Hosiya 13:3 - BIBELE Mahungu Lamanene

³ Hikokwalaho, va ta fana ni hunguva nimixo, kumbe mberha leyi hatlisaka ku dzudzeka; va ta fana ni mungu lowu hahisiwaka hi moya exivuyeni, kumbe musi lowu tuvikaka wu huma endlwini.

Xitsonga (Bibele)

³ Hikwalaho, va ta kotisa hunguva ya mixo, ni mberha leyi sukaka hi ku hatlisa, va fana ni mungu lowu hahisiwaka exivuyeni, ni musi loko wu huma echimeleni.

Hosiya 13:3 Referans Kwoze

Hosiya 6:4

Xana ndzi ta endla yini hi n'wina va ka Efrayimi xana? Na n'wina va ka Yuda, ndzi ta endla yini hi n'wina xana? Ku tshembeka ka n'wina ku fana ni hunguva nimixo, ku fana ni mberha leyi hatlisaka ku dzudzeka.

Pisalema 1:4

Kasi a swi tano eka lavo homboloka: Vona va fana ni mungu lowu hangalasiwaka hi moya.

Pisalema 68:2

Lavo homboloka, u va hangalasa we Xikwembu, va nyamalala ku fana ni musi lowu hahisiwaka, va herisiwa emahlweni ka wena kukota mafurha endzilweni.

Daniele 2:35

Hiloko nsimbhi ni vumba ni koporo ni silivhere ni nsuku swi fayekela hinkwaswo, swi sileka swi sala swi fana ni mungu exivuyeni; kutani moya wu swi hahisa, swi nyamalala. Kambe ribye leri beke xifaniso, ri kula ri hundzuka ntshava, ri khubumeta misava hinkwayo.

Esaya 17:13

Vanhu va matiko va ba pongo ku fana ni maboboma, kambe Xikwembu xi ta va tshinya, va tsutsuma va ya kule swinene, kukota mungu lowu hahisiwaka hi moya etintshaveni, kumbe ritshuri loko ku ri na xidzedze.

Ntirho 21:18

A hi kangani va tlakuriwa hi moya wa xidzedze; a va hahisiwi kukota mungu kumbe mavivi.

Ntirho 30:15

Ndzi wele hi makhombo layo chavisa, ku chaviseka ka mina ku hahile ni moya, ntsako wa mina wu dzudzekile kukotisa mberha.

Sofoniya 2:2

mi nga si hlongoriwa, mi nyamalala kukota mungu, mi nga si hisiwa hi vukari lebyi pfurhaka bya HOSI Xikwembu, siku ra ku kariha ka xona ri nga si mi fikela.

Zakariya 8:12

hikuva va ta rima, va byala mbewu hi ku rhula, mirhi ya vhinya yi tswala mihandzu. Misava yi ta humesa ntshovelo, matilo ma nisa mberha, kutani vanhu va mina lava poneke, va ta kuma swilo leswi hinkwaswo, swi va ndzhaka ya vona.