Esaya 4:2 - BIBELE Mahungu Lamanene

² Ri ta ta siku leri ximila xa HOSI xi nga ta hluka, xi saseka ni ku dzuneka; Vaisraele lava nga ta va va ponile, va ta tinyungubyisa, va tidzunisa hi leswi swi mileke etikweni.

Xitsonga (Bibele)

² Hi siku rero hluke ra Yehovha ri ta endla xibombiso ni ku kwetsima ka lava poneke Vaisraele, kutani mihandzu ya misava yi ta vangamisa ni ku bombisa vona.

Esaya 4:2 Referans Kwoze

Zakariya 6:12

Kutani n'wi byele leswaku mina HOSI ya matimba hinkwawo ndzi ri: “Ku ni munhu loyi va nge i Hluke, ú ta kula kwala a nga kona, kutani ú ta aka Tempele ya mina.

Yeremiya 23:5

“Mina HOSI ndzi ri, yingisani! Nkarhi wa ta, lowu ndzi nga ta mirisela Davhida ehluke lerinene. Hluke ra kona i hosi leyi nga ta fuma hi ku twisisa, yi avanyisa timhaka hi ku lulama ni ku tshembeka.

Zakariya 3:8

HOSI Xikwembu xi ri: “We Yoxuwa muprista lonkulu, yingisa! Yingisani na n'wina vaprista-kulobye lava mi tshameke na yena: Hakunene, mi vanhu lava hlolaka leswinene; vonani, ndzi ta mi rhumela nandza wa mina loyi va nge i Hluke.

Esaya 27:6

Eminkarhini leyi taka, va ka Yakobo va ta va ni timitsu, Vaisraele va ta hluka, va phaka marhavi; misava hinkwayo yi ta tala hi mihandzu ya vona.

Yuwele 2:32

Enkarhini wolowo, un'wana ni un'wana la nga ta huwelela eka mina, ú ta ponisiwa. Entshaveni ya Siyoni ni le mutini wa Yerusalema, va kona lava nga ta pona, hilaha ndzi vuleke hakona mina HOSI. Kutani eka lava nga ta sala, ndzi ta hlawula van'wana.”

Yeremiya 33:15

Emasikwini walawo ni le minkarhini ya kona, ndzi ta mirisela Davhida ehluke lerinene, yi nga hosi leyi nga ta fuma tiko hi ku lulama ni ku tshembeka.

2 Vakorinto 4:6

Hikuva xona Xikwembu lexi nga te: “Ku vonakala a ku vangame emunyameni!” hi xona lexi nga vangamisa ku vonakala etimbilwini ta hina, hi ta tiva ku kwetsima ka xona loku vangamaka enghoheni ya Kriste.

Obadiya 1:17

“Entshaveni ya Siyoni, van'wana va ta pona; ntshava leyi yi ta va yi hlawulekile. Va ka Yakobo va ta tlhela va kuma leswi nga swa vona.

Yeremiya 44:14

Exikarhi ka masalela ya va ka Yuda lava teke ku ta tshama etikweni ra Egipta, a ku nga poni na un'we! Ku hava loyi a nga ta tlhelela etikweni ra Yuda a ya tshama eka rona, hambileswi va swi navelaka ngopfu. A va nga tlheleri eka rona, ku ta tlhelela ntsena vanhu va nga ri vangani.”

Esaya 60:21

Vanhu va wena va ta va lava lulameke hinkwavo, tiko ri ta va ra vona hilaha ku nga heriki. Va ta va hluke ra ximilana xa mina, wu nga ntirho wa mavoko ya mina lowu ndzi nga ta dzunisiwa ha wona.

Esaya 53:2

Nandza wa HOSI Xikwembu ú kurile emahlweni ka xona tanihi ximilana, a kota rimitsu ra murhi wa le misaveni leyi omeke; xivumbeko xa yena a xi nga hi tsakisi, a xi nga hi koki mahlo, naswona a hi nga n'wi naveli, hikuva a a nga sasekanga.

Pisalema 72:16

A ku ve ni mavele layo tala etikweni, a ma kule ma bela hi moya emagangeni; ntshovelo wa kona a wu fane ni wa le Lebanoni, naswona a ku ve ni ndzalo emitini ku fana ni byanyi enhoveni.

2 Petro 1:16

A hi landzanga mintsheketo yo endliwa hi vutlhari, loko hi mi tivisile ta ku humelela hi matimba ka Hosi ya hina Yesu Kriste; hina hi timbhoni ta vukulukumba bya yena, lebyi hi nga byi vona hi mahlo.

Yohane 1:14

Rito ri hundzukile munhu la nga aka exikarhi ka hina; kutani hi hlalele ku kwetsima ka yena loku nga tala tintswalo ni ntiyiso, ku nga ku kwetsima loku fanelaka n'wana loyi a nga yexe eka tata wa yena.

Luka 21:36

Hitekani ke, mi khongela minkarhi hinkwayo, leswaku mi kuma matimba ya ku pona eka swilo hinkwaswo leswi swi nga ta humelela, ni ku yima mi tiyile emahlweni ka N'wana-wa-Munhu.”

Matewu 24:22

Loko masiku walawo a ma nga hungutiwanga, a ku nga ta pona munhu, kambe hikwalaho ka vahlawuriwa va Xikwembu, masiku ya kona ma ta hungutiwa.

Zakariya 9:17

Hakunene tiko ri ta saseka, ri tsakisa! Majaha ni vanhwana va ta kula va tsakile, hikuva va ta phameriwa swakudya ni swakunwa leswinene.

Yuwele 3:18

“Hi siku ra kona, tintshava ti ta pfempfa vhinyo yo nandziha; ntswamba wu ta khuluka eswintshabyanini, swinkobyana hinkwaswo swa tiko ra Yuda swi ta hobomulana. Endlwini ya mina HOSI, ku ta baleka nthavela, mati ma ta huma ma ya cheleta Nkova-wa-Xitimi.

Ezekiele 7:16

Lava poneke ku fa, va ta tsutsuma va ya etintshaveni, va ri karhi va rila hinkwavo kukota matuva ya le minkoveni, hinkwavo va tisola hi leswi va dyoheke.

Yeremiya 44:28

Hambiswiritano, exikarhi ka va ka Yuda lava tshamaka etikweni ra Egipta, ku ta pona ntsena va nga ri vangani, va nga dlayiwi hi matlhari; va ta tlhelela etikweni ra vona, kutani masalela ya va ka Yuda lava a va yile va ya tshama etikweni ra Egipta, va ta tiva leswaku i marito ya mani lama tiyeke: Ya mina kumbe ya vona.

Esaya 45:8

“N'wina matilo, nisani mberha ya leswo lulama, mapapa a ma swi chululele ehansi. Wena misava, pfuleka leswaku ku ta huma leswi ponisaka, ni leswo lulama swi ta mila eka wena; swilo leswi swi endliwile hi mina HOSI.”

Esaya 30:23

HOSI Xikwembu xi ta nisa mpfula, leswaku yi cheleta timbewu leti mi ti byaleke emasin'wini; leswi mi nga ta tshovela swona emasin'wini, swi ta nandziha swi tlhela swi xurhisa. Eminkarhini yoleyo, swifuwo swa n'wina swi ta kuma madyelo lamakulu.

Esaya 11:4

ú ta avanyisa timhaka ta swisiwana hi ku lulama, ni ta swikamba, ú ta ti tsema hi ndlela leyinene; nomo wa yena wu ta va nhonga yo ba vanhu va misava, loko a hefemula, lavo homboloka va ta fa.

Pisalema 67:6

Misava yi hi humesele mihandzu, Xikwembu, xona Xikwembu xa hina, xi hi katekisile.

Eksoda 28:2

Kutani u ta endlela makwenu Aroni swiambalo leswo hlawuleka, leswaku swi ta n'wi nyika ndzhuti ni ku languteka.

Esaya 26:1

Enkarhini wolowo, va le Yuda va ta yimbelela risimu leri nge: “Hi ni muti lowu tiyeke swinene, rirhangu ra wona ni makhokholo ya wona i HOSI Xikwembu, hikuva hi xona xi hi ponisaka.

Esaya 60:15

“Hambileswi a wu tshikiwile, u tlhela u nyenyiwa, ku pfumala na un'we la hundzaka hi le ka wena, sweswi ndzi ta ku nyika ku dzuneka loku nga heriki; u ta tsakisa vanhu va minkarhi hinkwayo.

Esaya 61:11

HOSI N'wini wa hinkwaswo ú ta endla leswaku ku lulama ni ku dzuneka swi humelela emahlweni ka vanhu va matiko hinkwawo, tani hileswi misava yi mirisaka swimila, ni mintanga yi hlukisaka leswi byariweke eka yona.

Ezekiele 34:29

Ndzi ta va nyika masimu lama tivekaka hi ku saseka ka wona, kutani a ku nga ha vi ni ndlala etikweni ra vona, naswona a va nga ha hlekuriwi hi vanhu va matiko man'wana.

Ezekiele 36:8

“Yingisani n'wina tintshava ta Israele: Mirhi ya n'wina yi ta phaka marhavi, yi tswala mihandzu leyi nga ta dyiwa hi Vaisraele vanhu va mina, hikuva va ta vuya ku nga ri khale.

Malakiya 3:17

Kutani HOSI ya matimba hinkwawo yi ku: “Vanhu lava va ta va va mina; va ta va ndzhaka ya mina leyo hlawuleka siku ndzi nga ta avanyisa misava. Ndzi ta va tsetselela ku fana ni mutswari, loko a tsetselela n'wana wa yena loyi a n'wi tirhelaka.