Levhitika 5:6 - BIBELE Mahungu Lamanene

⁶ kutani a humesela HOSI Xikwembu mhamba leyi nga ta susa xidyoho lexi; a nga humesa xifuwo lexitsongo xa xisati, xo fana ni nyimpfu kumbe mbuti. Kutani muprista ú ta n'wi basisa exidyohweni lexi a xi endleke.

Xitsonga (Bibele)

⁶ u ta humesela Yehovha hikwalaho ka nandzu wa yena, ntswele ya xifuwo lexitsongo, hambi yi ri nyimpfu, hambi mbuti leswaku yi va mhamba yo susa nandzu, kutani muprista u ta n'wi phahlela mhamba hikwalaho ka nandzu wa yena.

Levhitika 5:6 Referans Kwoze

Levhitika 4:28

Loko a tivisiwa xidyoho lexi a xi endleke, ú fanele ku ta ni mbuti ya thokazi leyi nga solekiki, a ta yi humesa yi va mhamba yo susa swidyoho swa yena,

Levhitika 4:32

“Loko a ta ni nyimpfu ku ta humesa ha yona mhamba yo susa swidyoho, nyimpfu ya kona yi fanele ku va leyi nga solekiki ya xisati.

Ezekiele 42:13

Kutani mupimi a ku ka mina: “Makamari ya le n'walungwini ni ya le dzongeni, lama langutanaka ni rivala, i makamari layo hlawuleka; ndhawu ya kona yi hlawulekile, hikuva hi kona laha vaprista lava tirhelaka HOSI Xikwembu eTempeleni va dyelaka ni ku hlayisela kona swakudya leswo hlawuleka swa magandzelo, ku fana ni swa le masin'wini leswi humeseriwaka Xikwembu, kumbe nyama ya magandzelo yo susa swidyoho ni ya magandzelo yo riha milandzu.

Ezekiele 40:39

Naswona erikupakupeni leri ra le nyangweni a ku ri ni matafula ya mune, mambirhi evokweni ra ximatsi, ni mambirhi eka lera xinene. Swifuwo swa magandzelo lama hisiwaka ni swa lama susaka swidyoho ni swa lama rihaka milandzu, a swi dlayeriwa ematafuleni lawa.

Levhitika 6:6

Ú fanele ku pambula khuna rin'we leri nga solekiki entlhambini wa yena, a ri yisa eka muprista leswaku ri va mhamba yo riha nandzu wa yena eka mina HOSI; nxavo wa khuna ra kona wu fanele ku ringana ni wa xifuwo xa magandzelo yo riha milandzu.

Levhitika 4:20

Xinkuzana lexi, muprista ú ta xi humesa ku fana ni xinkuzana lexin'wana xa mhamba yo susa swidyoho, a basisa ntshungu ha xona, kutani wu ta rivaleriwa xidyoho xa wona.

Tinhlayo 6:12

a tiveka etlhelo leswaku a tirhela HOSI Xikwembu, a sungula hi vuntshwa vunaziri bya yena; kutani ú ta ta ni xinyimpfana xa khuna xa lembe rin'we xi va xa gandzelo ro riha, kambe masiku lama hundzeke ya ku tiveka ka yena etlhelo a ma nga ha hlayiwi, hikuva ma nyamisiwile.

Ezekiele 44:27

Kutani siku a tlhelelaka eTempeleni ku ya tirha ntirho wa yena lowo hlawuleka exivaveni xa le ndzeni, ú ta rhanga a tihumesela gandzelo ro susa swidyoho. Ndzi vula sweswo mina HOSI N'wini wa hinkwaswo.

Levhitika 4:31

Munhu wa kona ú fanele ku tsema mafurha hinkwawo ya mbuti, ku fana ni leswi va tsemisaka swona mafurha ya xifuwo xa magandzelo ya xinakulobye. Kutani muprista ú ta teka mafurha lawa, a ma hisa ehenhla ka alitari, ma va mhamba leyi ku nun'hwela ka yona ku nga ta tsakisa HOSI Xikwembu. Hi ndlela leyi, muprista ú ta va a basisile munhu wa kona, kutani ú ta rivaleriwa swidyoho swa yena.

Levhitika 4:35

Munhu wa kona ú fanele ku tsema mafurha hinkwawo ya nyimpfu leyi, ku fana ni leswi va tsemisaka swona mafurha ya nyimpfu ya magandzelo ya xinakulobye. Kutani muprista ú ta teka mafurha lawa, a ma hisa ehenhla ka alitari, laha magandzelo lama humeseriwaka HOSI Xikwembu ma hiseriwaka kona. Hi ndlela leyi, muprista ú ta va a basisile munhu wa kona, kutani ú ta rivaleriwa swidyoho leswi a swi endleke.