Esaya 1:13 - BIBELE Mahungu Lamanene

¹³ Mi nga ha tisi tinyiko ta n'wina to ka ti nga pfuni nchumu, ni mirhi ya n'wina ra risuna ya ndzi nyenyetsa; minkhuvo ya n'wina ya ku tshama ka n'weti ni ya Savata ni ku rhambana ka n'wina, ndzi nga ka ndzi nga swi tiyiseli, hikuva mi hlanganisa vubihi ni tinhlengeletano to hlawuleka.

Xitsonga (Bibele)

¹³ Tshikani ku ndzi nehela mihlengo ya vunwa ndzi venga murhi lowu nun'hwelaka ni swimusi, ni Tisavata, ni tinhlengeletano; swa ndzi tsandza ku vona ku dlaya ku pfangene ni nkhuvo.

Esaya 1:13 Referans Kwoze

Esaya 66:3

“Munhu loyi a ndzi humeselaka magandzelo hi homu, wa ha ri yena loyi a gandzelaka swikwembu swin'wana hi ku dlaya munhu; loyi a ndzi tlhavelaka nyimpfu, wa ha ri yena loyi a tlhavelaka swikwembu swin'wana embyana; loyi a ndzi humeselaka magandzelo hi swa le masin'wini, wa ha ri yena loyi a humeselaka swikwembu swin'wana ngati ya nguluve; loyi a ndzi hiselaka mirhi ya risuna, wa ha ri yena loyi a dzunisaka swikwembu swa swifaniso. Vanhu lava va endla hi ku rhandza, va tsakela swilo swa vona swa manyala.

Malakiya 1:10

Loko ingi ku nga va na un'wana exikarhi ka n'wina loyi a pfalaka timbanti ta Tempele, leswaku mi nga ha ti mi ta tshivela mindzilo mahala alitarini ya mina! A ndzi tsakeli ku mi vona, hambi ma ri magandzelo lawa mi ndzi humeselaka wona, a ndzi nga ma amukeli. Ndzi vurisa sweswo, mina HOSI ya matimba hinkwawo.

Matewu 15:9

Va tikarhata ntsena hi ku ndzi nkhinsamela, tidyondzo leti va ti dyondzisaka i milawu ya vanhu ntsena.’ ”

Ezekiele 20:39

“Mina HOSI N'wini wa hinkwaswo ndzi ri, fambani n'wina hinkwenu Vaisraele, mi ya tirhela swikwembu swa n'wina swa hava namuntlha ni mundzuku, loko mi nga lavi ku ndzi yingisa; kambe mina a ndzi nga ha pfumeli leswaku mi nyamisa vito ra mina hi magandzelo ya swikwembu swa n'wina swa hava.

Luka 11:42

“Mi ni khombo n'wina Vafarisi, hikuva mi humesa vukhume bya ximbowa-mbowani, ni bya mbowa, ni bya matsavu hinkwawo, kasi a mi na mhaka ni ku lulama na rirhandzu ra Xikwembu! A mi fanerile ku endla swilo leswi, loko mi ri karhi mi endla ni leswiya swin'wana.

Yuwele 2:15

Banani mhalamhala eSiyoni; tilulamiseleni siku ra ku titsona swakudya, mi vitana nhlengeletano leyo hlawuleka.

Swirilo 2:6

Ú hahlurile Tempele ya yena, onge i dladla ra le ntangeni; ndhawu leyi a a gandzeleriwa eka yona, ú yi siyile yi fana ni rhumbi; HOSI Xikwembu xi endlile leswaku va le Siyoni va rivala minkhuvo ya xona ni masiku ya Savata; eku hlundzukeni ka xona lokukulu, xi dlidlimbetile tihosi ni vaprista.

Vaefesa 4:30

Mi nga khomisi Moya lowo Kwetsima wa Xikwembu tingana, hikuva i mfungho wa Xikwembu wo komba leswaku mi vanhu va xona, ni leswaku siku ra ta, leri xi nga ta mi kutsula ha rona.

1 Vakorinto 11:17

Loko ndzi ri karhi ndzi mi nyika swileriso leswi, ku ni leswi swi ndzi vilerisaka: Hileswaku tinhlengeletano ta n'wina ta onha ku tlula ku lulamisa.

Yuwele 1:14

Tilulamiseleni siku ra ku titsona swakudya, mi vitana nhlengeletano leyo hlawuleka. Vitanani vakulukumba, ni vaaki hinkwavo va tiko, va ta endlwini ya HOSI Xikwembu xa n'wina, kutani mi huwelela eka xona.

Swivuriso 21:27

Magandzelo ya munhu wo homboloka, HOSI Xikwembu xa ma venga, ngopfu-ngopfu loko a ma humesa a ri ni xikongomelo xo biha.

Pisalema 78:40

Loko va ri emananga, Vaisraele va tiarisile ko tala eka Xikwembu, va xi vavisa mbilu ematikweni lawa ya ku oma.

1 TIKRONIKA 23:31

Va pfuna vaprista loko ku humeseriwa HOSI Xikwembu emagandzelo lama hisiwaka hi masiku ya Savata, ni ya ku tshama ka n'weti, ni ya minkhuvo yin'wana leyo hlawuleka, va endla hi ku landzelela milawu leyi fanelaka ku hlayisiwa minkarhi hinkwayo emahlweni ka HOSI Xikwembu.

Eksoda 12:16

Hi siku ro sungula, mi fanele ku hlengeletana mi gandzela HOSI Xikwembu, ni le ka siku ra vu-7 a swi ve tano. Hi masiku lawa, mi nga tshuki mi endla ntirho ni wun'we; ntsena un'wana ni un'wana a nga tiswekela swakudya leswi a nga ta dya swona.

Vafilipiya 1:15

Van'wana kunene va twarisa Kriste hi moya wa mavondzo ni vuntswaka; kambe van'wana va swi endla hi timbilu leti baseke;

Tinhlayo 10:2

“Endla timhalamhala timbirhi hi silivhere leyi furiweke, leti nga ta tirhisiwa ku vitana nhlengeletano, ni ku tivisa loko mixaxa yi fanele ku suka.

Esaya 66:23

N'hweti yin'wana ni yin'wana, vanhu hinkwavo va ta ndzi khongela loko n'weti wu tshama, naswona va ta ndzi khongela siku rin'wana ni rin'wana ra Savata. Ndzi vula sweswo mina HOSI.

Hosiya 2:11

Ku tiphina ka yena hinkwako ndzi ta ku herisa, ndzi herisa ni minkhuvo ya yena hinkwayo: Ya ku tshama ka n'weti, ni ya Savata, ni yin'wana ya vukhongeri.

Levhitika 26:31

lero ndzi ta mbundzumuxela miti ya n'wina, ndzi herisa ni swivandla swa n'wina leswo hlawuleka; ni ku nun'hwela ka magandzelo ya n'wina a ku nga ha ndzi tsakisi.

2 TIHOSI 4:23

Nuna a hlamula a ku: “U boha ha yini ku ya eka yena namuntlha xana? A hi siku ra ku tshama ka n'weti namuntlha, naswona a hi ra Savata.” Wansati a hlamula a ku: “A ku na xo karhata!”

Swivuriso 7:14

“A ndzi boheka ku humesa magandzelo, kutani namuntlha ndzi hetisile leswi ndzi tshembiseke swona.