Estere 3:8 - BIBELE Mahungu Lamanene

⁸ Kavaloko Hamani a byela hosi Ahasuwerusi, a ku: “Wena hosi, ku ni vanhu va rixaka rin'wana lava tlholokeleke exikarhi ka vanhu va wena, eswifundzheni hinkwaswo swa tiko ra wena; mikhuva ya vona yi hambanile ni mikhuva ya vanhu van'wana; hi tlhelo a va hlayisi milawu ya wena hosi, kutani a swi nga ku vuyiseli nchumu ku tama wa ha va hlayisa, we hosi!

Xitsonga (Bibele)

⁸ Hamani a ku eka hosi Ahasuwerusi: “Ku ni vanhu van'wana lava hangalakeke, lava avaneke exikarhi ka vanhu va matiko hinkwawo ya ku fuma ka wena; milawu ya vona yi hambanile ni ya vanhu van'wana; a va yi hi milawu ya hosi; a hi swinene leswaku hosi yi va tshika va rhula.

Estere 3:8 Referans Kwoze

Duteronoma 4:27

HOSI Xikwembu xi ta mi hangalasa ni matiko, kutani exikarhi ka tinxaka hinkwato leti xi nga ta mi yisa eka tona, mi ta va mi nga talanga.

Levhitika 26:33

Ndzi ta mi vangela tinyimpi, ndzi mi hangalasa mi ya tshama exikarhi ka vamatiko. Etikweni ra n'wina ku ta sala ku nga ha ri na munhu, miti ya n'wina yi ta hundzuka marhumbi.

Yakobo 1:1

Mina Yakobo, nandza wa Xikwembu ni wa Hosi Yesu Kriste, ndzi tsalela tinyimba ta 12, va nga vakriste lava hangalakeke hinkwako ematikweni, ndzi ri: Xewani!

Timhaka 28:22

Kutani hi fanele ku twa miehleketo ya wena u yi vula hi nomo wa wena, hikuva loko yi ri dyondzo leyi yo hambuka, ha yi tiva leswaku ya ariwa hinkwako.”

Timhaka 24:5

Hi kumile leswaku munhu loyi ú vanga mpfilumpfilu. Ú pfuxa madzolonga exikarhi ka Vayuda hinkwavo lava akeke kwihi na kwihi emisaveni; hi yena la nga nhloko ya dyondzo yo hambuka ya Vanazarene.

Yohane 7:35

Hiloko Vayuda va vutisana, va ku: “Ú lava ku ya kwihi munhu loyi, lomu hi nga ta tsandzeka ku n'wi kuma kona xana? Xana ú lava ku ya eka Vayuda lava hangalakeke exikarhi ka vamatiko, ni ku dyondzisa vamatiko xana?

Zakariya 7:14

Kutani ndzi va hangalasele etinxakeni hinkwato leti a va nga ti tivi, kutani tiko leri ro saseka, leri va ri sukeleke, ri sala ri ri rhumbi, ku pfumaleka na munhu loyi a nga famba-fambaka eka rona.”

Ezekiele 11:16

Hikokwalaho byela Vaisraele leswaku hakunene hi mina HOSI N'wini wa vona loyi a va hangalaseke, ni ku va yisa kule ematikweni ya vanhu vambe; hambiswiritano malembenyana lawa a ndzi tshikanga ku va Tempele ya vona mina n'wini.

Ezekiele 6:8

“Hambiswiritano, ndzi ta tshika van'wana va n'wina va hanya; va ta pona ku dlawa, va hangalasiwa va ya ematikweni mambe,

Yeremiya 50:17

HOSI Xikwembu xi ri: “Vaisraele va fana ni swinyimpfana leswi hlotiwaka ni ku hangalasiwa hi tinghala. Ku rhange hosi ya Asiriya yi va dlaya yi dya nyama ya vona, Nebukadnetsara hosi ya Babilona yena a sala a phorha marhambu.

Nehemiya 1:8

Tsundzuka marito lawa u ma leriseke nandza wa wena Muxe, u ku: ‘Loko mo ka mi nga tshembeki, ndzi ta mi hangalasa mi ya tshama exikarhi ka vamatiko,

Duteronoma 32:26

“ ‘A ndzi ri ni makungu ya ku va herisa, ku nga sali na un'we loyi vanhu va nga ta va tsundzuka ha yena;

Duteronoma 30:3

hi kona HOSI Xikwembu xa n'wina xi nga ta tilhela xi mi katekisa, xi mi twela vusiwana, xi mi vuyisa ematikweni lawa a xi mi hangalasele eka wona.

1 Petro 1:1

Mina Petro, muapostola wa Yesu Kriste, ndzi tsalela lava rhurhisiweke ni ku hangalasiwa ematikweni ya Ponto, na Galatiya, na Kapadokiya, na Asiya, na Bitiniya,

Estere 3:9

Loko u nkhensa wena hosi, a ku hume nawu wa leswaku vanhu lava va herisiwa; mina ndzi tshembisa ku tisa silivhere leyi tikaka tithani ta 410 emavokweni ya lava tirhelaka mfumo, va ta yi nghenisa evuhlayiselweni bya xuma xa wena, we hosi.”

Estere 4:1

Loko Mordekayi a twa hinkwaswo leswi endliweke, a handzulela swiambalo swa yena, a ambala swiambalo swo khwaxa, a ticheletela nkuma, a famba exikarhi ka muti a ri karhi a ba huwa a rila hi xiviti,

Yeremiya 33:24

“U swi twile leswaku ku ni vanhu lava va ndzi sandzaka va ku: ‘HOSI Xikwembu xi tshikile va ka Yuda ni va ka Levhi, va nga vanhu lava a xi va hlawurile!’ Vasandzi lava va hlekula vanhu va mina, va va langutela hansi.

Daniele 3:8

Enkarhini wolowo, ku humelela Vakalediya van'wana, va fika eka hosi Nebukadnetsara va mangalela Vayuda,

Daniele 6:13

Kutani va hlambanya emahlweni ka hosi, va ku: “Un'wana wa vabohiwa lava humaka etikweni ra Yuda, loyi va nge i Daniele, a nga ku yingisi we hosi, hambi nawu lowu u wu fungheke, yena a nga na mhaka na wona; ú ya emahlweni a khongela Xikwembu xa yena kanharhu hi siku!”

Tinhlayo 23:9

Vanhu lava, ndzi va vona ndzi ri laha nhlohlorhini ya ntshava, ndzi va languta ndzi ri eswintshabyaneni: I vanhu va rixaka leri titshamelaka ri ri roxe, leri tihambanyiseke ni tinxaka tin'wana.

Ezra 4:6

Kuteloko Ahasuwerusi a ha ku sungula ku fuma, valala va va ka Yuda ni va le Yerusalema, va tsala papila va va hehla.

Daniele 6:14

Loko hosi yi twa mhaka leyi, yi vaviseka ngopfu emoyeni, yi lava mano yo ponisa Daniele, dyambu ri kondza ri pela.