Levhitika 19:3 - BIBELE Mahungu Lamanene

³ “Un'wana ni un'wana wa n'wina ú fanele ku va ni xichavo eka mana wa yena ni ka tata wa yena, naswona a hlayisa masiku ya mina ya Savata: Hi mina HOSI, Xikwembu xa n'wina.

Xitsonga (Bibele)

³ “ ‘Un'wana ni un'wana a a xixime mana wa yena ni tata wa yena; a a hlayise ni Tisavata ta mina. Hi mina Yehovha, Xikwembu xa n'wina.

Levhitika 19:3 Referans Kwoze

Eksoda 20:12

“Xixima tata wa wena ni mana wa wena, leswaku u ta hanya masiku layo tala etikweni leri mina HOSI Xikwembu xa wena ndzi ku nyikaka rona.

Eksoda 20:8

“Tsundzuka ku hlayisa siku ra Savata, ri tshama ri hlawulekile.

Vaheveru 12:9

Ehandle ka swona, hi vile ni vatata wa hina va laha misaveni lava a va hi laya, kutani hi va kombile xichavo. Xana a hi nga titsongahati ngopfu ku tlula sweswo eka Tata wa hina emoyeni, leswaku hi hanya xana?

Swivuriso 30:17

Munhu loyi a sandzaka tata wa yena, a tlhela a ala ku yingisa mana wa yena, ú ta xokoriwa mahlo hi mawukuwuku, a dyiwa hi makoti.

Levhitika 11:44

hikokwalaho, tivoneleni leswaku mi va lava hlawulekeke, hikuva mina ndzi hlawulekile. Mi nga tshuki mi tinyamisa hi ku dya xihadyana xihi na xihi lexi kokovaka emisaveni.

Esaya 58:13

HOSI Xikwembu xi ri: “Mi nga rhendzeleki-rhendzeleki hi siku ra Savata, mi nga endli leswi mi swi rhandzaka esikweni ra mina lero hlawuleka; siku leri, mi fanele ku ri tsakela mi ri xixima, hikuva i siku ra mina lero hlawuleka; ri xiximeni, mi nga yi lomu mi ku tsakelaka, kumbe ku endla leswi mi swi rhandzaka, naswona mi nga vulavuli swo huma ndleleni hi siku leri.

Swivuriso 30:11

Ku ni vanhu lava rhuketelaka vatata wa vona, hambi vamana wa vona, a va va xiximi.

Swivuriso 23:22

Yingisa tata wa wena, hikuva hi yena la ku kombeke misava, ni mana wa wena, loko a dyuharile, u nga n'wi nyenyi.

Duteronoma 27:16

“ ‘A a rhukaniwe, munhu loyi a sandzaka tata wa yena kumbe mana wa yena.’ Kutani Vaisraele hinkwavo va ta hlamula va ku: ‘Amen!’

Eksoda 21:17

“Un'wana ni un'wana loyi a rhuketelaka tata wa yena kumbe mana wa yena, ú ta dlayiwa.

Eksoda 21:15

“Un'wana ni un'wana loyi a baka tata wa yena kumbe mana wa yena, ú ta dlayiwa.

Eksoda 16:29

Twisisani leswaku mina HOSI ndzi mi nyikile siku ra ku wisa ra Savata; hikokwalaho, hi siku ra vu-6, ndzi mi nyika swakudya swa masiku mambirhi, kutani un'wana ni un'wana wa n'wina a a tshame lomu a nga kona, ku nga tshuki ku va ni loyi a humaka a ya ehandle, hi siku ra vu-7.”

Malakiya 1:6

HOSI ya matimba hinkwawo yi ri: “N'wana wa xinuna ú xixima tata wa yena, ni nandza ú komba xichavo eka n'wini wa yena. Kambe n'wina a mi ndzi xiximi, ni xichavo a mi ndzi kombi, hambileswi ndzi nga tata wa n'wina ni n'wini wa n'wina; ndzi vula n'wina vaprista lava solaka vito ra mina, kutani mi ri: ‘Hi sorile vito ra wena hi ndlela yihi ke?’

Ezekiele 20:12

Ndzi va nyikile ni masiku ya Savata, leswaku ma va mfungho wa ntwanano wa mina na vona, va ta tiva leswaku loyi a va hlawulekisaka, hi mina HOSI.

Levhitika 26:2

Mi fanele ku hlayisa masiku ya mina ya Savata, mi xixima ni xivandla xa mina lexo hlawuleka: Hi mina HOSI, Xikwembu xa n'wina.

Swivuriso 1:8

N'wananga, yingisa swiletelo swa tata wa wena; ni milawu ya mana wa wena, u nga tshuki u hambana na yona:

Levhitika 19:30

Mi fanele ku hlayisa masiku ya mina ya Savata, mi xixima ni xivandla xa mina lexo hlawuleka: Hi mina HOSI.

Levhitika 23:3

Mi ni masiku ya 6 lawa mi faneleke ku endla mintirho ya n'wina hinkwayo ha wona, kambe siku ra vu-7 i siku ro wisa ra Savata, leri mi faneleke ku hlengeletana ha rona mi ndzi gandzela. Hi siku leri, hinkwako lomu mi tshamaka kona, mi nga tshuki mi tirha ntirho ni wun'we; siku ra Savata ri hlawuleriwile mina HOSI.

Duteronoma 5:16

“ ‘Xixima tata wa wena ni mana wa wena, hilaha mina HOSI Xikwembu xa wena ndzi ku leriseke hakona, leswaku u ta hanya masiku layo tala, u kateka etikweni leri mina HOSI Xikwembu xa wena ndzi ku nyikaka rona.

Genesa 48:12

Kavaloko Yosefa a susa vana va yena ematsolweni ya tata wa yena, kutani a nkhinsama, a korhamela hansi.

Levhitika 19:25

Hi lembe ra vuntlhanu, mi nga sungula ku dya mihandzu ya mirhi ya n'wina, leswaku yi ta hamba yi tswala swinene: Hi mina HOSI, Xikwembu xa n'wina.

Levhitika 19:31

“Mi nga tshuki mi ya eka lava nga ni swikwembu kumbe eka swingomantanda, mi nga tshuki mi tinyamisa hi ku tirhisana na vanhu vo tano: Hi mina HOSI, Xikwembu xa n'wina.

Levhitika 19:34

Munhu wo tano, n'wi hlayiseni ku fana ni Muisraele wa ka n'wina, mi n'wi rhandza ku fana ni loko mi tirhandza, hikuva na n'wina mi vile valuveri etikweni ra Egipta: Hi mina HOSI, Xikwembu xa n'wina.

Nehemiya 9:14

U va tivisile ni siku ra wena lero hlawuleka ra Savata, u va nyika swiletelo ni swileriso ni milawu hi nomu wa nandza wa wena Muxe.