Levhitika 7:12 - BIBELE Mahungu Lamanene

¹² Loko magandzelo lawa munhu wa kona a ma humesaka ma ri ya ku nkhensa Xikwembu, ú fanele ku tlhandlekela hi swimbhundzwa leswo-ke-comela leswi cheriweke mafurha, ni xinkwa lexo oma lexo-ke-comela lexi totiweke mafurha, ni swimbhundzwa swa mapa lamanene lama pfuviweke ni mafurha.

Xitsonga (Bibele)

¹² Loko munhu a ri humesa ku kombisa ku khensa ka yena, u ta humesa swin'we ni gandzelo ra ku khensa, swinkwa leswi nga riki na comela, leswi pfuviweke hi mafurha, ni swimbhundzwana leswi nga riki na comela, leswi totiweke hi mafurha, ni swimbundzu swa mapa layo saseka lama katingiweke, lama nga pfuviwa hi mafurha.

Levhitika 7:12 Referans Kwoze

Tinhlayo 6:15

Ú ta humesa ni xirhundzu xa xinkwa lexo-ke-comela, ni swimbhundzwa swa mapa lamanene lama pfuviweke hi mafurha, ni xinkwa lexo oma lexi totiweke mafurha, ni mapa ya gandzelo ni swakunwa swa kona.

Levhitika 2:4

“Loko mi humesa magandzelo ya swa le masin'wini hi leswi swekiweke kunene, humesani swimbhundzwa leswo-ke-comela leswi endliweke hi mapa lamanene lama cheriweke mafurha, kumbe mi humesa xinkwa xo oma lexo-ke-comela lexi totiweke mafurha.

1 Petro 2:5

Kutani, ku fana ni maribye lama hanyaka, na n'wina mi fanele ku akiwa mi endla yindlu ya moya, leswaku mi ta va vaprista lava hlawulekeke, mi humesa magandzelo ya moya lama amukelekaka eka Xikwembu ha Yesu Kriste.

Vaheveru 13:15

Loko swi ri tano, a hi humeseni magandzelo masiku hinkwawo ha yena Yesu, hi dzunisa Xikwembu ha wona, hi ri karhi hi vonga vito ra xona hi marito lama humaka emilon'weni ya hina.

Vaefesa 5:20

Masiku hinkwawo, nkhensani Xikwembu Tatana hikwalaho ka swilo hinkwaswo, hi vito ra Hosi ya hina Yesu Kriste.

Varhoma 1:21

Hambiloko va tivile Xikwembu, a va xi dzunisanga va ku i Xikwembu, a va xi nkhensanga; kambe va anakanyile leswo ka swi nga pfuni nchumu, ni timbilu ta vona leti nga riki na ku twisisa ti nyamisiwile.

Luka 17:18

Lava va 9 va kwihi xana? Xana a ku kumekanga na van'wana lava nga vuyela endzhaku ku ta dzunisa Xikwembu, ehandle ka munhu loyi wa rixaka rimbe xana?”

Luka 17:16

Kutani a tiwisa hi mombo emilengeni ya Yesu, a n'wi tlangela. Munhu yoloye a a ri Musamariya.

Hosiya 14:2

Fambani mi ri ni lexi mi nga ta xi vula, mi tlhelela eka HOSI Xikwembu; mi fika mi ku ka xona: “Hi rivalele milandzu ya hina hinkwayo; lexinene lexi hi nga ku humeselaka xona, i marito lama humaka emilon'wini ya hina; ma amukele!

Pisalema 116:17

Hikokwalaho ndzi ta ku humesela magandzelo ya ku nkhensa, ndzi khongela wena.

Pisalema 107:8

A va nkhense rirhandzu ra HOSI Xikwembu, ni mahlori lawa xi ma endlelaka vanhu,

Yeremiya 33:11

Hambiswiritano etindhawini teto, ku ta tlhela ku twakala minkulungwana, ni huwa ya ntsako, ni mpfumawulo wa minkhuvo ya vukati, ni tinsimu ta lava tisaka minkhenso ya vona eTempeleni, va ri karhi va yimbelela va ku: “ ‘Dzunisani HOSI ya matimba hinkwawo, hikuva yi ni vunene, rirhandzu ra yona hi leri nga heriki!’ “Hakunene ndzi ta pfuxa xivandla lexi, kutani xi ta kateka ku fana ni khale.

Pisalema 50:23

Ku humesa minkhenso i gandzelo leri ri ndzi tsakisaka; loyi a fambaka etindleleni letinene, ndzi ta n'wi ponisa mina Xikwembu.”

Nehemiya 12:43

Kutani siku rero vanhu va humesa magandzelo layo tala, va tsaka swinene hikuva Xikwembu a xi va nyikile ntsako lowukulu. Vavasati ni vana, na vona a va tsakile swinene. Huwa ya ntsako lowu a wu ri kona eYerusalema a yi fika ekule swinene.

2 TIKRONIKA 33:16

Manase a pfuxa alitari ya HOSI Xikwembu, a humesela ka yona magandzelo ya xinakulobye ni ya ku nkhensa. Kutani a lerisa va ka Yuda ku gandzela HOSI Xikwembu xa Israele ntsena.

2 TIKRONIKA 29:31

Kutani Hezekiya a ku ka ntshungu: “Hinkwenu mi tile haleno mi tamerile xo gandzela HOSI Xikwembu ha xona; hi wona nkarhi wa ku tshinela kusuhi na xona, mi xi humesela magandzelo ya n'wina ya ku nkhensa kwala ndlwini ya xona!” Kutani vanhu hinkwavo va ta ni swifuwo swa magandzelo ya vona ya ku nkhensa; van'wana lava titwaka, va humesa ni swifuwo swa magandzelo lama hisiwaka,

Levhitika 22:29

Ni loko mi tlhava xifuwo xa magandzelo ya ku ndzi nkhensa mina HOSI, xi tlhaveni hi ndlela leyi yi nga ta endla leswaku ndzi mi tsakela.

Levhitika 7:15

Nyama ya magandzelo ya xinakulobye lawa munhu a nkhensaka Xikwembu ha wona, yi fanele ku dyiwa yi hela hi siku leri a ma humesaka ha rona; a nga tshuki a siya yin'wana ku kondza ku fika mpundzu wa siku leri tlhandlamaka.

Levhitika 6:16

Mapa lama salaka ma ta dyiwa hi Aroni ni vana va yena; ma fanele ku endla xinkwa lexo-ke-comela, lexi nga ta dyeriwa exivandleni lexi hlawulekeke, ku nga xivaveni xa Ntsonga lowo Hlawuleka.

Levhitika 2:5

Loko mi humesa magandzelo hi xinkwa lexi oxiweke kunene, a xi ve xa mapa lamanene, lama cheriweke mafurha, ku nga ri comela.

Amosi 4:5

humesani gandzelo ra swinkwa ro nkhensa Xikwembu, twarisani tinyiko ta n'wina mi tidzunisa ha tona, hikuva sweswo hi swona leswi mi swi rhandzaka, n'wina vanhu va Israele!” HOSI N'wini wa hinkwaswo ú vula sweswo.