Vagalatiya 1:8 - BIBELE Mahungu Lamanene

⁸ Kambe hambiloko hina kumbe ntsumi yo huma etilweni, hi nga tshuka hi mi dyondzisa Evhangeli yin'wana ehandle ka leyi hi tshamaka hi mi dyondzisa yona, mudyondzisi wo tano a a rhukaniwe!

Testamente Leyimpsha Xichangana

⁸ Kambe hambi loko hina kumbe ntsumi yohuma tilweni, hingatshuka himijondzisa Evhangeli yin'wana handle ka leyi hitshamaka himijondzisa yona, mujondzisi wotanu aarhukiwe!

Xitsonga (Bibele)

⁸ Kasi loko a ri kona loyi a mi dyondzisaka Evhangeli yin'wana eka leyi hi nga mi dyondzisa yona, hambi ku nga va hina, hambi yi ri ntsumi ya le tilweni, a yi ve anathema.

Vagalatiya 1:8 Referans Kwoze

Vagalatiya 1:9

Tanihi leswi hi tshamaka hi mi byela, nisweswi ndzi engeta kambe ndzi ku: Loko un'wana a mi dyondzisa Evhangeli yin'wana ehandle ka leyi mi yi amukeleke, a a rhukaniwe!

1 Vakorinto 16:22

Loko munhu a nga rhandzi Hosi, a a ve eku rhukaniweni! “Maranatha! Tana, Hosi!”

Varhoma 9:3

Hikuva a ndzi ta navela, mina hi xiviri xa mina, ku va loyi a cukumetiwaka, ndzi hambanisiwa na Kriste hikwalaho ka vona lava va nga va rixaka ra ka hina hi ku velekiwa.

Matewu 25:41

“Kutani Hosi yi ta byela lava nge vokweni ra yona ra ximatsi yi ku: ‘Sukani ka mina, n'wina lava rhukaniweke hi Xikwembu; yanani endzilweni lowu nga timekiki, lowu lunghiseriweke Diyavulosi ni tintsumi ta yena;

2 Petro 2:14

Va ni mahlo lama taleke hi vuoswi, lama nga ni torha ra swidyoho. Va rhiya mimoya leyi nga tiyangiki. Va ni timbilu leti toloveleke makolo. I vanhu lava rhukaniweke hi Xikwembu.

Timhaka 23:14

Va ya eka vaprista lavakulu ni ka vakulukumba, va ku: “Hi tibohile hi ku hlambanya lokukulu leswaku hi nga ka hi nga dyi nchumu, hi nga si dlaya Pawulo.

Tito 3:10

Munhu loyi a vangaka ku hambana, n'wi tshinye kan'we, kumbe kambirhi, kutani u nga ha vi na mhaka na yena,

Vagalatiya 3:13

Kriste ú hi kutsurile ekhombyeni ra ku rhukana ka Nawu, hi ku tiendla la rhukaniweke hikwalaho ka hina, hikuva Matsalwa ma ri: “A ku rhukaniwe un'wana ni un'wana la hayekiweke emhandzeni.”

1 Vakorinto 12:3

Hikokwalaho, ndza mi tsundzuxa ndzi ri, munhu la fambisiwaka hi Moya wa Xikwembu, a nga ka a nga vuli a ku: “Yesu a a rhukaniwe!” Naswona a ku na munhu la nga vulaka a ku: “Yesu i Hosi!” loko a nga ri la fambisiwaka hi Moya lowo Kwetsima.

Marka 14:71

Hiloko a sungula ku hlambanya hi matimba a ku: “Munhu loyi mi n'wi vulaka, mina a ndzi n'wi tivi!”

Vagalatiya 3:10

Hinkwavo lava titshembaka hileswi va hlayisaka Nawu, va le ku rhukaniweni, hikuva Matsalwa ma ri: “Un'wana ni un'wana la tsandzekaka ku hlayisa ni ku endla hinkwaswo-kwaswo leswi tsariweke ebukwini ya Nawu, ú le ku rhukaniweni.”

Nehemiya 13:25

Kutani ndzi va holovela ni ku va rhuketela, ndzi tlhela ndzi va ba, ndzi va kokakoka hi misisi, ndzi va sindzisa ku tiboha hi ku hlambanya hi vito ra Xikwembu, ndzi ku: “Mi nga pfumeli leswaku vana va n'wina va xisati va tekiwa hi vamatiko, naswona mi nga pfumeli leswaku vana va n'wina va xinuna va teka vasati exikarhi ka vona, hambi a ri n'wina mi nga titekeli vasati exikarhi ka vanhu lava.

1 SAMIELE 26:19

Hikokwalaho, wena hosi n'wini wanga, ndzi kombela leswaku u yingisa marito ya mina nandza wa wena: Loko ku ri leswaku i HOSI Xikwembu lexi ku susumeteke ku lwa na mina, hiswona, ndzi ta xi humesela gandzelo ra risuna ra ku tisola. Kambe loko u kuceteriwile hi vanhu, vona va tivangela khombo emahlweni ka HOSI Xikwembu, hikuva namuntlha va ndzi hlongorile, va ndzi sivela ku titwa ndzi ri un'wana wa vaaki va tiko ra HOSI Xikwembu, va ku ka mina: ‘Famba u ya tirhela swikwembu swimbe.’

Yoxuwa 9:23

Hikokwalaho, ku sukela namuntlha mi rhukaniwile; van'wana va n'wina va ta hamba va va mahlonga va tshova tihunyi, va tlhela va ka mati, va ma yisa endlwini ya Xikwembu xa mina.”

Genesa 9:25

kutani a ku: “Kanana a a rhukaniwe; yena ú to tshama a ri hlonga ra vamakwavo.”

1 TIHOSI 13:18

Kutani muprofeta wo dyuhala a ku ka yena: “Na mina ndzi muprofeta ku fana na wena. Kutani, hi ku lerisiwa hi HOSI Xikwembu, ntsumi yi vulavurile na mina yi ku: ‘Tlhelela na yena ekaya ka wena, leswaku a ta dya vuswa ni ku nwa mati kona.’ ” Kasi muprofeta wo dyuhala a a kanganyisa munhu wa Xikwembu hi mavunwa.

Yeremiya 23:16

HOSI ya matimba hinkwawo yi vurisa sweswo yi ri: “Mi nga tshuki mi yingisa leswi vaprofeta va mi byelaka swona. Loko va vulavula, va mi tshembisa leswo ka swi nga ri swona. Swivono leswi va mi byelaka swona, swi huma etinhlokweni ta vona, a hi mina ndzi va kombeke swona mina HOSI.

Yeremiya 23:36

Mi nga ha vulavuli hi ‘ndzhwalo wa HOSI Xikwembu’. Xana mahungu ya xona ma nga va ‘ndzhwalo’ xana? Loko mi vula sweswo, mi onha mahungu ya Xikwembu xa hina lexi hanyaka, yona HOSI ya matimba hinkwawo.

Varhoma 16:17

Ndza mi khongotela vamakwerhu, ndzi ri: Mi tivonela eka lava pfuxaka ku avana, ni swikhunguvanyiso, lava va mi humesaka etidyondzweni leti mi ti kumeke; hambanani na vona;