Eksoda 39:32 - BIBELE Mahungu Lamanene

³² Kutani ntirho hinkwawo wa Ntsonga lowo Hlawuleka wa HOSI wu fika emakumu. Vaisraele va endlile hinkwaswo hilaha HOSI Xikwembu xi leriseke Muxe hakona.

Xitsonga (Bibele)

³² Va hetisa sweswo ntirho hinkwawo wa Yindlu leyi nga Tabernakela ya nhlengeletano. Vana va Israele va endla hinkwaswo hilaha Yehovha a nga lerisa Muxe hakona, va endlisa sweswo.

Eksoda 39:32 Referans Kwoze

Eksoda 25:40

Mi fanele ku vona leswaku mi endla swilo leswi hi ku ya hi swivumbeko leswi mi kombiweke swona entshaveni.”

Vaheveru 8:5

va tirha ntirho lowu nga xifaniso ni ndzhuti wa leswi tirhiwaka ematilweni. Swi fana na Muxe: Loko a lavile ku yimisa Ntsonga, ú lerisiwile hi Xikwembu, lexi nga te: “U vona leswaku u endla hinkwaswo hi ku landza leswi u kombiweke swona entshaveni.”

Vaheveru 3:2

Ú tshembekile eka Loyi a n'wi hlawuleke, tanihi Muxe loyi na yena a a tshembekile endlwini hinkwayo ya Xikwembu.

Matewu 28:20

mi va dyondzisa ku hlayisa hinkwaswo leswi ndzi mi leriseke swona; kutani vonani, ndzi na n'wina masiku hinkwawo, ku ko ku hela misava.”

1 TIKRONIKA 28:19

Kutani Davhida a ku: “Mimpimo leyi hinkwayo, leyi nga ta tirhisiwa eku akeni ta Tempele, HOSI Xikwembu xi ndzi tivisile yona, kutani mina ndzi yi hlayisile hi ku yi tsala.”

1 SAMIELE 15:22

Samiele a hlamula a ku: “Xana HOSI Xikwembu xi tsakela yini xana: Magandzelo lama hisiwaka ni lama dyiwaka, kumbe vanhu lava yingisaka ku lerisa ka xona, xana? E-e, ku yingisa, swi tlula magandzelo; ku hlayisa rito ra xona, swi tlula mafurha ya tinyimpfu;

Duteronoma 12:32

“Hinkwaswo leswi ndzi mi lerisaka swona, mi fanele ku tikarhatela ku hanya hi swona; mi nga engeteleli nchumu kumbe ku hunguta nchumu eka swona.

Tinhlayo 3:31

Ntirho wa vona a ku ri ku hlayisa Areka, ni tafula, ni xitlhoma-timboni, ni tialitari, ni swibya leswi vaprista a va swi tirhisa exivandleni lexo hlawuleka, ni xisirhelelo xo siva Areka, ni mintirho hinkwayo leyi fambelanaka ni swilo leswi.

Eksoda 40:32

loko va nghena eka Ntsonga lowo Hlawuleka, ni loko va ya kusuhi ni alitari, hilaha HOSI Xikwembu xi leriseke Muxe hakona.)

Eksoda 39:33

Kutani va tisa Ntsonga lowo Hlawuleka eka Muxe, hi leswaku swisirhelelo swa wona, ni swingolongondzwana hinkwaswo swa wona, ni swikhweketo swa wona, ni mapulangi ya wona, ni timhandze ta wona to hingakanya ha tona, ni tiphuphu ta wona, ni minkotloto ya wona;

Eksoda 39:31

Va bohelela ngoti ya rihlaza ra tilo eka nsuku lowu wa xiphepherhele, leswaku va ta wu khomisa ha yona exihukwini, hilaha HOSI Xikwembu xi leriseke Muxe hakona.

Eksoda 12:28

kutani va ya endla hilaha HOSI Xikwembu xi leriseke Muxe na Aroni ha kona.

Eksoda 31:7

Ntsonga lowo Hlawuleka, ni Areka ya Ntwanano, ni xitshamu xa ndzivalelo lexi nga henhla ka yona, ni swingolongondzwana hinkwaswo swa Ntsonga,

Eksoda 40:1

HOSI Xikwembu xi ku ka Muxe:

Eksoda 40:3

Endzeni ka wona, mi ta veka Areka ya Ntwanano, mi siva Areka leyi hi xisirhelelo.

1 TIHOSI 6:38

Kutani hi lembe ra vu-11 ra ku fuma loku, hi n'hweti ya Bulu, yi nga ya vu-8 elembeni ra Xiyuda, Tempele yi hela hi matlhelo hinkwawo, hilaha makungu hinkwawo ya yona ma endliweke hakona eku sunguleni. Solomoni ú hetile malembe ya 7 a ri karhi a yi aka.

1 TIHOSI 7:40

Hiramu a endla ni timbita, ni minkombe, ni minkambana. Hi ndlela leyi, a hetisisa ntirho hinkwawo wa yindlu ya HOSI Xikwembu, lowu lerisiweke hi hosi Solomoni.