Eksoda 33:11 - BIBELE Mahungu Lamanene

¹¹ Hi ndlela leyi, HOSI Xikwembu a xi hamba xi vulavula na Muxe xi n'wi langutile, ku fana ni munhu loko a vulavula ni nakulobye. Minkarhi hinkwayo loko Muxe a tlhelela emixaxeni, jaha leri a ri n'wi pfuna, a nga yena Yoxuwa n'wana Nuni, a ri sala kwale ntsongeni.

Xitsonga (Bibele)

¹¹ Yehovha a tshama a vulavula na Muxe va langutene, kukota munhu loko a vulavula ni nakulobye; kutani Muxe a tlhelela emixaxeni; kambe Yoxuwa, n'wana wa Nuni, nandza wa yena wa jaha, a a nga suki endlwini.

Eksoda 33:11 Referans Kwoze

Tinhlayo 12:8

Muxe ndzi hlamulana na yena hi nomo, a twa leswi ndzi swi vulaka, hikuva a swi lavi nhlamuselo; ú vona ni xivumbeko xa mina. Kutani hikwalaho ka yini n'wina mi nga chavi ku hleva Muxe nandza wa mina xana?”

Duteronoma 34:10

Exikarhi ka Vaisraele, a ka ha humelelanga muprofeta wo fana na Muxe, hikuva HOSI Xikwembu a xi vulavula na yena va langutanile.

Eksoda 33:9

Loko Muxe a nghenile entsongeni, papa ri nembelela, ri fika ri yima enyangweni ya ntsonga, kutani HOSI Xikwembu xi vulavula na yena.

Eksoda 24:13

Kutani Muxe na Yoxuwa museketeri wa yena va suka va famba; Muxe a sungula ku tlhandlukela entshaveni ya Xikwembu,

Duteronoma 5:4

HOSI Xikwembu xi vulavurile na n'wina entshaveni xi ri endzilweni, xi langutane na n'wina.

Genesa 32:30

Hikokwalaho, Yakobo a thya ndhawu leyi vito ra Penuwele (hileswaku: “Mombo-wa-Xikwembu”), hikuva a a ku: “Ndzi vonile mombo wa Xikwembu, kambe ndza ha hanya.”

Yakobo 2:23

Naswona Matsalwa ma endlekile, lama nge: “Abrahama ú pfumerile eka Xikwembu, kutani xi n'wi hlayile la lulameke hikwalaho ka swona.” Kutani ú vuriwile nakulobye wa Xikwembu.

Yohane 11:11

Loko a vurile sweswo, a engeta a ku ka vona: “Lazaro murhandziwa wa hina, ú etlele, kambe ndzi ya ku ya n'wi pfuxa.”

Yohane 3:29

N'winyi wa mutekiwa, i muteki; nxangwana ya muteki leyi yimaka yi yingisa muteki loyi, yi tsaka swinene loko yi twa rito ra yena; hikokwalaho sweswi ku tsaka ka mina ku hetisekile.

Esaya 42:8

Mina, ndzi HOSI Xikwembu, hi rona vito ra mina, ku hava xikwembu xin'wana lexi ndzi nga xi nyikaka ku dzuneka ka mina; swifaniso leswi vatliweke swa swikwembu, ndzi nge swi nyiki ku twala ka mina.

Ntirho 16:21

Ingi ku nga va ni loyi a tsemaka mhaka exikarhi ka mina na Xikwembu, ku fana ni le xikarhi ka munhu ni munhu-kulobye,

2 TIKRONIKA 20:7

We Xikwembu xa hina, hi wena u hlongoleke vanhu lava khale a va tshama etikweni leri, kutani va sukile emahlweni ka Vaisraele vanhu va wena. Tiko ra kona u ri nyikile vatukulu va Abrahama munghana wa wena, ri va ra vona hilaha ku nga heriki.

Eksoda 32:17

Loko Yoxuwa a twa huwa ya vanhu lava a va ri karhi va hokoloka, a ku ka Muxe: “Ku ni huwa ya nyimpi emixaxeni.”

Eksoda 17:9

Kutani Muxe a byela Yoxuwa a ku: “Hlawula vavanuna lava nga ta hi lwela, u huma nyimpi na vona mi ya lwa ni Vaamaleke; loko a ri mina, mundzuku ndzi ta ya yima enhlohlorhini ya ntshava ndzi khomile nhonga ya Xikwembu evokweni.”

Eksoda 33:10

Kutani loko vanhu va vona papa rero enyangweni ya ntsonga, a va nkhinsama hinkwavo va khongela, un'wana ni un'wana a ri enyangweni ya nxaxa wa yena.

Tinhlayo 11:28

Kutani Yoxuwa n'wana Nuni loyi a a ri un'wana wa lava hlawuriweke, naswona loyi a a tirhela Muxe, a ku ka yena: “We Muxe n'wini wanga, va miyete.”

Tinhlayo 12:7

Kasi eka Muxe nandza wa mina a ndzi endlisi sweswo. Ndzi vekile hinkwaswo swa yindlu ya mina emavokweni ya yena.

Duteronoma 31:14

Kutani HOSI Xikwembu xi ku ka Muxe: “Masiku ya wena ya ku fa ma le kusuhi; hikokwalaho vitana Yoxuwa, mi ta swin'we eka Ntsonga lowo Hlawuleka, ndzi ta n'wi lerisa.” Hiloko Muxe na Yoxuwa va ya swin'we eka Ntsonga lowo Hlawuleka.