Esaya 38:3 - BIBELE Mahungu Lamanene

³ a ku: “We HOSI, ndza ku khongela, tsundzuka hilaha ndzi hanyeke hakona emahlweni ka wena, hi ku tshembeka ni mbilu yo basa, ndzi ri karhi ndzi endla leswi lulameke emahlweni ka wena.” Kutani Hezekiya a rila swinene.

Xitsonga (Bibele)

³ “Oho Yehovha! U nga anakanya leswaku ndzi hanyile emahlweni ka wena hi ku lulama, ni mbilu leyi tengeke, ndzi endlile leswinene emahlweni ka wena.” Kutani Hezekiya a rila ngopfu.

Esaya 38:3 Referans Kwoze

Vaheveru 6:10

Hikuva Xikwembu a xi na mona, xi nga ka xi nga rivali ntirho wa n'wina ni rirhandzu leri mi ri kombeke hi vito ra xona, hi ku tirhela vahlawuriwa va xona, hilaha mi swi endlaka hakona nisweswi.

Vaheveru 5:7

Emasikwini ya yena ya ku hanya la misaveni, Yesu ú khongerile ni ku kombela hi ku titsongahata, a huwelela hi matimba ni ku rila hi mihloti, eka Xikwembu lexi a xi ri ni matimba ya ku n'wi ponisa eku feni, kutani ú yingisiwile hikwalaho ka xichavo xa yena.

Nehemiya 13:14

We Xikwembu, u nga ndzi rivali; tsundzuka swilo leswinene leswi ndzi swi endleleke yindlu ya wena ni ntirho hinkwawo wa wena.

2 Vakorinto 1:12

Ku tidzunisa ka hina hi loku: Ripfalo ra hina ri hi byela leswaku hi hanyile exikarhi ka vanhu hi ku lulama ni ku tenga loku humaka eka Xikwembu, ngopfu-ngopfu loko hi tirhisana na n'wina. Hi hanyile ku nga ri hi vutlhari bya misava leyi, kambe hi tintswalo ta Xikwembu.

Yohane 1:47

Yesu a vona Nataniele a ri karhi a ta a n'wi kongomile, kutani a vulavula hi yena, a ku: “Vonani Muisraele wa xiviri, loyi ku nga riki na ku kanganyisa eka yena.”

Nehemiya 13:22

Hiloko ndzi lerisa Valevhi leswaku va tibasisa, va ta va ta rindza tinyangwa, leswaku siku ra Savata ri va leri hlawulekeke. We Xikwembu xanga, ndzi tsundzuke, u ndzi katekisa hikwalaho ka leswi; ndzi hlayise hi rirhandzu ra wena lero tshembeka!

Nehemiya 5:19

We Xikwembu xanga, ndzi tsundzuke, u ndzi katekisa hikwalaho ka hinkwaswo leswi ndzi swi endlelaka vanhu lava.

Duteronoma 6:18

mi endla leswi lulameke, leswi nkhensekaka eka HOSI Xikwembu, leswaku mi ta kateka, mi kota ku nghena etikweni lerinene leri HOSI Xikwembu xi ri tshembiseke vatata wa n'wina, mi ri teka ri va ra n'wina,

Pisalema 6:8

N'wina hinkwenu mi endlaka leswo biha, ndzi sukeleni, hikuva HOSI Xikwembu xi twile ku rila ka mina.

1 TIKRONIKA 29:19

We HOSI, ndzi kombela leswaku u nyika Solomoni n'wana wa mina matimba ya ku hlayisa swileriso swa wena, ni switsundzuxo swa wena, ni milawu ya wena, leswaku a ta aka Tempele hi nhundzu leyi ndzi yi hlengeleteke.”

Hosiya 12:4

Ú pfinyanile ni ntsumi a yi hlula, a rila a kombela ku katekisiwa. Ú hlanganile ni Xikwembu eBetele, kutani Xikwembu xi vulavula na yena kona.

Pisalema 119:80

Ndzi navela ku landza milawu ya wena, ndzi nga yi tshiki, kutani a ndzi nga khomiwi hi tingana.

Pisalema 102:9

Ndzi funya ritshuri ematshan'wini ya ku dya vuswa, swakunwa swa mina swi pfangene ni mihloti,

Pisalema 32:2

Munhu loyi HOSI Xikwembu xi nga n'wi voniki nandzu, loyi mbilu ya yena yi nga riki na vukanganyisi, ú katekile ngopfu!

Pisalema 101:2

ndzi navela ku famba hi ndlela leyi nkhensekaka. Xana u ta ndzi endzela rini xana? Emutini wa mina, ndzi ta rhandza ku hanya hi mbilu leyi tengeke,

Pisalema 26:3

Ndzi tshama ndzi ri karhi ndzi anakanya rirhandzu ra wena, ndzi rhangeriwa emahlweni hi ku tshembeka ka wena.

Pisalema 16:8

Minkarhi hinkwayo, ndzi rhangisa HOSI emahlweni ka mina; ndzi nga ka ndzi nga tsekatseki, hikuva yi le vokweni ra mina ra xinene.

Nehemiya 13:31

Ndzi lulamisa ni leswaku tihunyi to hisa ha tona magandzelo ti hamba ti tisiwa hi nkarhi lowu vekiweke, ni leswaku ku tisiwa leswi vanhu va rhangaka va swi tshovela emasin'wini. We Xikwembu xanga ndzi tsundzuke, u ndzi katekisa!

Nehemiya 1:4

Kuteloko ndzi twa marito lawa, ndzi tshama hansi ndzi rila. Ndzi hetile masiku yo tala ndza ha rila, ndzi titsona ni swakudya, ndzi khongela Xikwembu xa matilo,

Ezra 10:1

Loko Ezra a ri karhi a khongela kusuhi ni yindlu ya Xikwembu, a kombela leswaku xi va rivalela xidyoho lexi, a rila a titlatlatela ehansi, kutani Vaisraele lavo tala va ya va fika va n'wi rhendzela, va ri vavanuna, ni vavasati, ni vana, va ri karhi va rila hi xiviti lexikulu.

2 TIKRONIKA 25:2

Amasiya ú endlile leswo lulama emahlweni ka HOSI Xikwembu, hambiloko a a nga swi endli hi mbilu hinkwayo.

2 TIKRONIKA 16:9

HOSI Xikwembu a xi tshiki ku hoxa tihlo hala ni ala emisaveni, xi hatla xi ya tiyisa vanhu lava va xi tshembaka. Kambe leswi wena u swi endleke, i vuphukuphuku ntsena! Hikokwalaho, ku sukela sweswi, u ta tshamela ku hlaselana ni vaakelani va wena.”

1 TIKRONIKA 29:9

Kavaloko Vaisraele va tsaka ku vona tinyiko leti vanhu va ti humeseke hi ku titwa, hikuva varhangeri a va humesile hi timbilu ta vona hinkwato, va humesela HOSI Xikwembu va tsakile. Na yena hosi Davhida a tsakisiwa swinene hi manyikele lawa.

1 TIHOSI 2:4

Naswona, HOSI yi ta hetisa leswi yi ndzi tshembiseke swona loko yi te: ‘A wu nga pfumali ntukulu wa yindlu ya wena la nga ta teka vuhosi bya Israele, ni siku ni rin'we, loko vatukulu va wena va tikhoma emahanyelweni ya vona, ni loko va hanyela ntiyiso emahlweni ka mina, hi timbilu ta vona hinkwato ni mimoya ya vona hinkwayo.’

Genesa 17:1

Loko Abrama a ri ni malembe ya 99, HOSI Xikwembu xi humelela eka yena, xi ku: “Hi mina Xikwembu-xa-matimba-hinkwawo; u fanele ku hanya emahlweni ka mina, u ndzi yingisa hi ku hetiseka.

Genesa 6:9

Leti i timhaka ta va ka Nowa. Nowa a a ri munhu wo lulama, loyi a a tsakisa Xikwembu ku tlula vanhu hinkwavo lava a va ri kona emisaveni; naswona a a ri ni xinakulobye ni Xikwembu.

1 TIHOSI 15:14

Hambileswi a nga kotangiki ku herisa magandzelo hinkwawo ya le switsungeni leswo hlawuleka, Asa ú tikombile a ri munhu wo tshembeka eka HOSI Xikwembu, evutomini bya yena hinkwabyo.

1 TIKRONIKA 28:9

“Na wena Solomoni n'wananga, amukela Xikwembu xa vatata wa wena, u xi tirhela hi mbilu ya wena hinkwayo, ni moya lowunene, hikuva HOSI Xikwembu xi kambela timbilu hinkwato, xi hatla xi vona makungu ni miehleketo ya munhu. Xi ta tsakela ku kumiwa hi wena loko u xi lava, kambe loko u xi fularhela, xi ta ku cukumetela makumu.

Pisalema 6:6

Ndzi hela ntamu hi ku rila, mihloti ya mina yi khuluka vusiku hinkwabyo, yi tsakamisa sangu ni minkumba.

Esaya 38:2

Hiloko Hezekiya a hundzulukela ekhumbini, a khongela HOSI Xikwembu,

Esaya 38:4

Kutani HOSI Xikwembu xi lerisa Esaya, xi ku:

2 TIHOSI 18:3

A endla leswi lulameke emahlweni ka HOSI Xikwembu, emintirhweni ya yena hinkwayo a fana ni kokwa wa yena Davhida.