzi mi yisile evuhlongeni, ku fana ni munhu la rihaka swikweleti hi vana va yena; xana ndzi mi nyikete eka mani? Swidyoho swa n'wina, hi swona swi nga mi yisa evuhlongeni, mi tshikiwile hi mhaka ya milandzu ya n'wina kukota wansati la hlongoriweke evukatini.

Swivuriso 28:9

Loyi a pfalaka tindleve, a nga lavi ku twa nchumu hi nawu, HOSI Xikwembu na xona, a xi nga twi swikhongelo swa yena.

Swivuriso 26:18

Munhu loyi a xisaka muakelani, kutani a ku: “A ndzo ku vungunya”, ú fana ni munhu wa rihuhe loyi a hoxetelaka van'wana hi swilo leswi dlayaka ku fana ni swisana swa ndzilo ni miseve.

Swivuriso 21:27

Magandzelo ya munhu wo homboloka, HOSI Xikwembu xa ma venga, ngopfu-ngopfu loko a ma humesa a ri ni xikongomelo xo biha.

Swivuriso 15:8

Magandzelo ya munhu wo homboloka, HOSI Xikwembu xa ma nyenya, kambe xi tsakela xikhongelo xa munhu wo lulama.

Swivuriso 10:23

Xiphunta xi hungasa hi ku endla swa manyala, kasi munhu la twisisaka ú hungasa hi mintirho ya vutlhari.

Pisalema 50:16

Kambe eka lavo homboloka, Xikwembu xi ri: “Milawu ya mina, mi yi hlayela yini, mi vulavulela yini hi ta ntwanano wa mina,

Pisalema 60:5

Hi ponise hi matimba ya wena u hi hlamula, kutani hina varhandziwa va wena hi ta hlayiseka.

Yeremiya 13:27

Vuoswi lebyi u byi endlaka le handle eswitsungeni, ni ku navela ka wena ka manyala, ni vunghwavava bya wena, ndzi swi vonile hinkwaswo. We Yerusalema, u le khombyeni, hikuva u tsandzeka ku susa thyaka leri! Xana u ta tsandzeka ku fikela rini ke?”

Yeremiya 23:11

HOSI Xikwembu xi ri: “Vaprofeta ni vaprista va endla swo fana, hinkwavo va nyamisa tiko; hambi eTempeleni, ndzi kuma swiendlo swa vona leswo biha.