Hosiya 10:12 - BIBELE Mahungu Lamanene

¹² Tibyaleleni ku lulama hi n'wexe, kutani mi ta tshovela mihandzu ya tintswalo ta n'wina; rimani masimu lawa mi ma tshetsheke, hikuva hi wona nkarhi wa ku lava HOSI Xikwembu leswaku xi ta ta xi ta mi nisela minkateko.

Xitsonga (Bibele)

¹² Mi tibyalela hi ku lulama, mi tshovela hi vunene; mi tirimela vuhalulo lebyintshwa; hikuva i nkarhi wa ku lava Yehovha, a kondza a ta, a mi nisela ku lulama.

Hosiya 10:12 Referans Kwoze

Yakobo 3:18

Kutani mihandzu ya hanyelo leri lulameke yi huma eka mbewu leyi nga byariwa hi ku rhula, hi vanhu lava tirhaka mintirho ya ku rhula.

Esaya 45:8

“N'wina matilo, nisani mberha ya leswo lulama, mapapa a ma swi chululele ehansi. Wena misava, pfuleka leswaku ku ta huma leswi ponisaka, ni leswo lulama swi ta mila eka wena; swilo leswi swi endliwile hi mina HOSI.”

Swivuriso 11:18

Munhu wo homboloka a nga holi swo nyawula, kasi loyi a seketelaka leswo lulama, a nga kanakani hi hakelo ya yena.

Esaya 55:6

Lavani HOSI Xikwembu loko xa ha kumeka, xi vitaneni loko xa ha ri kusuhi.

Hosiya 6:3

A hi tikarhateni, hi tikarhatela ku tirhela HOSI Xikwembu: Xikwembu xi fana ni vurhonga, xi nge tsandzeki ku humelela; xi ta ta eka hina ku fana ni mpfula ya xirimo, ku fana ni ku sewula ka mpfula ya ximun'wana.”

Esaya 44:3

Ndzi ta chululela mati etikweni leri nga ni torha, swinambyana swi ta hobomulana emisaveni leyi omeke; ndzi ta chululela Moya wa mina ehenhla ka vatukulu va n'wina, vana va n'wina, ndzi ta va katekisa.

Eklesiasta 11:6

Haxa mbewu ka ha ra nimixo, ni loko ri rhengile u nga tshami hi mavoko, hikuva a wu tivi leyi nga ta mila. Ku nga mila leyi kumbe liya, kumbe yi mila hinkwayo.

Pisalema 105:4

Lavani HOSI ni matimba ya yona, minkarhi hinkwayo, tsakelani vukona bya yona.

Luka 13:24

“Ringetani hi matimba ku nghena hi nyangwa leyo khuma, hikuva ndza mi byela leswaku lavo tala va ta navela ku nghena, kambe va ta tsandzeka.

Amosi 5:15

Vengani leswo biha, mi rhandza leswinene, mi avanyisa hi ku lulama etihubyeni ta n'wina, kutani kumbexana HOSI, Xikwembu xa matimba hinkwawo, xi ta mi tsetselela n'wina masalela ya Yosefa.

Amosi 5:6

Lavani HOSI leswaku mi ta hanya loko swi nga ri tano, yi ta rhumela ndzilo ehenhla ka n'wina, va ka Yosefa; wu ta herisa ni muti wa Betele, ku nga ri na loyi a nga ta wu tima!

Esaya 31:1

Va ni khombo vanhu lava yaka va ya kombela ku pfuniwa le Egipta! Va tshemba tihanci ni makalichi layo tala ya Vaegipta, va tshemba ni vagadi va tihanci, va ku va ni matimba swinene, kambe HOSI Xikwembu, xona Muhlawuleki wa Israele, a va na mhaka na xona, a va xi vikeli makungu ya vona.

Amosi 5:4

HOSI yi vurisa sweswo eka Vaisraele yi ri: “Lavani mina, mi ta hanya;

Hosiya 12:6

Hi sweswo ke na n'wina, Xikwembu xa n'wina xi ta mi pfuna ku tlhelela eka xona; tinyiketeleni ku rhandza van'wana ni ku avanyisa hi ku lulama, mi nga karhali ku langutela Xikwembu xa n'wina.

Amosi 5:8

Loyi a vumbeke Xirimela na Mahlahle, a hundzula xinyami xi va ku vonakala ka mixo, a tlhela a hundzula nhlekanhi wu va vusiku, loyi a vitanaka mati ya lwandle a ma humesa, a cheleta misava ha wona, vito ra yena i HOSI.

Hosiya 8:7

Lava byalaka xihuhuri, va ta tshovela xidzedze. Mavele lama nga rhumbukiki, ma nge vi na ntshovelo; hambiloko ntshovelo a wo va kona, a wu ta dyiwa hi vanhu va matiko man'wana.

Timhaka 2:18

Ina, hambi ma ri malandza ya n'wina ya xinuna ni ya xisati, eminkarhini yeleyo, ndzi ta ma chela Moya wa mina, kutani ma ta vula Rito.

Ezekiele 34:26

Ndzi ta va tshamisisa, va kuma ni minkateko loko va rhendzela ntshava ya mina; ndzi ta va katekisa hi ku va nisela mpfula hi tinguva ta yona.

Esaya 32:20

Mi katekile, hikuva mi ta rima mitanga eribuweni ra nambu wun'wana ni wun'wana; tihomu ta n'wina ni timbhongolo ta n'wina, mi to ti lathela kunene.

Esaya 30:23

HOSI Xikwembu xi ta nisa mpfula, leswaku yi cheleta timbewu leti mi ti byaleke emasin'wini; leswi mi nga ta tshovela swona emasin'wini, swi ta nandziha swi tlhela swi xurhisa. Eminkarhini yoleyo, swifuwo swa n'wina swi ta kuma madyelo lamakulu.

Yeremiya 50:4

HOSI Xikwembu xi ri: “Loko nkarhi wolowo wu ta va wu fikile, Vaisraele ni va ka Yuda va ta hlengeletana, va suka eBabilona va ri karhi va rila, va lava mina HOSI Xikwembu xa vona.

Esaya 5:6

Ndzi ta yi tshika yi tlhumelana, ndzi nga yi hlakuli, ni vhinya ndzi nga yi tsheni, ku ta mila mitwa ni swigatlu ntsena; ndzi ta lerisa mapapa leswaku ma nga ha nisi mpfula ensin'wini leyi!”

Swivuriso 18:21

Rifu ni vutomi, swi lawula hi ku vulavula ka munhu, lava rhandzaka ku vulavula, va ta tshovela mihandzu ya kona.

Pisalema 72:6

Mufumi wa tiko a a fane ni mpfula leyi nelaka swimila; a a fane ni swimpfulana leswi tsutsuxaka kunene.

2 Vakorinto 9:10

Loyi a nyikaka mbewu eka mubyari, ni vuswa byo dya, ú ta mi lavela mbewu a tlhela a yi mirisa; ú ta mi andzisela ntshovelo wa ku hanana ka n'wina;

Esaya 48:18

Loko a mi lo yingisa milawu ya mina, ingi mi kumile ku rhula loku fanaka ni mati lama khulukaka, ku lulama ka n'wina a ku ta ndlandlamuka kukota magandlati elwandle.

Hosiya 14:1

N'wina vanhu va tiko ra Israele, tlhelelani eka HOSI, Xikwembu xa n'wina, hikuva milandzu ya n'wina yi mi khugurile mi wa.

Esaya 54:14

U ta tiya hi ku endla leswo lulama, u nga ka u nga ha chavi nchumu, hikuva lava va ku xanisaka va ku hlasela, a va nga ha tshineli kusuhi na wena.