Swivuriso 15:30 - BIBELE Mahungu Lamanene

³⁰ Nghohe leyi n'wayitelaka, ya tsakisa, mahungu lamanene ma tiyisa nhlana.

Xitsonga (Bibele)

³⁰ Leswi tsakisaka mahlo swi tsakisa mbilu, Ku byeriwa swo nandziha ku tiyisa marhambu.

Swivuriso 15:30 Referans Kwoze

Esaya 58:11

Mina HOSI, ndzi ta mi rhangela emahlweni minkarhi hinkwayo, ndzi mi nyika swilo hinkwaswo leswinene leswi mi swi navelaka, ndzi tlhela ndzi mi tiyisa; mi ta fana ni ntanga lowu kumaka mati yo ringana, mi kota xihlovo lexi mati ya xona ma nga phyiki.

Swivuriso 25:25

Mahungu lamanene lama humaka etikweni ra le kule, ma fana ni mati layo titimela lama timulaka torha.

Nhlavutelo 22:5

Vusiku a byi nga ha vi kona, a va nga ha lavi ku vonakala ka rivoni kumbe ka dyambu, hikuva Hosi Xikwembu xi ta va ku vonakala ka vona, kutani va ta fuma hilaha ku nga heriki.

Nhlavutelo 21:23

Muti a wu lavi dyambu kumbe n'weti ku wu voninga, hikuva wu voningiwa hi ku kwetsima ka Xikwembu, kutani Xinyimpfana i rivoni ra wona.

Eklesiasta 11:7

Hakunene ku vonakala ku rhulisa moya, mahlo ma tsakela ku tlhava ka dyambu.

Swivuriso 17:22

Ku tsaka ka mbilu, swi tshungula miri, ku khunguvanyeka, swi heta matimba.

Swivuriso 13:9

Rivoni ra lavo lulama ri pfurha minkarhi hinkwayo, kambe ra lavo homboloka ri ta timeka.

Pisalema 89:15

We HOSI, ku katekile tiko ra vanhu lava tivaka ku ku bela nkulungwana, va nga lava amukelekaka eka wena, lava hanyaka eku vonakaleni.

Ezra 9:8

Kambe masikunyana lawa, wena HOSI Xikwembu xa hina u hi kombile tintswalo hi ku hi siyela masalela, ni ku hi endlela vutshamo endhawini ya wena leyo hlawuleka, leswaku u ta hi hanyisa ni ku hi vevukisela ndzhwalo wa vuhlonga.

Swivuriso 3:8

Leswi, swi ta horisa miri wa wena, swi tiyisa ni marhambu ya wena.

Swivuriso 15:29

HOSI Xikwembu a xi tshineli kusuhi ni lavo homboloka, kambe swikhongelo swa lavo lulama, xa swi hlamula.

Swivuriso 15:31

Loyi a nkhensaka ku tshinyiwa, ú ta hanya; loko a ri exikarhi ka lavo tlhariha, ú ta titwa a ntshunxekile.

Swivuriso 12:25

Ku vilela ku heta munhu matimba, kambe marito lamanene ma n'wi tiyisa.