Genesa 1:26 - BIBELE Mahungu Lamanene

²⁶ Kutani Xikwembu xi ku: “A hi endleni munhu hi xifaniso xa hina, a fana na hina, a ta fuma tinhlampfi ni tinyanyana, a fuma ni swifuwo ni misava, ni swiharhi hinkwaswo emisaveni, ni swikokovi hinkwaswo.”

Xitsonga (Bibele)

²⁶ Kutani Xikwembu xi ku: “A hi endleni munhu hi xifaniso xa hina a ta fana na hina; a ta fuma tinhlampfi ta lwandle, ni tinyanyana ta tilo, ni swifuwo, ni misava hinkwayo, ni swikokovi hinkwaswo leswi kokovaka emisaveni.”

Genesa 1:26 Referans Kwoze

Vakolosa 3:10

hikuva mi ambarile munhu wa hanyelo lerintshwa loyi a pfuxetiwaka kambe na kambe, leswaku mi kota ku tiva swinene Xikwembu lexi xi n'wi tumbuluxeke hi xifaniso xa xona.

Vaefesa 4:24

Ambalani munhu lontshwa la vumbiweke hi xifaniso xa Xikwembu, la tikombaka hi ku lulama ka yena ni ku hlawuleka loku nga ni ntiyiso.

Genesa 3:22

Kutani HOSI Xikwembu xi ku: “Vonani, sweswi munhu ú fana na hina, ú tiva swo biha ni leswo saseka, kutani a nga tshuka a kha ni mihandzu ya murhi lowu nyikaka vutomi, a dya, kutani a hanya hilaha ku nga heriki.”

Genesa 5:1

Lowu i nongonoko wa va ka Adamu. Loko Xikwembu xi tumbuluxa munhu, xi n'wi endlile a fana na xona.

Pisalema 100:3

Tivani leswaku HOSI i Xikwembu, hi xona xi hi endleke, a hi lo tiendla. Hina hi vanhu va xona, ni tinyimpfu leti xi ti risaka.

2 Vakorinto 3:18

Hina hinkwerhu lava kombaka ku vangama ka Hosi ku fana ni xivoni, hi mimombo leyi fununguriweke, hi hundzukile lava fanaka na yena, hi ku vangama loku ngangamukaka ku ya emahlweni. Hosi yi endlile sweswo, yona yi nga Moya.

Esaya 64:8

“Hambiswiritano, we HOSI, u tata wa hina; hina hi vumba, muvumbi hi wena, hinkwerhu hi endliwile hi wena.

Vakolosa 1:15

Kriste i xifaniso xa Xikwembu lexi nga voniwiki, mativula ya hinkwaswo leswi tumbuluxiweke.

Yakobo 3:9

Ha rona hi dzunisa Hosi, loyi a nga Tatana; nakambe ha rona hi rhukana vanhu, lava endliweke hi xifaniso xa Xikwembu.

2 Vakorinto 4:4

xikwembu xa misava leyi xi pfarile miehleketo ya vanhu lava va nga pfumeriki; xi va sive mahlo leswaku va nga voni ku vangama ka Mahungu Lamanene lama twarisaka ku kwetsima ka Kriste, yena loyi a nga xifaniso xa Xikwembu.

1 Vakorinto 11:7

Wanuna a nga fanelanga ku tifunengeta nhloko, hikuva yena i xifaniso xa Xikwembu ni ku dzuneka ka xona, kasi wansati i ku dzuneka ka wanuna.

Genesa 9:6

“Un'wana ni un'wana loyi a halataka ngati ya munhu, ni ya yena ngati yi ta halatiwa hi munhu, hikuva Xikwembu xi endlile munhu hi xifaniso xa xona.

Eklesiasta 7:29

Mhaka leyi ndzi yi kumeke hi leyi: Xikwembu xi endlile vanhu va ri lava lulameke, kambe vona va tilavele tindlela to tala leti hambukeke.

Timhaka 17:26

Hi munhu un'we xi endlile vanhu van'wana hinkwavo leswaku va eneta misava hinkwayo; xi va vekele tinguva leti xi ti hlawuleke khale, xi veka ni mindzilekana ya lomu va fanelaka ku tshama kona.

Yohane 14:23

Yesu a n'wi hlamula, a ku: “Loko munhu a ndzi rhandza, ú ta hlayisa rito ra mina, kutani Tata wa mina ú ta n'wi rhandza, kutani hi ta ta eka yena, hi tshama na yena.

1 Yohane 5:7

Ku ni timbhoni tinharhu:

Yakobo 3:7

Tinxaka hinkwato ta swiharhi ni ta tinyanyana ni ta swikokovi ni ta swa le lwandle, ti nga dyondzisiwa, ti va ti dyondzisiwile hi rixaka ra vanhu.

Esaya 6:8

Kutani ndzi twa N'wini wanga a huwelela a ku: “Ndzi ta rhuma mani, i mani la nga ta va nomo wa hina xana?” Hiloko ndzi ku: “Hi mina loyi, ndzi rhume!”

Pisalema 149:2

N'wina Vaisraele, tsakelani Muvumbi wa n'wina, tlangelani Loyi a mi fumaka n'wina va le Siyoni.

Genesa 11:7

A hi rheleleni, hi ya pfilunganyisa ririmi ra vona, leswaku va ta ka va nga ha twanani loko va vulavula.”

Yeremiya 27:6

Matiko lawa hinkwawo, sweswi ndzi ma nyiketile eka nandza wa mina yena Nebukadnetsara hosi ya Babilona; ndzi n'wi nyikile ni swiharhi hinkwaswo leswaku swi n'wi tirhela.

Ntirho 35:10

Kambe ku hava na un'we la vitanaka Xikwembu a ku: ‘U kwihi wena Muendli wa hina, wena u hi tiyisaka hi tinsimu ni le vusikwini.

Yohane 5:17

Kambe Yesu a va byela, a ku: “Ku fikela sweswi, Tata wa mina a nga si tshika ku tirha, kutani na mina, tanihi yena, ndza tirha.”

Timhaka 17:20

U fikisile timhaka leto hlamarisa etindleveni ta hina; hikokwalaho hi lava ku ti tiva leswaku hi leto yini.”

Ntirho 5:23

Wena ni maribye ya nhova, mi ta twanana, hambi swi ri swiharhi leswo leva, u ta hanyisana na swona hi ku rhula.

Genesa 2:19

Hiloko HOSI Xikwembu xi teka misava xi vumba swiharhi hinkwaswo ni tinyanyana hinkwato, kutani xi swi yisa eka munhu ku vona leswaku munhu ú ta swi thya mavito wahi. Kutani vito leri munhu a ri thyeke xivumbiwa xin'wana ni xin'wana, ri vile rona vito ra xona.

Esaya 45:18

HOSI Xikwembu xi tumbuluxile matilo, hi xona xi nga Xikwembu hakunene! Xi vumbile ni misava, xi yi endla yi ri leyi tiyeke, leyi vanhu va kotaka ku tshama eka yona: A xi yi vumbelanga ku va leyi nga pfuniki nchumu. Kutani xi vurisa sweswo xi ri: “Hi mina HOSI Xikwembu, ku hava un'wana!

Ntirho 39:11

Leswi ti nga ni matimba lamakulu, xana u nga tshemba ku tirheriwa ha tona, loko ntirho wu ku tikela xana?

Risimu ra Tinsimu 1:11

Hi ta ku endlela nketani ya nsuku, hi yi sasekisa hi silivhere.