Levhitika 23:3 - BIBELE Mahungu Lamanene

³ Mi ni masiku ya 6 lawa mi faneleke ku endla mintirho ya n'wina hinkwayo ha wona, kambe siku ra vu-7 i siku ro wisa ra Savata, leri mi faneleke ku hlengeletana ha rona mi ndzi gandzela. Hi siku leri, hinkwako lomu mi tshamaka kona, mi nga tshuki mi tirha ntirho ni wun'we; siku ra Savata ri hlawuleriwile mina HOSI.

Xitsonga (Bibele)

³ “ ‘Ku ta tirhiwa hi masiku ya ntlhanu na rin'we; kambe siku ra ntlhanu na mambirhi, i Savata, siku ra ku wisa leri nga ni nhlengeletano leyi hlawuriweke; mi nga tshuki mi tirha ntirho ni wun'we; i ku wisa loku hlawuleriweke Yehovha emitini hinkwayo ya n'wina.

Levhitika 23:3 Referans Kwoze

Levhitika 19:3

“Un'wana ni un'wana wa n'wina ú fanele ku va ni xichavo eka mana wa yena ni ka tata wa yena, naswona a hlayisa masiku ya mina ya Savata: Hi mina HOSI, Xikwembu xa n'wina.

Eksoda 23:12

“Mi ni masiku ya 6 lawa mi faneleke ku endla mintirho ya n'wina hinkwayo ha wona; kambe hi siku ra vu-7, mi wisa; tihomu ta n'wina ni timbhongolo ta n'wina ti ta wisa na tona; hambi va ri vana va mahlonga ya n'wina ya xisati, ni valuveri, va ta kuma ku hefemula na vona.

Luka 13:14

Kambe mufambisi wa sinagoga a hlundzuka hileswi Yesu a hanyiseke munhu hi siku ra Savata, kutani a tlakusa rito, a ku ka ntshungu: “Ku ni masiku ya 6 lawa mintirho yi fanelaka ku tirhiwa ha wona; tanani hi masiku walawo ku ta hanyisiwa, ku nga ri hi siku ra Savata.”

Eksoda 34:21

“Mi ni masiku ya 6 lawa mi faneleke ku tirha ha wona, kambe hi siku ra vu-7 mi ta wisa, hambiloko wu ri nkarhi wa xirimo, kumbe nkarhi wa ntshovelo.

Nhlavutelo 1:10

Kutani, hi siku ra Hosi, ndzi tela hi Moya, ndzi twa rito leri huwelelaka hi le ndzhaku ka mina, ri pfuma kukota nanga,

Timhaka 15:21

hikuva i khale ngopfu milawu ya Muxe yi sungurile ku dyondzisiwa emitini hinkwayo, yi ri karhi yi hlayiwa emasinagogeni masiku hinkwawo ya Savata.”

Luka 23:56

Kutani va tlhelela kaya, va ya lunghisa mirhi ya risuna ni mafurha layo nun'hwela; kambe hi siku ra Savata, va wisa hi ku ya hi nawu.

Esaya 58:13

HOSI Xikwembu xi ri: “Mi nga rhendzeleki-rhendzeleki hi siku ra Savata, mi nga endli leswi mi swi rhandzaka esikweni ra mina lero hlawuleka; siku leri, mi fanele ku ri tsakela mi ri xixima, hikuva i siku ra mina lero hlawuleka; ri xiximeni, mi nga yi lomu mi ku tsakelaka, kumbe ku endla leswi mi swi rhandzaka, naswona mi nga vulavuli swo huma ndleleni hi siku leri.

Esaya 56:6

“Na vona vanhu vo huma ematikweni man'wana, loko va tinyiketa eka mina HOSI, va tsakela ku ndzi tirhela, va ndzi rhandza, va va malandza ya mina, ni loko va hlayisa siku ra Savata va nga ri nyamisi, va chivirikela ni ntwanano wa mina,

Esaya 56:2

Ku katekile munhu loyi a chivirikelaka ku hanya hi milawu ya mina, loyi a hlayisaka siku ra Savata, a nga ri nyamisi, loyi a tikhomaka, a nga endli nchumu xo biha.”

Eksoda 16:29

Twisisani leswaku mina HOSI ndzi mi nyikile siku ra ku wisa ra Savata; hikokwalaho, hi siku ra vu-6, ndzi mi nyika swakudya swa masiku mambirhi, kutani un'wana ni un'wana wa n'wina a a tshame lomu a nga kona, ku nga tshuki ku va ni loyi a humaka a ya ehandle, hi siku ra vu-7.”

Eksoda 16:23

kutani yena a va hlamula a ku: “HOSI Xikwembu xi lerisile sweswo xi te: ‘Mundzuku i siku ra Savata, ri nga siku ra ku wisa leri hlawuleriweke mina HOSI; katingani leswi mi lavaka ku swi katinga, mi sweka leswi mi lavaka ku swi sweka, kutani hinkwaswo leswi salaka, swi vekeni, mi swi hlayisela mundzuku.’ ”

Eksoda 16:30

Hikokwalaho, hi siku ra vu-7, vanhu a va wisa.