Hosiya 10:8 - BIBELE Mahungu Lamanene

⁸ Switsunga leswo hlawuleka swa le Avene swi ta herisiwa, kona exivindzini xa vudyoho bya Israele. Etialitarini ta vona ku ta mila mitwa ni mahlwehlwe. Va ta byela tintshava va ku: “Hi funengeteni!” ni le ka swintshabyana va ta ku: “Hi weleni henhla!”

Xitsonga (Bibele)

⁸ Ku hele ni swivandla leswi tlakukeke swa Beta-Avene, leswi nga swidyoho swa Israele. Mitwa ni swinhlehlwana swa mila etialitarini ta vona: Kutani va ta ku eka tintshava: “Mi hi funengeta!” ni ka switsunga: “Hi weleni ehenhla!”

Hosiya 10:8 Referans Kwoze

Luka 23:30

“Enkarhini wolowo va ta ku ka tintshava: ‘Hi weleni henhla!’ ni ka switsunga: ‘Hi funengeteni!’

Nhlavutelo 6:16

Va vitana tintshava ni maribye va ku: “Hi weleni ehenhla, mi hi funengeta leswaku loyi a tshameke exiluvelweni a ta kala a nga hi voni, ni vukari bya Xinyimpfana byi ta kala byi nga hi fikeli.

Esaya 2:19

Vanhu va ta nghena emabakweni ya maribye, ni le makheleni emisaveni, va tumbela vukari bya HOSI Xikwembu, ni ku kwetsima ka xona lokukulu, loko xi humelela xi ta chavisa vanhu emisaveni.

Hosiya 9:6

Vonani, va tsutsuma khombo; Vaegipta va ta va hlengeleta, masirha ya vona ma ta va le Memfisi; swibya swa vona swa nkoka swa silivhere swi ta funengetiwa hi mahlwehlwe, mintsonga ya vona yi ta mila mitwa.

Amosi 8:14

Vanhu lava hlambanyaka hi Axima, xikwembu xa xifaniso xa le Samariya, va ku: ‘Hi hlambanya hi xikwembu xa wena Dani’, ni lava va nge: ‘Hi hlambanya hi ndlela yo ya eBerexeba’, va ta wa va nga ha pfuki, ni siku ni rin'we.”

Esaya 32:13

rilelani masimu ya va ka hina lama tlhumeke hi mitwa ni swigatlu, rilelani mindyangu hinkwayo leyi a ku tsakiwa ka yona, emutini lowu wa ntsako.

Nhlavutelo 9:6

Emasikwini walawo vanhu va ta lava rifu, kambe a va nga ri kumi; va ta navela ku fa, kambe rifu ri ta tsutsuma ri va siya.

Mikiya 1:13

Panani tihanci n'wina va le Lakixi, mi baleka; hi n'wina mi dyondziseke va le Yerusalema ku dyoha, hikuva a mi ri ni swilo hinkwaswo leswi a swi dyohisa tiko ra Israele.

Mikiya 1:5

Hinkwaswo leswi swi vangiwa hi ku tiarisa ka va ka Yakobo, swi tisiwa hi ku dyoha ka Vaisraele. Xana la endlaka leswaku va ka Yakobo va tiarisa i mani? I muti wa Samariya! I mani la dyohisaka va le Yuda? I muti wa Yerusalema!

Hosiya 10:5

Vaaki va Samariya va khomile hi gome, va vilelela rhole ra le Beta-Avene; va le ku rileni ka nkosi wa rona, ni swiphukuphuku leswa vaprista va rona swi le ku kalakaleni, hikuva ku dzuneka ka rona ku dzudzekile.

Hosiya 10:2

Timbilu ta vona ti tele vukanganyisi, kutani va ta dlawela milandzu ya vona. Xikwembu xi ta mbindzimuxa tialitari ta vona, xi fayetela ni maribye ya vona ya vukhongeri bya hava.

Hosiya 5:8

Chayani nanga eGibeya, eRhama banani mhalamhala, yi mbvungunyiseni le Beta-Avene! Mi fikeriwile, n'wina va ka Benjamini!

Hosiya 4:15

Hambileswi mi endlaka vunghwavava n'wina vanhu va Israele, vanhu va Yuda va nga tshuki va wela enandzwini wolowo. Mi nga tshuki mi ya eGiligala, mi nga tlhandlukeli eBeta-Avene; mi nga tshuki mi ku: “Ndza hlambanya emahlweni ka HOSI, Xikwembu lexi hanyaka!”

Hosiya 4:13

Va tolovele ku humesa magandzelo etinhlohlorhini ta tintshava, va hisa timhamba eswitshabyaneni, ehansi ka mirhi ya tinxaka-xaka leyi tlhumeke, hikuva mindzhuti ya yona ya nandziha. Hikokwalaho, vana va n'wina va xisati va hundzuke tinghwavava, vingi va n'wina va tinyiketa evugangwini.

Esaya 34:13

Makhokholo ma ta tlhuma hi mitwa, miti leyi biyeleriweke yi ta tala hi mahlwehlwe ni swigatlu, mahlolwa ma ta rhendzeleka-rhendzeleka kona, ni tiyimbhu ti ta tshama kona.

2 TIKRONIKA 31:1

Loko nkhuvo wu herile, Vaisraele hinkwavo lava a va tile enkhubyeni, va huma va ya emitini ya Yuda, va fika va fayetela maribye ya vugandzeri, va tsema ni timhandze ta Axera, va hindzimuxa tialitari ta le switsungeni leswo hlawuleka, etikweni hinkwaro ra Yuda, ni ra Benjamini, ni ra Efrayimi, ni ra Manase, va nga siyi na yin'we ya tialitari teto. Kutani Vaisraele hinkwavo va hangalaka, un'wana ni un'wana a kongoma ekaya ka yena.

2 TIHOSI 23:15

Naswona, Yosiyasi a hindzimuxa alitari ya le Betele, exivandleni lexo hlawuleka lexi Yerobuwamu n'wana Nebati a a xi lulamisile, lexi a dyohiseke Vaisraele ha xona. A hindzimuxa alitari leyi ni hinkwaswo swa xitsunga xa kona, a fayetela maribye ya yona, a ma kandziyela, a hisa ni mhandze ya Axera xikwembukazi.

1 TIHOSI 14:16

Xona xi ta fularhela Vaisraele hikwalaho ka swidyoho leswi Yerobuwamu a swi endleke, ni leswi a kuceteleke Vaisraele ku swi endla.”

1 TIHOSI 13:34

Maendlele lawa hi wona lama dyohiseke ndyangu wa Yerobuwamu, lero kala wu heriseriwa makumu ni ku nyamalala laha misaveni.

1 TIHOSI 13:2

Kutani hi ku lerisiwa hi HOSI Xikwembu, munhu loyi a huwelela a ri karhi a sandza ni alitari, a ku: “We alitari, we alitari, HOSI Xikwembu xi ni rito eka wena leri nge: ‘Yingisa! Ku ta velekiwa n'wana wa mufana erixakeni ra Davhida. Vito ra yena ri ta va Yosiyasi. Ú ta dlaya vaprista va switsunga leswo hlawuleka ehenhla ka wena, vona lava hisaka magandzelo eka wena. Hambi ma ri marhambu ya vanhu ma ta hisiwa ehenhla ka wena.’ ”

Duteronoma 9:21

Kutani ndzi teka xilo lexi xi mi dyohiseke, ri nga rhole leri mi ri endleke, ndzi hisa, ndzi fayetela ku huma mapa, kutani ndzi teka mapa ya kona ndzi ma chela exinambyaneni lexi khulukaka xi suka entshaveni.

Genesa 3:8

Hi nkarhi wa madyambu, wanuna ni nsati wa yena va twa HOSI Xikwembu xi ri karhi xi famba-famba entangeni. Kutani va tumbela exikarhi ka mirhi entangeni, va chava ku voniwa hi HOSI Xikwembu.

Hosiya 2:6

“Hikokwalaho, ndzi ta pfala hi mitwa lomu a taka hi kona, ndzi fumbetela maribye endleleni ya yena, leswaku a nga ha kumi ko hundza ha kona.

Hosiya 10:9

N'wina vanhu va tiko ra Israele, mi dyohile, ku sukela enkarhini wa timhaka ta le Gibeya; ni sweswi ma ha ya emahlweni na swona. Xana nyimpi a yi nga mi teli kwale mutini wa Gibeya xana?

Amosi 7:9

“Switsunga leswo hlawuleka swa rixaka ra Isaka swi ta hundzuka marhumbi, ni swivandla swa vukhongeri swa vanhu va Israele swi ta hiseriwa makumu; ndzi ta pfukela rixaka ra Yerobuwamu hi fumu!”

Nahume 3:11

Na wena Ninivha, u ta pyopyiwa, u ta tifihla, u ta lava vuchavelo byo tumbela valala eka byona.

Esaya 2:21

Vanhu vona va ta nghena emabakweni ya maribye, ni le makocokocweni ya tintshava, va tumbela vukari bya HOSI Xikwembu, ni ku kwetsima ka xona lokukulu, loko xi humelela xi ta chavisa vanhu emisaveni.

Hosiya 8:5

N'wina va le Samariya, rhole ra n'wina ra ndzi nyenyetsa. Vanhu lava va ndzi hlundzukisa ngopfu, xana va ta tshama ku fikela rini va nga tenganga, xana?

Amosi 1:5

Ndzi ta tshova tinyangwa ta Damaska, ndzi lovisa vaaki va Nkova wa Avene ni loyi a fumaka muti wa Beta-Edeni; vaaki va tiko ra Siriya va ta ya evukhumbini etikweni ra Kiri.” HOSI yi vula sweswo.

Amosi 3:14

ndzi ta ba ni tialitari ta Betele. Timhondzo ta alitari yin'wana ni yin'wana ti ta tshoviwa, ti wela hansi.