Nahume 2:10 - BIBELE Mahungu Lamanene

¹⁰ Muti wa Ninivha wu herile, wu herisiwile, wu hundzuke rhumbi! Va hela mbilu, matsolo ya vona ma gudlagudla, va twa switlhavi emirini hinkwawo, hinkwavo va hundzuka tinghohe hi ku chava.

Xitsonga (Bibele)

¹⁰ Ka byisiwa, ka phangiwa, ka onhiwa! Mbilu ya n'oka, matsolo ma gudlagudla, swisuti hinkwaswo swi khomiwe hi ku vaviseka, mimombo hinkwayo yi ondzile!

Nahume 2:10 Referans Kwoze

Pisalema 22:14

Matimba ya mina ma hela kukota mati lama halatiweke, marhambu ya mina hinkwawo ma gudla-gudla, ni mbilu ya mina yi fana ni mafurha lama n'okisiwaka endzilweni.

Yuwele 2:6

Loko va fika, vanhu va hela matimba, tinghohe hinkwato ta basuluka.

Daniele 5:6

Kutani a basuluka xikandza hi ku chava, a pfilunganyeka miehleketo, mahlakala ya yena ma gudlagudla, a dzunga ni matsolo.

Yeremiya 30:6

Famba u ya vona hi wexe, u tivutisa: Xana swa endleka leswaku wanuna a veleka n'wana xana? Hikwalaho ka yini ndzi vona vavanuna hinkwavo va tikhomelerile makhwiri ku fana ni wansati la nga ku tintshunxeni xana? Hikwalaho ka yini hinkwavo va basulukile swikandza xana?

Esaya 24:1

HOSI Xikwembu xi ni makungu ya ku hlasela misava, yi sala yi ri mananga, xi ta yi hlakahla, xi hangalasa lava akeke ka yona.

Esaya 21:3

Timhaka leti ti ndzi hete matimba, ti ndzi vangele switlhavi, wonge ndzo va wansati loyi a lavaka ku tintshunxa; a ndza ha koti ku ololoka, ni ku twa a ndza ha twi, swi ndzi tshukise ngopfu, lero a ndza ha koti na ku vona nchumu.

Sofoniya 3:6

HOSI Xikwembu xi vurisa sweswo, xi ri: “Ndzi herisile vamatiko, swihondzo swa vona swi hundzuke marhumbi; emagondzweni ya vona, ndzi mirisile nhova, leswaku ku nga ha famba-fambi munhu eka wona; miti ya vona yi hlaseriwile, a ka ha ri na munhu la tshamaka eka yona.

Nahume 3:7

Hinkwavo lava nga ta ku hlalela, va ta khomiwa hi ku chava, va ku fularhela, va ku: ‘Muti wa Ninivha wu herisiwile!’ Xana wu ta rila hi mani xana? Xana vachaveleri va wona ndzi ta va lava kwihi xana?”

Yeremiya 51:62

Kutani u ta khongela u ku: ‘We HOSI Xikwembu, hi wena u vuleke leswaku u lava ku herisa ndhawu leyi. Hikokwalaho a ku nga ha tshami munhu eka yona, hambi swi ri swifuwo a swi nga ha kumeki eka yona; yi ta va yi hundzuke rhumbi hilaha ku nga heriki!’

Esaya 14:23

Muti wa Babilona, ndzi ta wu endla kaya ra swihloni. Wu ta hundzuka ndhawu ya nhlangasi. Ndzi ta wu kukula ndzi ya wu chela kule. Ndzi vurisa sweswo, mina HOSI ya matimba hinkwawo.”

Yoxuwa 2:11

Timhaka leti ti hi tshukisile ngopfu loko hi ti twa; a ka ha ri na munhu loyi a nga ni matimba hi ku chava n'wina, hikuva HOSI Xikwembu xa n'wina hi xona xi nga Xikwembu xa le henhla tilweni ni le hansi emisaveni.

Genesa 1:2

Misava a yi nga ri na xivumbeko, naswona eka yona a ku nga ri na nchumu. Munyama a wu funengetile xidziva lexikulu, moya wa Xikwembu wona wu ri karhi wu hunga-hunga ehenhla ka mati.

Yoxuwa 7:5

Vavanuna va muti wa Ayi va hlongorisile Vaisraele ku sukela enyangweni ya muti, ku kondza va ya fika eXebarimi, va dlaya Vaisraele va kwalomu ka 36 loko va ri karhi va rhelela. Kutani Vaisraele va tshuka swinene, va hela ni matimba.

Yeremiya 8:21

Ndzi hela ntamu loko ndzi vona ku vaviseka ka vanhu va ka hina; ndza rila, ndzi khomiwa hi gome.

Yeremiya 49:23

Ta Damaska hi leti. HOSI Xikwembu xi ri: “Vanhu va le Hamata ni va le Arpadi va hlangene tinhloko, hikuva va twile mahungu layo biha; va le ku chaveni, va ya hala ni hala kukota lwandle, a va na ku rhula.

Ezekiele 21:7

Vona va ta ku vutisa va ku: ‘Xana u rilela yini xana?’ U ta va hlamula u ku: ‘Ndza rila, hikuva ndzi twile leswaku makhombo ma le ndleleni; loko ma fikile, vanhu va ta hela ntamu, va tsemeka nhlana; va ta titivala, va nga ha tikoti hi ku chava. Makhombo lawa ma le ndleleni, swi tiyile sweswo, ku vula HOSI N'wini wa hinkwaswo.’ ”

Ezekiele 31:15

“Mina HOSI N'wini wa hinkwaswo ndzi ri, siku murhi lowu wu cukumetiweke exivandleni xa vafi, ndzi lerisile mati lama nga hansi ka misava leswaku ma wu funengeta, ma rila ku fa ka murhi wa kona; hikwalaho ka wona ndzi pfarile ni swinambyana swa le hansi, leswaku mati ya kona ma nga ha khuluki; ndzi funengetile ni ntshava ya Lebanoni hi xinyami hikwalaho ka wona, kutani mirhi hinkwayo ya le nhoveni yi vunile hi mhaka ya wona.

Nahume 2:2

HOSI Xikwembu xi pfuxeta ku dzuneka ka Yakobo, xi pfuxeta ni ku dzuneka ka Israele, hikuva vaonhi va onhile swa vona, va phatlulerile marhavi ya vona.