Matewu 28:18 - BIBELE Mahungu Lamanene

¹⁸ Kutani Yesu a va tshinelela, a vulavula na vona, a ku: “Ndzi nyikiwile vuhosi hinkwabyo etilweni ni la misaveni;

Testamente Leyimpsha Xichangana

¹⁸ Kutani Yesu avatshinelela, avulavula na vona, aku: “Ninyikiwile vuhosi hinkwabzu tilweni ni la misaveni;

Xitsonga (Bibele)

¹⁸ Kutani Yesu a va tshinelela a vulavula na vona, a ku: “Ndzi nyikiwile vuhosi hinkwabyo etilweni ni le misaveni;

Matewu 28:18 Referans Kwoze

Yohane 3:35

Tatana ú rhandza N'wana, kutani ú vekile swilo hinkwaswo emavokweni ya yena.

1 Petro 3:22

yena loyi a yeke etilweni, kutani sweswi ú le vokweni ra xinene ra Xikwembu, tintsumi ni vafumi ni leswa matimba swi ri ehansi ka yena.

Matewu 11:27

“Tatana ú vekile swilo hinkwaswo emavokweni ya mina; kutani a ku na loyi a tivaka N'wana, loko a nga ri Tatana; naswona a ku na loyi a tivaka Tatana, loko a nga ri N'wana, ni loyi N'wana a lavaka ku hlavutela Tatana eka yena.

Vaheveru 2:8

u vekile hinkwaswo swi va hansi ka minkondzo ya yena.” Kutani ke, loko Xikwembu xi vekile hinkwaswo ehansi ka minkondzo ya yena, swi vula leswaku a xi siyanga xilo ni xin'we xi nga ri hansi ka yena. Kambe, hilaha timhaka ti yimeke hakona, hina a hi si kota ku vona swilo hinkwaswo swi ri hansi ka yena.

1 Vakorinto 15:27

hikuva hi ku vula ka Matsalwa: “Xikwembu xi vekile hinkwaswo ehansi ka minkondzo ya yena.” Kutani loko Matsalwa ma vula leswaku: “Hinkwaswo swi vekiwile ehansi ka yena”, swa twala leswaku a ku katsiwi Xikwembu, hikuva hi xona xi vekeke swilo hinkwaswo ehansi ka Kriste.

Yohane 17:2

Hakunene, u n'wi nyikile vuhosi ehenhla ka vanhu hinkwavo, leswaku hinkwavo lava u n'wi nyikeke vona, yena a va nyika vutomi lebyi nga heriki.

Yohane 13:3

Yesu, hi ku tiva leswaku Tatana ú vekile swilo hinkwaswo emavokweni ya yena, ni leswaku ú humile eka Xikwembu, naswona a ya eka Xikwembu,

Vaheveru 1:2

Kambe emasikwini lawa yo hetelela, xi vulavurile na hina hi N'wana, loyi xi n'wi vekeke ku va mudyandzhaka wa swilo hinkwaswo, loyi naswona xi tumbuluxeke tilo ni misava ha yena.

Vakolosa 2:10

kutani n'wina mi kumile vutomi lebyo tala eka yena; hi yena la nga nhloko ya hinkwaswo leswi nga ni vundhuna ni ku fuma.

Luka 10:22

“Tatana ú vekile swilo hinkwaswo emavokweni ya mina; kutani a ku na loyi a tivaka N'wana leswaku i mani, loko a nga ri Tatana; naswona a ku na loyi a tivaka Tatana leswaku i mani, loko a nga ri N'wana, ni loyi N'wana a lavaka ku hlavutela Tatana eka yena.”

Nhlavutelo 19:16

Engubyini ya yena ni le ndzhumbyini wa yena, ku tsariwile vito leri nge: “Mufumi wa vafumi ni Hosi ya tihosi.”

Varhoma 14:9

Hikuva Kriste ú file, a tlhela a pfuka a hanya, leswaku a ta va Hosi ya lava feke ni ya lava hanyaka.

Nhlavutelo 17:14

Ti ta lwa ni Xinyimpfana, kambe Xinyimpfana xi ta ti hlula, hikuva i Hosi ya tihosi, ni Mufumi wa vafumi; ni malandza ya xona lama vitaniweke, lama hlawuriweke ni lama tshembekaka, xi ta ma nyika ku hlula.”

Nhlavutelo 11:15

Hiloko ntsumi ya vu-7 yi chaya nanga ya yona, kutani ku twakala ni marito lama huwelelaka hi le tilweni ma ku: “Matimba ya ku fuma misava, sweswi ma nyikiwile Hosi ya hina ni Mesiya wa yona, kutani ú ta fuma hilaha ku nga heriki.”

Matewu 26:64

Yesu a n'wi hlamula a ku: “Leswi u vulaku ke! Ntsena ndza mi byela ndzi ku: “ ‘Ku sukela sweswi, mi ta vona N'wana-wa-Munhu a tshamile evokweni ra xinene ra Loyi a nga ni matimba hinkwawo, mi n'wi vona a ta hi mapapa ya le tilweni.’ ”

Pisalema 89:27

Ndzi ta n'wi endla mativula ya mina, tihosi hinkwato ta misava ti ta va hansi ka yena.

Timhaka 2:36

“Hikokwalaho rixaka hinkwaro ra Vaisraele ri fanele ku tiva mhaka leyi swinene leswaku Yesu loyi mi n'wi vambeke, hi yena loyi Xikwembu xi n'wi endleke Hosi ni Mesiya.”

Timhaka 10:36

Rito leri xi ri rhumeleke Vaisraele, ma ri tiva, ri nga rito leri twarisaka mahungu lamanene ya ku rhula ha Yesu Kriste, yena Hosi ya vanhu hinkwavo.

Pisalema 89:19

Siku rin'wana u vulavurile na hina malandza ya wena hi xivono, u ku: “Ndzi nyikile nhenha yin'wana entamu lowukulu; ndzi yi hlawurile exikarhi ka vanhu va tiko, ndzi yi tlakusa.

Matewu 16:28

Ndzi tiyisile ndzi ri ka n'wina: Ku ni van'wana exikarhi ka lava nga kwala, lava nga ta ka va nga khumbiwi hi rifu va nga si vona N'wana-wa-Munhu a vuya eMfun'weni wa yena.”

Swivuriso 8:15

Tihosi ti fuma hi matimba ya mina, vafumi va veka milawu leyinene hikwalaho ka mina.

Yohane 3:31

Loyi a humaka ehenhla, ú le henhla ka hinkwavo; loyi a humaka emisaveni, i wa misava, kutani ú vulavula hi swa misava; loyi a humaka etilweni, ú le henhla ka hinkwavo.