Vaheveru 9:22 - BIBELE Mahungu Lamanene

²² Hikuva hakunene, ehansi ka Nawu, hi nga ku hinkwaswo swi basisiwa hi ku cheriwa ngati, kutani ehandle ka ku halatiwa ka ngati ku hava ku rivaleriwa ka swidyoho.

Testamente Leyimpsha Xichangana

²² Hikuva hakunene, hansi ka Nawu, hingaku hinkwasvu svibasisiwa hi kucheliwa ngati, kutani handle ka kuhalatiwa ka ngati kuhava kurivaleliwa ka svijoho.

Xitsonga (Bibele)

²² Kutani hi nawu, swilo leswi hlantswiwaka hi ngati, swi lave ku va swilo hinkwaswo; kambe loko ngati yi nga halatiwanga, a ku na ku rivaleriwa ka swidyoho.

Vaheveru 9:22 Referans Kwoze

Levhitika 17:11

Mhaka hileswaku vutomi bya xivumbiwa byi le ngatini ya xona. Kutani HOSI Xikwembu xi mi nyikile yona leswaku mi yi chela alitarini, mi tibasisa ha yona, hikuva ngati yi ni matimba yo basisa swidyoho hikwalaho ka vutomi lebyi byi nga ka yona.

Levhitika 6:7

Muprista ú ta n'wi basisa emahlweni ka mina, kutani ú ta rivaleriwa hinkwaswo leswi a nga vaka a tivangele nandzu hi ku endla swona.”

Levhitika 4:35

Munhu wa kona ú fanele ku tsema mafurha hinkwawo ya nyimpfu leyi, ku fana ni leswi va tsemisaka swona mafurha ya nyimpfu ya magandzelo ya xinakulobye. Kutani muprista ú ta teka mafurha lawa, a ma hisa ehenhla ka alitari, laha magandzelo lama humeseriwaka HOSI Xikwembu ma hiseriwaka kona. Hi ndlela leyi, muprista ú ta va a basisile munhu wa kona, kutani ú ta rivaleriwa swidyoho leswi a swi endleke.

Levhitika 5:18

a pambula rin'wana ra makhuna ya ntlhambi wa yena, leri nga solekiki, ra nxavo wo ringana ni wa xifuwo xa magandzelo yo riha milandzu, kutani a ri yisa eka muprista. Muprista ú ta basisa munhu loyi, kutani ú ta rivaleriwa xihoxo lexi a xi endleke ku nga ri ha vomu.

Levhitika 14:14

Kutani muprista ú ta teka ngatinyana ya xifuwo lexi xa magandzelo yo riha milandzu, a tota munhu loyi a basisiwaka emakumu ka ndleve ya xinene, ni le khudzwini ra voko ra xinene, ni le khudzwini ra nenge wa xinene.

Levhitika 14:6

Kutani muprista ú ta teka xinyanyana lexo hanya, ni ximhandzana xa murhi wa kedari, ni ngoti ya muhlovo wo tshwuka, ni rhavi ra ximudyana xa hisopa, a swi peta engatini ya xinyanyana lexi nga dlayeriwa ematini layo basa.

Levhitika 5:10

Tuva lera vumbirhi, muprista ú ta humesa ha rona magandzelo lama hisiwaka, hi ku ya hi nawu wa kona. Hi ndlela leyi, muprista ú ta va a basisile munhu loyi, kutani ú ta rivaleriwa swidyoho leswi a swi endleke.

Levhitika 4:26

Loko ma ri mafurha ya xiphongho, muprista ú ta ma hisa hinkwawo ehenhla ka alitari, ku fana ni mafurha ya xifuwo xa magandzelo ya xinakulobye. Hi ndlela leyi, muprista ú ta basisa swidyoho swa murhangeri loyi, kutani ú ta rivaleriwa swona.

Levhitika 4:20

Xinkuzana lexi, muprista ú ta xi humesa ku fana ni xinkuzana lexin'wana xa mhamba yo susa swidyoho, a basisa ntshungu ha xona, kutani wu ta rivaleriwa xidyoho xa wona.

Levhitika 14:25

Kutani muprista ú ta tlhava xinyimpfana xa kona, a teka ngatinyana ya xona, a tota munhu loyi emakumu ka ndleve ya xinene, ni le khudzwini ra voko ra xinene, ni le khudzwini ra nenge wa xinene.

Levhitika 5:12

Munhu wa kona ú fanele ku yisa mapa lawa eka muprista, kutani muprista ú ta nusa yo tata xandla, ma va yo suma ha wona, a ma hisa alitarini, swin'we ni magandzelo lama hiseriwaka HOSI Xikwembu; leyi i mhamba yo susa swidyoho.

Levhitika 5:11

“Loko munhu loyi a pfumala matuva mambirhi kumbe mavondlo mambirhi ya matuva yo susa ha wona xidyoho lexi a xi endleke, a nga humesa xintewana xin'we xa mapa lamanene yi va mhamba yo susa swidyoho leswi a swi endleke; mapa lawa, ma nga tshuki ma cheriwa mafurha kumbe murhi wa risuna, hikuva i mhamba yo susa swidyoho.

Ezekiele 43:18

Kutani Xikwembu xi ku ka mina: “We Ezekiele, tiva leswaku mina HOSI N'wini wa hinkwaswo, ndzi vekile milawu ya matirhisele ya alitari, yi nga leyi: Siku alitari yi helaka ku akiwa, ku ta hisiwa magandzelo ehenhla ka yona, yi tlhela yi xuviwa.