Eksoda 34:26 - BIBELE Mahungu Lamanene

²⁶ “Leswi mi nga ta rhanga mi swi tshovela eka ntshovelo wo sungula wa le masin'wini ya n'wina, mi ta swi tisa endlwini ya mina HOSI, Xikwembu xa n'wina. “Mi nga tshuki mi sweka ximbutana hi masi ya mana wa xona.”

Xitsonga (Bibele)

²⁶ “U ta tisa endlwini ya Yehovha Xikwembu xa wena, swirhangana swa ku sungula swa masimu ya wena. “U nga tshuki u sweka ximbutana hi ntswamba wa mana wa xona.”

Eksoda 34:26 Referans Kwoze

Eksoda 23:19

“Leswi mi nga ta rhanga mi swi tshovela emasin'wini ya n'wina, mi ta swi tisa endlwini ya mina HOSI, Xikwembu xa n'wina. “Mi nga tshuki mi sweka ximbutana hi masi ya mana wa xona.

Duteronoma 14:21

“Swilo leswi feke kunene, mi nga tshuki mi swi dya; mi nga nyika lava luveleke emitini ya n'wina va dya, kumbe mi xavisela vanhu va le handle, hikuva n'wina mi vanhu lava hlawuleriweke HOSI Xikwembu xa n'wina. “Mi nga tshuki mi sweka ximbutana hi masi ya mana wa xona.

Duteronoma 26:2

mi fanele ku teka swin'wana swa leswi mi nga ta rhanga mi swi tshovela emasin'wini ya kwale tikweni leri HOSI Xikwembu xa n'wina xi nga ta mi nyika rona, mi swi chela exirhundzwini, mi famba na swona endhawini leyi HOSI Xikwembu xi nga ta yi hlawula leswaku vito ra xona ri gandzeleriwa eka yona.

1 Vakorinto 15:20

Kambe lexi tiyeke hileswaku Kriste ú pfuxiwile exikarhi ka vafi. Hi swona leswi tshembisaka leswaku lava feke na vona va ta pfuxiwa.

Matewu 6:33

Rhangani mi tilavela Mfumo wa yena ni ku lulama ka yena, kutani sweswo hinkwaswo mi ta engeteleriwa swona.

Duteronoma 26:10

Kutani eka leswi HOSI Xikwembu xi hi nyikeke swona emasin'wini, hi xi tisela leswi hi rhangeke hi swona ku tshovela.’ Kutani mi ta swi veka emahlweni ka HOSI Xikwembu xa n'wina, mi khongela kwalaho.

Yakobo 1:18

Hi ku rhandza ka yena, ú hi velekile hi rito ra ntiyiso, leswaku hi nga va lava vuriwaka mativula ya swivumbiwa swa yena.

Levhitika 23:10

ku ya tivisa Vaisraele marito ya xona lama nge: “Loko mi ta va mi fikile etikweni leri ndzi mi nyikaka rona, kutani mi tshovela leswi mi swi byaleke, mi fanele ku teka xirhundzu xa leswi mi nga ta rhanga mi swi tshovela, mi ya na xona eka muprista.

Levhitika 23:14

Loko ku nga si fika siku leri mi tisaka ha rona magandzelo ya mina Xikwembu xa n'wina, mi nga tshuki mi dya swa nguva leyintshwa, xi nga va xinkwa, kumbe tindzhoho leti oxiweke, kumbe letimbisi. Nawu lowu mi fanele ku wu landza hilaha ku nga heriki, n'wina ni vatukulu va n'wina, hinkwako lomu mi nga ta va mi tshama kona.

Tinhlayo 15:20

Eka swakudya leswi mi nga ta sungula hi swona ku kandza, mi ta ndzi humesela ximbhundzwa xin'we; ximbhundzwa lexi, mi ta ndzi humesela xona ku fana ni loko mi ndzi humesela leswi mi swi huleke exivuyeni.

Tinhlayo 18:13

Mihandzu leyi rhangaka ku vupfa ya swilo hinkwaswo leswi byariweke emasin'wini ya Vaisraele, leyi va yi tisaka eka mina HOSI, yi ta va ya n'wina. Un'wana ni un'wana emindyangwini ya n'wina loyi a nga tinyamisangiki, ú ta pfumeleriwa ku dya mihandzu ya kona.

Nehemiya 10:35

Naswona hi tiboha leswaku lembe rin'wana na rin'wana hi ta hamba hi yisa endlwini ya HOSI Xikwembu leswi hi rhangaka hi swi tshovela emasin'wini; hi ta yisa ni mihandzu yo sungula ya mirhi hinkwayo ya mihandzu.