Varhoma 1:23 - BIBELE Mahungu Lamanene

²³ kutani va tshikile ku kwetsima ka Xikwembu lexi nga fiki, va tiendlela swifaniso leswi nga ni xivumbeko xa munhu la faka, ni xa tinyanyana, ni xa swiharhi, ni xa swikokovi.

Testamente Leyimpsha Xichangana

²³ kutani vatshikile kukwetsima ka Xikwembu lexingafiki, vatiyendlela svifaniso lesvinga ni xivumbeko xa munhu lweyi afaka, ni xa tinyanyana, ni xa sviharhi, ni xa tinyoka.

Xitsonga (Bibele)

²³ kutani ku kwetsima ka Xikwembu lexi nga boriki, va ku hundzule xifaniso lexi fanisaka munhu la bolaka, ni tinyanyana, ni swiharhi swa mune wa milenge, ni swikokovi.

Varhoma 1:23 Referans Kwoze

Pisalema 106:20

va tshika Xikwembu xa vona xo dzuneka, va gandzela xifaniso xa xifuwo xo dya byanyi lexi va xi vumbeke.

Yeremiya 2:11

Xana vamatiko va tshama va tshika swikwembu swa vona xana? E-e! (Kasi swikwembu swa kona a hi swa ntiyiso!) Kambe vanhu va mina va ndzi tshikile, mina Xikwembu xa vona lexi dzunekaka, va tilavela leswi nga pfuniki nchumu.

Timhaka 17:29

Kutani leswi hi nga va rixaka ra Xikwembu, a hi fanelanga ku anakanya leswaku vukwembu byi nga fana ni swifaniso swa nsuku, kumbe swa silivhere, kumbe swa ribye, swi nga swilo leswi vatliwaka hi vutlhari bya vanhu ni miehleketo ya vona.

Varhoma 1:25

Va tshikile ntiyiso wa Xikwembu, va landza mavunwa, va gandzela ni ku tirhela leswi vumbiweke, ematshan'wini ya Muvumbi loyi a fanelaka ku vongiwa hi masiku ni masiku. Amen!

1 Petro 4:3

Tshikani ku endla leswi tsakeriwaka hi vamatiko, hikuva swi ringene loko mi swi endlile eminkarhini leyi hundzeke. Khale a mi hanya hi ku endla swa manyala, hi ku navela ku titsakisa, hi ku pyopyiwa, ni makolo, ni ku va swilovekelo, ni ku gandzela swikwembu swa hava leswi nga lavekiki.

Ezekiele 8:10

Kutani ndzi nghena ndzi languta, ndzi kuma leswaku khumbi hinkwaro a ri tele hi swifaniso swa swikokovi ni swa swiharhi leswi nga tengangiki, ni swikwembu swa hava swa Vaisraele.

Duteronoma 5:8

“ ‘U nga tshuki u tivatlela xifaniso xa xikwembu, kumbe xifaniso xa swilo swihi na swihi leswi nga henhla etilweni, kumbe leswi nga hansi emisaveni, kumbe leswi nga matini ehansi ka misava.

Esaya 44:13

Muvatli ú pima mhandze hi ngoti, a teka penisele a tsala-tsala, a vatla hi mbatlo a ri karhi a pima-pima, a endla xifaniso xa munhu wo saseka swinene, leswaku a ta xi veka endlwini ya yena.

Esaya 40:18

Xana ú kona munhu loyi mi nga n'wi ringanisaka ni Xikwembu, kumbe swi kona leswi mi nga swi fanisaka na xona, xana?

1 Vakorinto 12:2

Ma swi tiva leswaku, loko ma ha ri vamatiko, a mi yisiwa hala ni hala, mi kokeriwa eka swikwembu swa hava leswi nga vulavuriki.

Esaya 40:26

Pfulani mahlo mi languta ehenhla: Xana i mani loyi a tumbuluxeke leswi mi swi vonaka xana? Swi tumbuluxiwile hi loyi a swi hlengeletaka tanihi mavuthu, ú tiva xin'wana ni xin'wana hi vito ra xona; ú ni ntamu ni matimba layo hlamarisa, kutani a ku na xin'we xa swona lexi nga tshukaka xi lahlekile.

Nhlavutelo 9:20

Vanhu hinkwavo lava nga pona ku dlawa hi mintungu leyi, a va fularhelanga leswi endliweke hi mavoko ya vona: A va tshikanga ku gandzela mademona ni swikwembu swa hava swa nsuku ni swa silivhere ni swa koporo ni swa maribye ni swa mintsandza, leswi nga voniki, swi nga twiki, hambi ku ri ku famba swi nga fambiki.

Timhaka 10:12

endzeni ka nguvu a ku ri ni swivumbiwa hinkwaswo swa misava leswi fambaka hi milenge ni mavoko, ni leswi kokovaka, ni leswi hahaka empfhukeni.