Swirilo 4:20 - BIBELE Mahungu Lamanene

²⁰ Muhlawuriwa wa HOSI Xikwembu, yena mufambisi wa hina, va n'wi khomile ku fana ni xiharhi lexi weleke ekheleni, kasi a hi languterile leswaku ú ta hi sirhelela exikarhi ka vamatiko.

Xitsonga (Bibele)

²⁰ Loyi a nga va ku hefemula ka hina, a ri muhlawuriwa wa Yehovha, U phasiwile erindzini ra vona, A ri loyi, a hi ku: “Hi ta hanya endzhutini wa yena exikarhi ka matiko.”

Swirilo 4:20 Referans Kwoze

Ezekiele 12:13

Mina ndzi ta tlharamula ritavala ndzi n'wi phasa ha rona, ndzi n'wi yisa emutini wa Babilona etikweni ra Vakalediya, kutani yena ú ta ya fela etikweni rero a nga ha ri na mahlo.

Yeremiya 39:5

Kambe mavuthu ya Vakalediya ma va hlongorisa, ma ya kuma Sedekiyasi erivaleni ra Yeriko. Loko Vakalediya va n'wi khomile, va n'wi yisa eka Nebukadnetsara hosi ya le Babilona, loyi a a ri eRibila etikweni ra Hamata, kutani Nebukadnetsara a n'wi vona nandzu.

2 SAMIELE 19:21

Kambe Abixayi n'wana Seruya, a nghenelela, a ku: “Xana leswi swi nga hi sivela ku dlaya Ximeyi xana, leswi a ku rhuketeleke, wena muhlawuriwa wa HOSI Xikwembu?”

Genesa 2:7

Kutani HOSI Xikwembu xi vumba munhu hi ntshuri wa misava, xi huhutela moya lowu nyikaka vutomi etinhompfini ta yena, kutani munhu a va xivumbiwa lexi hanyaka.

Swirilo 2:9

Timbanti ta Yerusalema ti dyiwile hi muhlwa ti wa, Xikwembu xi tshovelerile ni timhingu to goga ha tona. Mufumi wa tiko ni tindhuna ta yena va hangalakile va ya ematikweni man'wana, sweswi a ka ha ri na nawu. Hambi va ri vaprofeta va kona, HOSI Xikwembu a xa ha va kombi nchumu.

2 SAMIELE 1:21

N'wina tintshava ta Gilibowa, ku nga ha wi mberha, ni mpfula yi nga ha ni ehenhla ka n'wina, masimu ya n'wina yo nona ma nga ha rimiwi, hikuva switlhangu swa tinhenha swi nyamiseriwele ka n'wina, xitlhangu xa Sawulo xi nga ka xi nga ha vangamisiwi hi mafurha.

2 SAMIELE 1:14

Davhida a ku ka yena: “Xana swi endlise ku yini ku kala u nga chavi ku tlakusa voko ra wena, u dlaya muhlawuriwa wa HOSI Xikwembu, xana?”

Ezekiele 17:18

hikuva hosi ya Yerusalema yi rivarile ntwanano lowu yi wu hlambanyeleke; yi wu tshovile hi ku endla swilo leswi hinkwaswo, hikokwalaho yi nga ka yi nga poni.

Yeremiya 52:8

Kambe mavuthu ya Vakalediya ma hlongorisa hosi Sedekiyasi, ma ya n'wi kuma erivaleni ra Yeriko; kutani masocha hinkwawo ya yena ma hangalaka ma n'wi siya.

2 SAMIELE 18:3

Kambe vavanuna va hlamula va ku: “E-e, wena u nga ka u nga yi enyimpini, hikuva hina, hambiloko hi ya hi ya tsutsuma, kumbe van'wana va hina va dlayiwa enyimpini, a va nga vi na mhaka na swona; kasi wena u ni ntikelo ku ringana na hina hi ri 10 000, kutani swa antswa u sala laha mutini; u ta hi rhumela lava nga ta hi pfuna.”

1 SAMIELE 26:16

Maendlele ya wena lawa a ma sasekanga. Ndza tiyisa emahlweni ka HOSI Xikwembu lexi hanyaka ndzi ri: Hinkwenu mi faneriwa hi ku fa, hikuva a mi hitekelanga ku rindza n'wini wa n'wina, muhlawuriwa wa HOSI Xikwembu. Xana wa ri vona tlhari ra hosi laha ri nga kona sweswi xana? Wa ri vona na gula ra mati leri a ri ri etinhlokweni ta yena, xana?”

1 SAMIELE 26:9

Kambe Davhida a hlamula a ku: “U nga tshuki u n'wi vavisa, hikuva munhu loyi a khumbaka muhlawuriwa wa HOSI Xikwembu, ú ta tivangela nandzu lowukulu emahlweni ka xona.”

1 SAMIELE 24:10

Namuntlha, u swi vonile hi wexe hilaha HOSI Xikwembu xi ku nyiketeke hakona emavokweni ya mina, le bakweni. Van'wana a va ndzi kucetela leswaku ndzi ku dlaya, kambe ndzi ku tsetselerile, ndzi tiyisa leswaku ndzi nga ka ndzi nga ku khumbi, wena n'wini wanga, hikuva u muhlawuriwa wa HOSI Xikwembu.

1 SAMIELE 24:6

kutani a ya byela vanhu va yena a ku: “Eka mina, mhaka leyi mi yi vulaka ya yila emahlweni ka HOSI Xikwembu: Ndzi nge pfuki ndzi khumbile n'wini wa mina, hikuva i munhu loyi HOSI Xikwembu xi n'wi hlawuleke hi ku n'wi chela mafurha enhlokweni.”

1 SAMIELE 16:6

Loko va fika, Samiele a languta Eliyabu, a anakanya a ku: “Jaha leri ri yimeke emahlweni ka HOSI Xikwembu, ri ta va ri ri rona leri xi ri hlawuleke.”

1 SAMIELE 12:5

Kutani Samiele a ku ka vona: “HOSI Xikwembu i mbhoni ya mina emahlweni ka n'wina namuntlha, na yena Sawulo muhlawuriwa wa xona i mbhoni ya mina, leswaku a mi kumanga nandzu ni wun'we eka mina.” Va hlamula va ku: “Kunene Xikwembu i mbhoni emhakeni leyi!”

1 SAMIELE 12:3

Hi mina loyi! Loko ndzi mi hoxerile, vulani sweswi emahlweni ka HOSI Xikwembu, ni le mahlweni ka Sawulo muhlawuriwa wa xona. Xana i mani loyi ndzi tshamaka ndzi n'wi tekela homu ya yena kumbe mbhongolo ya yena xana? Xana ndzi dyelerile mani? I mani loyi ndzi n'wi xaniseke xana? Xana ndzi amukerile mali eka mani yo ndzi pfala nomo xana? Loko a ri kona ndzi nga n'wi tlherisela.”

Genesa 44:30

“Ndzi nga ka ndzi nga swi koti ku tlhelela eka tatana, yena nandza wa wena, ndzi nga ri na yena mufana loyi, hikuva hi yena a khomeke vutomi bya tatana.

2 TIKRONIKA 35:25

Muprofeta Yeremiya na yena a suma risimu ra xirilo a rila Yosiyasi. Naswona vayimbeleri hinkwavo va xinuna ni va xisati va ha rila Yosiyasi ni namuntlha hi tinsimu ta vona, hikuva ti hundzukile ntolovelo exikarhi ka Vaisraele, ti tsariwile ni le ka “Buku ya Swirilo”.

Yeremiya 52:9

Vakalediya va khoma hosi Sedekiyasi, va n'wi yisa eka hosi ya Babilona eRibila etikweni ra Hamata, kutani yona yi n'wi vona nandzu.

Daniele 4:12

Matluka ya wona a ma sasekile, ni mihandzu ya wona a yi tele; vanhu hinkwavo a va kuma swakudya eka wona, swiharhi swi vundza endzhutini wa wona, tinyanyana ti phatsama emarhavini ya wona; swivumbiwa hinkwaswo a swi hanyisiwa hi wona.

Vaavanyisi 9:15

Kutani ximudyana xa mitwa xi hlamula mirhi leyin'wana xi ku: ‘Loko hakunene mi ndzi hlawula ku va hosi ya n'wina, tanani mi ta tumbela endzhutini wa mina; kambe loko mi nga ndzi hlawuli hi timbilu ta n'wina hinkwato, ku ta pfurha ndzilo wu huma ka mina, wu herisa ni mirhi ya kedari entshaveni ya Lebanoni.’ ”

Esaya 32:2

Varhangeri lava hinkwavo va ta fana ni xivava xo sivela moya, ni ndhawu yo tumbela ka yona sikwini ra xidzedze; va ta fana ni swinambyana swa mati endhawini leyi omeke, ni ndzhuti wa ribye lerikulu etikweni ra mumu.

Ezekiele 31:17

Kambe na yona mirhi leyi yi ta cukumetiwa exivandleni xa vafi, yi ya hlangana ni lava dlayiweke hi fumu, hikuva yi tirhisanile ni murhi wa kedari; swi tano ni vamatiko lava wiseke endzhutini wa wona: Va ta lova.

Hosiya 13:10

Xana hosi leyi nga ta mi ponisa yi kwihi, ni varhangeri lava nga ta mi biyelela, va kwihi xana? Ndzi vula vona lava mi nga te: “Hi nyike hosi ni varhangeri!”