Ntirho 23:10 - BIBELE Mahungu Lamanene

¹⁰ Xikwembu xi tiva tindlela ta mina; loko xi ndzi kamberile, xi ta ndzi kuma ndzi tengile kukota nsuku.

Xitsonga (Bibele)

¹⁰ Kasi xi tiva tindlela ta mina; Ni loko xi nga ndzi ringa, a ndzi ta huma ndzi basile kukota nsuku.

Ntirho 23:10 Referans Kwoze

Yakobo 1:12

Ku katekile munhu loyi a tiyiselaka eku ringiweni, hikuva loko a hlurile miringo, ú ta nyikiwa harhi ya vutomi leyi Xikwembu xi yi tshembiseke lava va xi rhandzaka.

1 Petro 1:7

Miringo leyi yi endla leswaku ku pfumela ka n'wina, loku tlulaka nsuku hi nkoka, ku vonaka ku tiyile. Nsuku, hambileswi wu ringetiwaka hi ndzilo, wa onhaka; kambe ku pfumela ka n'wina, loko ku tiyile, ku ta mi tisela ku dzunisiwa ni ku twarisiwa ni ku fundzhiwa, siku Yesu Kriste a humelelaka.

Zakariya 13:9

Lava va nga ta sala, ndzi ta va kambela, ndzi va basisa hi ndzilo, kukota loko va basisa nsuku kumbe silivhere. Va ta ndzi huwelela, kutani mina ndzi ta va hlamula ndzi ku: ‘Mi vanhu va mina!’ Vona va ta vula va ku: ‘We HOSI, u Xikwembu xa hina!’ ”

Pisalema 66:10

We Xikwembu, tani hileswi silivhere yi basisiwaka hi ndzilo, na hina u hi kamberile u hi basisa hi ndlela yoleyo.

Swivuriso 17:3

Nsuku ni silivhere swi kamberiwa hi ndzilo, timbilu ta vanhu tona ti kamberiwa hi HOSI Xikwembu.

Pisalema 17:3

U ndzi endzerile nivusiku, ku ta xiya mbilu ya mina, ni ku ndzi kambisisa, kambe a wu kumanga nchumu xa tingana;

Vaheveru 11:17

Hi ku pfumela, Abrahama, siku a ringiweke, ú nyiketile Isaka egandzelweni. Abrahama a a nyikiwile switshembiso, kutani a tiyimisela ku gandzela hi n'wana yoloyi un'we eka yena,

2 Timotiya 2:19

Hambiswiritano, masungulo layo tiya lama vekiweke hi Xikwembu a ma tsekatseki; ma tiyisiwa hi rito leri nge: “Hosi yi tiva lava nga va yona.” Naswona: “Un'wana ni un'wana loyi a vulaka vito ra Hosi, a a tshike leswo homboloka.”

Yohane 21:17

A engeta ra vunharhu a ku ka yena: “Simoni, n'wana Yohane, xana wa ndzi rhandza xana?” Petro a khomiwa hi gome, hi mhaka ya leswi a n'wi vutiseke ra vunharhu a ku: “Xana wa ndzi rhandza xana?” Kutani a ku ka yena: “Hosi, u tiva hinkwaswo, wa swi tiva leswaku ndza ku rhandza.” Yesu a ku ka Petro: “Risa tinyimpfu ta mina.

Pisalema 1:6

Etindleleni ta vona, lavo lulama va fambisiwa hi HOSI, kambe lavo homboloka, va khoma ndlela leyi yi va yisaka eku loveni.

Duteronoma 8:2

Mi nga tshuki mi rivala ndlela leyi HOSI Xikwembu xi mi fambiseke ha yona, malembe lawa hinkwawo ya 40 emananga. A xi endlela ku mi tshinya, xi mi kambela, leswaku xi ta tiva leswi mi ehleketaka swona, ni ku vona loko mi ta yingisa swileriso swa xona, kumbe mi ta ka mi nga swi yingisi.

2 TIHOSI 20:3

“We HOSI ndza ku khongela, tsundzuka hilaha ndzi hanyeke hakona emahlweni ka wena, hi ku tshembeka ni mbilu yo basa, ndzi ri karhi ndzi endla leswi lulameke emahlweni ka wena.” Kutani Hezekiya a rila swinene.

Genesa 18:19

Ndzi n'wi hlawurile leswaku a letela vana va yena ni va ka vona hinkwavo lava nga ta velekiwa leswaku va famba etindleleni ta mina HOSI, va endla leswinene, swo lulama, kutani mina HOSI ndzi ta endlela Abrahama hinkwaswo leswi ndzi n'wi tshembiseke swona.”

1 Vakorinto 3:15

Kambe loko ntirho wa kona wu tshwa, ú ta pfumala hakelo; loko a ri yena, ú ta ponisiwa, kambe swi ta endla onge na yena ú hundzile hi le ndzilweni.

Ntirho 6:29

Tivoneleni, mi nga ndzi dyoheli, ndzi ri, tivoneleni, nandzu mina ndzi hava!

Ntirho 7:18

Hikwalaho ka yini u n'wi sala ndzhaku masiku hinkwawo, ni ku n'wi kambela nkarhi wihi na wihi, ke?

Ntirho 23:7

I munhu wo lulama ntsena la nga hlamulanaka na xona! Mina a ndzi ta khana emahlweni ka xona muavanyisi wa mina.

Ntirho 23:9

Xi nga va xi yile xi ya tirha en'walungwini, kumbe xi ya tumbela edzongeni, kambe mina a ndzi xi vonanga.

Ntirho 31:6

Xikwembu a xi ndzi pime exikalweni lexi heleleke, xi ta swi vona leswaku ndzi hava nandzu.

Pisalema 7:9

Herisa ku biha ka lavo homboloka, u tiyisa lavo lulama, hikuva u Xikwembu xo lulama, wena u kambelaka timbilu ni miehleketo.

Pisalema 11:5

HOSI yi kambela lavo lulama ni lavo homboloka; lava tsakelaka mintirho ya tihanyi yi va nyenya ngopfu.

2 SAMIELE 22:22

hikuva ndzi fambile etindleleni ta HOSI, ni ku xi dyohela a ndzi xi dyohelanga, Xikwembu xa mina;

Ntirho 10:7

Wa swi tiva leswaku mina a ndzi dyohanga nchumu, kambe ku hava loyi a nga ndzi lamulelaka emavokweni ya wena!

Ntirho 31:4

Xana Xikwembu a xi voni tindlela ta mina, magoza ya mina, a xi ma hlayeli xana?

Ntirho 33:9

U te: ‘Nandzu ndzi hava, a ndzi dyohanga nchumu, ndzi loyi a tengeke, xo biha a xi kona eka mina.

Yeremiya 12:3

We HOSI, wa ndzi tiva, u ndzi kambile, wa swi vona leswaku ndzi anakanya wena ntsena. Lavo homboloka lava, va kokele etlhelo ku fana ni tinyimpfu leti yisiwaka eku tlhaviweni, u va hlawulela siku ra ku dlawa.