Hosiya 11:10 - BIBELE Mahungu Lamanene

¹⁰ Va ta landzelela HOSI Xikwembu, xi ri karhi xi bonga ku fana ni nghala; kutani loko vanhu va xona va twa ku bonga ka xona, va ta vuya hi ku rhurhumela va huma evupeladyambu;

Xitsonga (Bibele)

¹⁰ Va ta landzela Yehovha. Kukotisa nghala u ta dzumadzuma; yena u ta dzumadzuma, kutani vana va yena va ta rhurhumela, va ta eka yena, va pfa hitlhelo ra lwandle.

Hosiya 11:10 Referans Kwoze

Amosi 1:2

Kutani Amosi a ku: “HOSI Xikwembu xi bonga eSiyoni, rito ra xona ri duma ri huma eYerusalema, kutani lomu varisi va dyiselaka kona, ka tshwa, swimila swi vuna enhlohlorhini ya ntshava ya Karmele.”

Yuwele 3:16

HOSI Xikwembu xi bonga eSiyoni, rito ra xona ri duma ri huma eYerusalema, kutani matilo ni misava swa tsekatseka. Kambe HOSI Xikwembu i vutumbelo bya vanhu va xona, hi xona xi nga khokholo ra Vaisraele.

Esaya 31:4

HOSI Xikwembu xi te ka mina: “Mina HOSI ya matimba hinkwawo, ndzi ta rhelela, ndzi ta lwela muti wa Siyoni ni xintshabyana xa wona; ndzi ta fana ni nghala leyi bongaka loko yi kume nyama, leyi yi nga chaviki nchumu nikutsongo, hambiloko varisi va ba huwa va ringeta ku yi hlongola.

Yeremiya 25:30

HOSI Xikwembu xi engeta xi vulavula na mina xi ku: “Famba u ya va byela marito hinkwawo lawa ya nge: “ ‘HOSI Xikwembu xi huwelela xi ri henhla ematilweni, xi twarisa rito ra xona xi ri evutshan'wini bya xona lebyo hlawuleka; xi tshinya vanhu va xona, xi ba huwa kukota loko va ri eku tshoveleni ensin'wini ya vhinya; huwa ya kona yi fika etindleveni ta vaaki hinkwavo va misava,

Yeremiya 31:9

Va ta vuya va ri eku rileni, ndzi ta va rhangela va khavaxele mihloti. Ndzi ta va fambisa kusuhi ni mati layo tenga, endleleni leyi khuleriweke, va nga khuguriwi hi nchumu. Hi mina tata wa Vaisraele, Efrayimi hi yena mativula ya mina.”

Esaya 64:2

Tana kukota ritshwa leri hlaselaka xihlahla, kumbe ndzilo lowu virisaka mati, kutani valala va ta swi tiva leswaku hi we mani, ni vamatiko va ta rhurhumela loko va ku vona.

2 Petro 2:10

ngopfu-ngopfu lava landzaka swa ntumbuluko wa vona wa laha misaveni, va navela ku titsakisa hi swilo swa thyaka, va sandza ni vuhosi bya Xikwembu. Vanhu lava va titshemba ngopfu, naswona va titiva; a va chavi ku sandza swa le henhla leswi kwetsimeke.

Varhoma 8:1

Kutani sweswi a ka ha ri na ku avanyisiwa eka lava nga va ka Kriste Yesu.

Timhaka 24:25

Kambe loko Pawulo a vulavula hi ta ku lulama, ni ta ku tikhoma, ni ta ku avanyisiwa loku nga ta ta, Felikisi a khomiwa hi ku chava, a hlamula, a ku: “Namuntlha, famba u ya tshama; siku ndzi kumaka nkarhi, ndzi ta tlhela ndzi ku vitana.”

Yohane 8:12

Kutani Yesu a engeta a vulavula na vona, a ku: “Hi mina ku vonakala ka misava; loyi a ndzi landzelelaka a nga ka a nga fambi emunyameni ni siku ni rin'we, kambe ú ta va ni ku vonakala ka vutomi.”

Zakariya 10:12

Kambe vanhu va mina ndzi ta va tiyisa, va ta hanya hi ndlela leyi yi ndzi tsakisaka. Ndzi vurisa sweswo mina HOSI.”

Zakariya 8:7

HOSI ya matimba hinkwawo yi vurisa sweswo yi ri: “Vonani, ndzi ta lamulela vanhu va mina eka vanhu va matiko ya le vuxeni, ni ka vanhu va matiko ya le vupeladyambu.

Habakuku 3:16

Loko ndzi twa leswi hinkwaswo, ndzi tela hi rhumbu, milomo ya mina yi tshavatana hi huwa ya kona; marhambu ya mina ma heleriwa hi mongo, ni matsolo ya mina ma gudlagudla. Ndzi langutela ntsena siku ra khombo, leri nga ta wela vanhu lava va hi hlaselaka.

Mikiya 4:5

Vanhu hinkwavo va matiko man'wana va nga ha tigandzelela swikwembu swa vona, kambe hina hi ta gandzela HOSI Xikwembu xa hina hilaha ku nga heriki.

Amosi 3:8

I mani a nga rhurhumeliki, loko nghala yi bonga xana? Xana i mani la nga alaka ku va muprofeta, loko HOSI N'wini wa hinkwaswo a vulavurile, xana?

Amosi 3:4

Xana nghala yi nga bonga exihlahleni, yi nga kumanga lexi yi nga xi khomaka ke? Hambi n'wana wa nghala, xana wa vomba ebakweni, loko a nga vuyanga na nchumu xana?

Hosiya 3:5

Kambe nkarhi wu ta fika, lowu vanhu va tiko ra Israele va nga ta hundzuka va lava HOSI Xikwembu xa vona, na Davhida hosi ya vona. Kutani va ta ta eka HOSI Xikwembu hi ku rhurhumela, va amukela tinyiko ta xona letinene.

Yeremiya 33:9

Loko vanhu va misava hinkwayo va twa hinkwaswo leswinene leswi ndzi swi endlelaka va le Yerusalema, va ta ndzi tsakela, va ndzi dzunisa ni ku ndzi twarisa; loko va vona ku kateka ni ku rhula loku ndzi ku tiselaka Yerusalema, va ta hlamala va ndzi komba xichavo.’ ”

Yeremiya 7:9

Mi le ku yiveni, ma dlaya, ma oswa, mi hlambanya hi mavunwa, mi hisela swikwembu swa Baali emirhi ya risuna, mi landzelela ni swikwembu swin'wana leswi khale a mi nga swi tivi.

Yeremiya 7:6

Mi nga xanisi valuveri, ni lava feriweke hi vatswari, ni tinoni. Exivandleni lexi mi nga tshuki mi dlaya vanhu lava nga riki na nandzu. Naswona tshikani ku landzelela swikwembu swa hava leswi swi mi vangelaka makhombo.

Yeremiya 5:22

Mina HOSI ndzi ri, hikwalaho ka yini mi nga ndzi chavi, hikwalaho ka yini mi nga rhurhumeli emahlweni ka mina xana? Mati ya lwandle ndzi ma bele ndzilekana hi sava rinene, a ma nga wu tluli ni siku ni rin'we; hambiloko magandlati ma nga tlakuka, kumbe lwandle ri pfuma, ndzilekana wolowo wu nge tluriwi.

Yeremiya 2:2

“Famba u ya huwelela emahlweni ka vanhu va Yerusalema, u va byela leswaku mina HOSI ndzi ri: “ ‘Ndzi anakanya ku tshembeka ka n'wina loko ma ha ri lavantshwa, ni rirhandzu ra n'wina loko ma ha ku hloma, ni hilaha a mi ndzi namarhela hakona emananga, lomu ku nga byariwiki nchumu.

Esaya 49:10

A va nga fi hi ndlala kumbe torha, ku hisa ka dyambu a ku nga va dlayi, hikuva loyi a va twelaka vusiwana, ú ta va rhangela, ú ta va fambisa hi lomu ku nga ni swihlovo.

Esaya 42:13

HOSI Xikwembu xi fana ni nhenha leyi humaka nyimpi, xi kombisa vukari bya xona kukota nghwazi; xa huwelela xi ba huwa leyikulu, xi komba matimba ya xona emahlweni ka valala va xona.

Esaya 2:5

N'wina va ka Yakobo, tanani hi famba eku vonakaleni ka HOSI!

Pisalema 119:120

Ndza rhurhumela emahlweni ka wena hikuva ndza ku chava, ndzi chava ni leswi u swi boheke.

Pisalema 2:11

Tirhelani HOSI Xikwembu hi xichavo, mi rhurhumela emahlweni ka xona.

Ntirho 37:1

Tilo leri ra ndzi rhurhumerisa, ri tshukisa ngopfu mbilu ya mina.

Nhlavutelo 10:3

yi huwelela hi rito leri tlakukeke ku fana ni loko nghala yi vomba. Loko yi huwelerile, ku twala ku dzindza ka matilo ya 7.

Esaya 66:2

Swilo hinkwaswo swi endliwile hi mina, kutani i swa mina hinkwaswo. Ndzi tsakela munhu loyi a titsongahataka, loyi a tisolaka hi mbilu hinkwayo, a xixima milawu ya mina.

Esaya 66:5

N'wina mi xiximaka milawu ya HOSI Xikwembu, twanani leswi xi vulaka swona; xi ri: “Vamakwenu va mi venga, va mi hlongola hi mhaka ya leswi mi ndzi tshembaka, va mi hlekula, va ku: ‘HOSI Xikwembu a xi mi kombe ku dzuneka ka xona, hi ta vona ku tsaka ka n'wina!’ Kambe vanhu volavo, hi vona va nga ta va ni tingana.”

Ezekiele 26:16

Varhangeri va matiko hinkwawo lama nga kusuhi ni lwandle, va ta suka eswiluvelweni swa vona, va hluvula swiambalo swa vona swo saseka swa vuhosi; va ta ambala swa nkosi, va titshamela ehansi va ri karhi va rhurhumela minkarhi hinkwayo, va chavisiwa hi leswi humelelaka kwala ka wena.

Esaya 11:11

Eminkarhini yoleyo, N'wini wa hinkwaswo ú ta tlhela a tlakusa voko ra yena, a vuyisa masalela ya vanhu va yena lava nga ta va va ha ri le Asiriya, ni le Egipta, ni le Patroso, ni le Etiyopiya, ni le Elamu, ni le Xinara, ni le Hamata, ni le swihlaleni.

Yeremiya 50:4

HOSI Xikwembu xi ri: “Loko nkarhi wolowo wu ta va wu fikile, Vaisraele ni va ka Yuda va ta hlengeletana, va suka eBabilona va ri karhi va rila, va lava mina HOSI Xikwembu xa vona.

Zakariya 10:10

Ndzi ta va vuyisa va huma etikweni ra Egipta, ndzi ta va hlengeleta va suka etikweni ra Asiriya; ndzi ta va tshamisisa etikweni ra Giliyadi ni ra Lebanoni, va kondza va pfumala ni ndhawu.