Tinhlayo 18:1 - BIBELE Mahungu Lamanene

¹ HOSI Xikwembu xi ku ka Aroni: “Milandzu hinkwayo leyi kongomaneke ni xivandla lexo hlawuleka yi ta rhwexiwa wena ni vana va wena, ni va nyimba ya ka n'wina, kambe leyi kongomaneke ni vuprista, yi ta rhwexiwa wena ni vana va wena ntsena.

Xitsonga (Bibele)

¹ Yehovha a ku eka Aroni: “Wena ni vana va wena, ni yindlu ya tata wa wena, mi ta rhwala milandzu ya vukwetsimelo, kutani wena ni vana va wena, mi ta rhwala milandzu ya ntirho wa vuprista bya n'wina.

Tinhlayo 18:1 Referans Kwoze

Eksoda 28:38

Aroni ú fanele ku vekela xiphepherhele lexi emombyeni wa yena; ú ta byarha xidyoho xa mhamba yin'wana ni yin'wana leyo hlawuleka leyi Vaisraele va nga ta va va nga yi humesanga hi ndlela leyinene. Aroni ú ta tshama a vekerile xiphepherhele lexi emombyeni wa yena, leswaku magandzelo ma ta amukeleka emahlweni ka mina HOSI.

1 Petro 2:24

Yena hi byakwe, ú rhwele swidyoho swa hina emirini wa yena le xihambanweni, leswaku na hina hi fa hi tlhelo ra ku dyoha, hi hanyela ku lulama. Mi tshunguriwile hi mimpfembeti ya yena.

Vaheveru 13:17

Yingisani vafambisi va n'wina, mi titsongahata eka vona, hikuva va hitekela mimoya ya n'wina, tanihi vanhu lava nga ta vutisiwa ehenhla ka yona. Mi vona leswaku va tirha ntirho wa vona hi ku tsaka, va nga wu endli hi ku vilela, hikuva loko va vilela, a swi nga mi pfuni nchumu n'wina.

Vaheveru 4:15

Hikuva Muprista Lonkulu loyi hi nga na yena a hi loyi a tsandzekaka ku hi twela vusiwana emikarhalweni ya hina, kambe hi loyi a ringiweke hi matlhelo hinkwawo ku fana na hina, ntsena yena a nga dyohanga.

Esaya 53:11

Ú ta vona mihandzu ya maxangu ya yena layo chavisa, kutani a tsaka. HOSI Xikwembu xi ri: “Nandza wa mina ú tiva ku rhandza ka mina; leswi a nga riki na nandzu, ú ta ntshunxa lavo tala emilandzwini ya vona hikuva ú biwile ematshan'wini ya vona.

Esaya 53:6

Hinkwerhu a hi fana ni tinyimpfu leti lahlekeke, un'wana ni un'wana a a tifambela hi ndlela ya yena; hambiswiritano, HOSI Xikwembu xi tekile swidyoho swa hina hinkwerhu, xi swi rhwexa munhu loyi.

Tinhlayo 17:13

Loko ku ri leswaku un'wana ni un'wana loyi a tshinelaka kusuhi ni Ntsonga wa HOSI Xikwembu ú to fa, swi vula leswaku hinkwerhu hi ta hela!”

Tinhlayo 17:7

Kutani Muxe a ya veka tinhonga leti emahlweni ka HOSI Xikwembu, eka Ntsonga lowu nga ni Areka ya Ntwanano.

Tinhlayo 17:3

Leswi murhangeri wa nyimba yin'wana ni yin'wana a nga ta va ni nhonga yin'we, eka nhonga ya ka Levhi u ta tsala vito ra Aroni.

Tinhlayo 14:34

Mi ta xaniseka malembe ya 40 hikwalaho ka milandzu ya n'wina, hikuva masiku lawa mi nga valanga tiko ha wona a ma ri 40, hileswaku siku rin'wana ni rin'wana ri yimela lembe rin'we. Mi ta swi tiva leswaku mi ndzi khunguvanyisile ngopfu!

Levhitika 22:9

Vaprista va fanele ku hlayisa swileriso swa mina, va nga tshuki va tlanga ha swona, hikuva sweswo swi nga va vangela nandzu, va fa. Hi mina HOSI, Xikwembu lexi xi va hlawulekisaka.

Levhitika 10:17

“Hikwalaho ka yini mi nga dyanga nyama ya xiphongho xa mhamba yo susa swidyoho, mi yi dyela exivandleni lexo hlawuleka, xana? Nyama ya mhamba leyi yi hlawulekile swinene; mi nyikiwile yona leswaku mi ta susa ha yona swidyoho swa ntshungu wa Vaisraele, mi va basisa emahlweni ka HOSI Xikwembu.

Levhitika 22:16

hi ku pfumelela munhu ntsena ku dya tinyiko ta kona; hikuva munhu wo tano ú ta va a tivangele nandzu lowu a nga ta fanela ku wu riha: Hi mina HOSI, Xikwembu lexi hlawulekisaka tinyiko leti.”

Tinhlayo 3:6

“Tisa va nyimba ya ka Levhi ekusuhi, u va veka emavokweni ya muprista Aroni, leswaku va ta n'wi pfuna mintirho.

Tinhlayo 16:10

Wena Kora, HOSI Xikwembu xi ku pfumelerile ku tshinela kusuhi na xona, wena ni Valevhi va ka n'wina hinkwavo, kutani xana mi lava na byona vuprista xana?

Tinhlayo 18:11

“Swin'wana leswi swi nga ta va swa n'wina, i tinyiko leto hlawuleka leti Vaisraele va ndzi humeselaka tona; ndzi ta mi nyika tona hilaha ku nga heriki, n'wina ni vana va n'wina va xinuna ni va xisati. Un'wana ni un'wana emindyangwini ya n'wina loyi a nga tinyamisangiki, ú ta pfumeleriwa ku dya swilo leswi.

Duteronoma 10:8

Enkarhini wolowo, HOSI Xikwembu xi hlawurile Valevhi leswaku va va vona va rhwalaka Areka ya Ntwanano wa xona, va xi tirhela ni ku katekisa vanhu hi vito ra xona; swa ha ri tano ni namuntlha.

Vaavanyisi 17:12

Kutani Mika a ri veka entirhweni wa vuprista, ri tshama emutini wa yena.

Ezekiele 4:4

“Endzhaku ka sweswo, u fanele ku etlela hi rivambu ra wena ra ximatsi, u tirhwexa nandzu wa swidyoho swa Vaisraele; u ta rhwala nandzu lowu ku ringana masiku lawa u nga ta va u etlele hi rivambu.