Genesa 14:7 - BIBELE Mahungu Lamanene

⁷ Kutani va hundzuluka va ya fika le Eni-Mixipati (hileswaku Kadexe), va hlasela tiko hinkwaro ra Vaamaleke, ni ra Vaamori lava a va tshama eHasasoni-Tamara.

Xitsonga (Bibele)

⁷ Kutani va tlhela va ta exihlobyeni xa Eni-Mixipati, a nga Kadexe, va hlula tiko hinkwaro ra Vaamaleke, na vona Vaamori lava akeke eHasasoni-Tamara.

Genesa 14:7 Referans Kwoze

2 TIKRONIKA 20:2

Kutani vanhu van'wana va ya eka yena va fika va ku: “Masocha lama humaka etikweni ra Edomu le ntsungeni wa Lwandle-ra-ku-fa, ma le ndleleni, ma tela ku ta ku hlasela; sweswi hi vulavulaka, va le Hasasoni-Tamara!” A va vula le Eni-Gedi.

Genesa 20:1

Ku suka kwalaho, Abrahama a famba a kongoma ematlhelweni ya le dzongeni, a ya fika a luvela emutini wa Gerara, exikarhi ka Kadexe na Xuru, a tshama kona.

Genesa 16:14

Hikokwalaho, xihlovo lexi xi thyiwile vito ra Berilahayi-Royi (hileswaku “Xihlovo-xa-loyi-a-vonaka-a-tlhela-a-hanya”). Xihlovo lexi xi le xikarhi ka muti wa Kadexe ni wa Berede.

Yoxuwa 15:62

na Nibixani, na Iri-Melaka (hileswaku Muti-wa-Munyu), na Eni-Gedi: Miti ni swimitana i 6.

Duteronoma 1:46

Hikokwalaho, mi tshamile nkarhi wo leha swinene eKadexe.

Duteronoma 1:19

“Loko hi suka entshaveni ya Horebe, hi tsemakanyile mananga lamakulu layo chavisa hinkwawo lawa mi ma voneke, hi kongoma emagangeni ya Vaamori hilaha HOSI Xikwembu xa hina xi hi leriseke hakona, hi kondza hi ya fika emutini wa Kadexe-Bariniya.

Tinhlayo 24:20

Kutani Balaama a languta etlhelo ra tiko ra Amaleke, a sungula ku tlhokovetsela, a ku: “Vaamaleke a va tlula va matiko man'wana hi matimba, kambe eku heteleleni va ta herisiwa va nyamalala.”

Tinhlayo 20:1

Hi n'hweti yo sungula, ntshungu hinkwawo wa Vaisraele wu fika emananga ya Sini, kutani wu ya tshama eKadexe. Laha hi kona Meriyamu a nga fela kona, a tlhela a lahliwa kona.

Tinhlayo 14:45

Kutani Vaamaleke ni Vakanana, lava a va tshama emagangeni, va rhelela va hlasela Vaisraele, va va hlongorisa ku ya fika eHorma.

Tinhlayo 14:43

Leswi mi fularheleke HOSI Xikwembu, na xona a xi nga vi na n'wina, kutani loko mi ya hlangana ni Vaamaleke ni Vakanana kwale tikweni, va ta mi dlaya hi fumu.”

Tinhlayo 13:26

va tlhelela le Kadexe emananga ya Parani, laha Muxe na Aroni a va ri kona ni ntshungu hinkwawo wa Vaisraele; va vuya ni mahungu, va ma rungulela Muxe na Aroni ni ntshungu hinkwawo, va va komba ni mihandzu ya tiko ra kona.

Genesa 36:16

na Kora, na Gatamu, na Amaleke. Lava hi vona lava a va ri tindhuna ta va ka Elifasi etikweni ra Edomu, va nga vona vatukulu va Ada.

Genesa 36:12

Elifasi n'wana Esawu a a ri ni nsati lontsongo loyi a va ku i Timina, kutani Timina a velekela Elifasi n'wana loyi a va ku i Amaleke. Lava hi vona vatukulu va Ada nkata Esawu.

Ezekiele 47:10

Vaphasi va tinhlampfi va ta yima eribuweni ra Lwandle-ra-ku-fa, ku sukela le Eni-Gedi ku ya fika le Eni-Gilayimi, va ta anekela kona tinkoka ta vona. Elwandle leri ku ta va ni tinhlampfi ta tinxaka-xaka leti fanaka ni ta Lwandle ra Mediteraniya.

Ezekiele 48:28

Ndzilekana wa muganga wa Gadi hi tlhelo ra le dzongeni, wu ta endla ni ndzilekana wa tiko hi tlhelo rolero; ndzilekana wa kona wu ta sukela eTamari hi tlhelo ra le vuxeni, wu kongoma eswihlobyeni swa Meriba-Kadexe, kutani wu ta jika wu lulama ni xinambyana xa Egipta, wu ya fika eLwandle ra Mediteraniya.